ތިލަފުށީ ބަނދަރު: ޚިދުމަތް އަވަސްވެ، އިޤްތިސާދީ ބޮޑު ކުރިއެރުމެއް ގެނުވާނެ

މާލޭ ވިޔަފާރި ބަނދަރަކީ 1986ވަނަ އަހަރު ޚިދުމަތް ފެށި ބަނދަރެއެވެ. 2015ވަނަ އަހަރު ފަށައިގެން މި ބަނދަރުން ޚިދުމަތް ދެމުންދަނީ، ބަނދަރުގެ ކެޕޭސިޓީއަށްވުރެ 3 ގުނަ އިތުރަށެވެ. ސަރުކާރުން ތިލަފުއްޓަށް ވިޔަފާރި ބަނދަރު ބަދަލުކުރަނީ މިހުރިހާ މައްސަލައަކަށް ހައްލެއް ހޯދުމަށެވެ. މިމަސައްކަތް ފިޔަވަހިތަކަށް ބަހާލައިގެން ސަރުކާރުން ކުރިއަށް ގެންދާއިރު އަންނަ އަހަރު ނޮވެންބަރު މަހަށް މިމަސައްކަތް ނިންމުމަކީ ސަރުކާރުގެ އަމާޒެކެވެ.

މަޝްރޫޢަށް ސަރުކާރުން ދެއްވާ އިސްކަން

މާލެ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތްތައް ބައްލަވާލެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްޔެ ވަނީ ތިލަފުއްޓަށް ޒިޔާރަތްކުރައްވާފައެވެ. ކަމާބެހޭ ވަޒީރުންނާއި، ސަރުކާރުގެ ކުންފުނިތަކުގެ ވެރިންނާއެކު ރައީސުލްޖުމްހޫރިއްޔާ ތިލަފުއްޓަށް ވަޑައިގަތުމަކީ މި މަޝްރޫޢަށް ސަރުކާރުން ދެއްވާ އަހަމިއްޔަތު ވަރަށް ރަނގަޅަށް ހާމަވެގެންދާ ކަމެކެވެ. އަދި މަޝްރޫޢުގެ ދުވެލި އަވަސްކުރުމަށް ޚުދު އެމަނިކުފާނު އިސްކަންދެއްވާ މިންވަރު އަންގައިދޭ އަލިގަދަ ހެއްކެކެވެ.

މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢު ކުރިއަށްދާ ގޮތް ބައްލަވާލެއްވުމަށްފަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ކުރިއަށްދާ މިންވަރާއި ސްޕީޑާމެދު ހިތްހަމަޖެހިވަޑައިގަންނަވާކަމަށެވެ. އަދި ސަރުކާރުގެ އަމާޒަކީ އަންނަ އަހަރުގެ ނޮވެންބަރު 11ގެ ނިޔަލަށް، ވިޔަފާރި ބަނދަރުގެ ޚިދުމަތްތައް ތިލަފުއްޓަށް ބަދަލުކުރުން ކަމަށެވެ.

"މާލޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމަކީ މި ސަރުކާރުން އެންމެ ޚާއްސަ އިސްކަމެއް ދެއްވައިގެން ކުރިއަށްގެންދާ އެންމެ ބޮޑު އެއް މަޝްރޫޢު. އައު ބަނދަރާއެކު ޕޯޓުގެ ޚިދުމަތްތައް 4 ގުނަ ފުޅާވާނެ. މިއީ ރާއްޖޭގެ އުފެންދުންތެރިކަން މައްޗަށް ގެންދިއުމަށް، ވިޔަފާރިތައް މައްޗަށް ގެންދިއުމަށް އެންމެ މުހިންމު މަޝްރޫޢު. ކަމާގުޅޭ ވުޒާރާތަކާއި، ކުންފުނިތައް އަދި ބޭރުގެ ފަރާތްތައް ގުޅިގެން މިހާތަނަށް މަސައްކަތް ގެންގޮސްފައިވާ ހިސާބާމެދު ވަރަށް ހިތްހަމަޖެހޭ. އެކަމަށް ޝުކުރު އަދާކުރަން." ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ތަރައްގީވެފައިވާ ޤައުމުތަކުގެ ލިސްޓަށް އެރުމަށް އެޅުނު ބިންގާ

މީޑިއާތަކާ ވާހަކަފުޅު ދައްކަވަމުން އިގުތިޞާދީ ތަރައްގީއާއި ދަތުރުފަތުރާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވީ، މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫޢަކީ 2040ވަނަ އަހަރު އަންނަންވާއިރަށް ތަރައްޤީވެފައިވާ ޤައުމުތަކުގެ ލިސްޓުގައި ރާއްޖެ ހިމެނުމަށް އެޅޭ އެންމެ މުހިންމު އެއް ބިންގާ ކަމަށެވެ. އަދި މި މަޝްރޫޢުން އެންމެ ބޮޑު އުފަލެއް ލިބޭނީ ރާއްޖޭގެ ވިޔަފާރިވެރިންނާއި، އިގުތިޞާދުގައި އިންވެސްޓުކުރާ ފަރާތްތަކަށްކަން ވަޒީރު ފާހަގަކުރެއްވިއެވެ.

"ރާއްޖޭގައި މިވަގުތުވެސް ޕްރައިވެޓް ސެކްޓަރގައި ކޮންސްޓްރަކްޝަން އިންޑަސްޓްރީން 11 ބިލިޔަން ޑޮލަރުގެ އިންވެސްޓްމަންޓް ހިނގާ. އޭގެ ތެރެއިން ބޮޑުބައެއް ހިމެނެނީ ޓޫރިޒަމް އިންޑަސްޓްރީގައި. ނަމަވެސް އެތަންތަނަށް މުދާ ފޯރުކޮށްދިނުމުގައި ބޮޑު ދަތިކަމެއް އަދިވެސް އެބައޮތް. ގިނަ ދަތިތަކާއެކުވެސް ކުޑަދުވަސްކޮޅެއްގެ ތެރޭ ޕޯޓް ބަދަލުކުރުމުގެ މަޝްރޫޢަށް ކުރިއެރުންއައީ. އެއީ ވާރުތަވެގެންއައި އެެއް މައްސަލައަކީ،" އިގުތިޞާދީ ވަޒީރު މުޙައްމަދު ސަޢީދު ވިދާޅުވިއެވެ.

ތިލަފުއްޓަށް ބަނދަރު ބަދަލުކުރުމާއެކު އޮޕަރޭޝަނަށް އަންނާނެ ކުރިއެރުންތަކަށް އިޝާރާތްކުރައްވާ ވަޒީރު ސަޢީދު ވިދާޅުވީ، ތިލަފުއްޓަށް ވިޔަފާރި ބަނދަރު ބަދަލުކުރުމާއެކު މުދާ ބާލައި ކްލިއަރ ކުރަން ހޭދަވާ 7 ދުވަހުގެ ބަދަލުގައި އެއް ދުވަސްތެރޭ މޭވާއާއި ތަރުކާރީފަދަ އާންމުކޮށް ބޭނުންކުރާ ކާބޯތަކެތީގެ ބާވަތްތައް ބޯޓުން ބާލައި މުދާ ލިބެން ހުންނާނެ ކަމަށެވެ. އަދި ބާޒާރުމަތީގައި ހުރި އަތޮޅު ފިހާރަތައްފަދަ އޮޕަރޭޝަންތައްވެސް ބަދަލުވާނެ ކަމަށާއި، މީގެ ސަބަބުން ހެޔޮ އަގުގައި ތަކެތި ލިބޭނެ ކަމަށް ވަޒީރު ވިދާޅުވިއެވެ.

މުޅި މަޝްރޫޢުގެ އަދާހަމަ

މިވަގުތު ތިލަފުށީ ބަނދަރުގައި ކުރިއަށްގެންދާ މަސައްކަތްތަކަށް އިޝާރާތްކުރައްވާ މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ ޙުސައިން ޝަފީޤު ވިދާޅުވީ، މަޝްރޫޢުގެ މަސައްކަތްތައް ބާރު ސްޕީޑެއްގައި ކުރިއަށްދާ ކަމަށެވެ. އަދި މިމަހުގެ ފަހު ހަފުތާގައި މައި ވިޔަފާރި ބަނދަރުގެ ބައެއް ޚިދުމަތްތައް ތިލަފުއްޓަށް ބަދަލުކުުރުމުގެ މަސައްކަތްތައްވެސް ޚާއްސަ އިސްކަމެއް ދީގެން މިވަގުުތު ކުރިއަށްދާ ކަމަށް ސީއީއޯ ފާހަގަކުރެއްވިއެވެ.

"މިހާރުވެސް ވަރަށް ގިނަ މުދާ އެބައާދޭ. އެހެންނަމަވެސް ބަނދަރުގެ ހާލަތު ހުރިގޮތުން އަޅުގަނޑުމެންނަށް ގޮންޖެހުންތަކެއް އެބަހުރި. އެހެންވެ އެކަން އީޒްކުރުމަށްޓަކައި އިރާދަކުރެއްވިއްޔާ މިމަހުގެ 27ވަނަ ދުވަހުން ފެށިގެން މާލޭޔާ އެއްވަރަށް ތިލަފުށީގައިވެސް އޮޕަރޭޝަން ޖައްސާނަން. ދެން ކުރިއަށްހުރި މަސައްކަތްތައް އަޅުގަނޑުމެން އިރާދަކުރެއްވިއްޔާ ދެގުނަ ހަލުވިކޮށް ގެންދާނަން 2027 ނޮވެންބަރުގައި ބަނދަރު ހުޅުވުމަށްޓަކައި،" އެމްޕީއެލްގެ ސީއީއޯ ޝަފީޤު ވިދާޅުވިއެވެ.

މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތުގައި، އެތެރޭގެ އުޅަނދުފަހަރަށް ޚާއްސަ ކީ-ވޯލްގެ ފުރަތަމަ 100 މީޓަރުގެ މަސައްކަތް މިހާރު ވަނީ ނިމިފައެވެ. އަދި ބިންގަނޑު އެއްވަރުކޮށް މަގުތައް ހެދުމުގެ މަސައްކަތްތައް ކުރިއަށްދާއިރު، އެތެރޭގެ ކީ-ވޯލްގެ ހިއްކި ސަރަހައްދު ބެކްފިލް ކުރުމުގެ ގާތްގަނޑަކަށް %40 މަސައްކަތް ވަނީ ނިމިފައެވެ. އަދި ކީ-ވޯލަށް ބޭނުންވާ ޕްރީކާސްޓް ކޮންކްރީޓް ބްލޮކްތައް ސައިޓުގައި އުފެއްދުމުގެ މަސައްކަތާއި، ބޭނުންވާ މެޝިނަރީއާއި ވަސީލަތްތައް ހޯދުމުގެ އިތުރުން ޓާމިނަލް އިމާރާތްތައް އަޅާނެ ކޮންޓްރެކްޓަރަކު ހޮވުމުގެ މަސައްކަތް މިހާރު ދަނީ ކުރަމުންނެވެ.

ތިލަފުށީގައި ގާއިމުކުރާ 60 ހެކްޓަރުގެ ޖާގައިގެ މި ބަނދަރު ހުޅުވޭއިރު އަހަރަކު 390،000 ޓީއީޔޫ ކެޕޭސިޓީގައި ކޮންޓެއިނަރު ގެންގުޅުމުގެ ޖާގަހުންނާނެއެވެ. އަދި މުޅި މަޝްރޫއު ނިމޭއިރު ކޮންޓެއިނަރުގެ ކެޕޭސިޓީ އަހަރަކު 1.8 މިލިޔަން ޓީއީޔޫއަށް އިތުރުކުރެވޭނެއެވެ. މާލޭ ވިޔަފާރި ބަނދަރުގައި އުޅަނދުފަހަރުން މުދާ ބަރުކޮށް ބާލައި ހެދުމުގެ މިޚިދުމަތް ދިނުމަށް މިހާރު 7 ދުވަހާއި 14 ދުވަހާ ދެމެދުގެ މުއްދަތެއް ހޭދަވެއެވެ. ބަނދަރު ހުޅުވޭއިރު ޝިޕް-ޓު-ޝޯ 2 ކީ ކެރޭނާއި 1 މޮބައިލް ހާބަރު ކެރޭނު ގާއިމުކުރެވޭނެއެވެ.