ރެއާލްއިން ހުށަހަޅަނީ ޔޫއޭފާއިން ބާސެލޯނާގެ ތަށިތައް އަތުލުމަށް

ބާސެލޯނާއާ ދެކޮޅަށް ބައިލައްކަ ކަރުދާހުގައިވާ ޝަކުވާތަކެއް އެ ކުލަބުގެ އެންމެ ބޮޑު ވާދަވެރިޔާ ސްޕޭނުގެ ރެއާލް މެޑްރިޑުން ޔޫރަޕުގެ ފުޓުބޯޅަ ޖަމިއްޔާ (ޔޫއޭފާ) އަށް ހުށަހަޅައިފިއެވެ.

ރެއާލްއިން ޖައްސާ މައިގަނޑު މައްސަލަ އަކީ ބާސެލޯނާއިން ރެފްރީންނަށް ރިޝްވަތު ދީގެން ކާމިޔާބީ ހޯދާފައިވާ ކަމަށް ބުނާ މައްސަލައެކެވެ. ނަމަވެސް ރެއާލްއިން ހުށަހެޅި އައު ލިޔެކިއުންތަކާއެކު މައްސަލައިގެ ތަހުގީގު އަލުން ފަށާފައިވާކަން ޔޫއޭފާއިން ޔަގީންކޮށްނުދެއެވެ. އަދި ބާސެލޯނާއިން ވެސް ވަނީ މައްސަލަ އަލުން ޔޫއޭފާއިން ބަލަން ނުފަށާ ކަމަށް ބުނެ ބަޔާނެއް ނެރެފައެވެ.

ރެއާލްއިން މައްސަލަ ޖައްސަނީ މަޝްހޫރު ނެގްރެއިރާ މައްސަލައާ ގުޅޭ ގޮތުންނެވެ. އެ ކުލަބުން ތުހުމަތު ކުރަނީ 2001 އިން 2018 ވަނަ އަހަރާ ހަމައަށް ބާސެލޯނާއިން ހޯދި ކާމިޔާބީތަކަކީ ރެފްރީންނަށް ރިޝްވަތު ދީގެން ހޯދާފައިވާ ކާމިޔާބީތަކެއް ކަމަށެވެ. މި މައްސަލަ ބާސެލޯނާއިން އެންމެ ފުރަތަމަ ހުށަހެޅީ ސްޕޭނުގެ ކޯޓަށެވެ. ނަމަވެސް ކުރިއެރުމެއް ނުލިބި ނިންމާފައިވަނީ ބާސެލޯނާއިން އެފަދަ ކަމެއް ކޮށްފައިވާ ކަމުގެ އެކަށީގެންވާ ހެއްކެއް ނެތް ކަމަށެވެ. މިހެންވެ 2023 ވަނަ އަހަރު ޔޫއޭފާ އަށް ވެސް ވަނީ މައްސަލަ ހުށަހަޅައިފައެވެ. ރެއާލްއިން އައު ހެކިތަކެއް ހުށަހަޅައި އެދެނީ ބާސެލޯނާއިން 2001 އިން 2018 އަށް ހޯދާފައިވާ ހުރިހާ ތަށިތަކެއް އަތުލައިދިނުމަށެވެ.

ނެގްރައިރާ މައްސަލައާ ގުޅިގެން ރެއާލް މެޑްރިޑާއި ބާސެލޯނާގެ ގުޅުން ވެސް ވަނީ ވަރަށް ބޮޑަށް ގޯސްވެފައެވެ. ބާސެލޯނާގެ ރައީސް ޖޯން ލަޕޯޓާ މި ހަފުތާގައި ބުނީ ރެއާލްއާއެކު އޮތް ގުޅުން އެއްކޮށް ކެނޑިއްޖެ ކަމަށާއި މިކަން އަލުން ރަހުމްތްތެރިކަމަށް ބަދަލުވާނެ ގޮތެއް ނޯންނާނެ ކަމަށެވެ.

2001 އިން 2018 އަކީ މަޝްހޫރު ލަޔޮނަލް މެސީ ބާސެލޯނާ އަށް ކުޅެ ކާމިޔާބު ހޯދި ދުވަސްތަކެވެ. އަދި މި ދުވަސްވަރު ދުނިޔޭގެ އެންމެ ވަރުގަދަ ފުޓުބޯޅަ ޓީމު އޮތީ ވެސް ބާސެލޯނާގައި ކަމަށް ގިނަ ބަޔަކު އެއްބަސްވެއެވެ. އަދި މި ދުވަސްރު ބާސެލޯނާގައި ކުޅެން ތިބި ކާލޮސް ޕުޔޯލް އާއި، ޒަވީ ހަނާންޑޭޒް އާއި އަންދްރޭސް އިނިއެސްޓާ އާއި ޖެރާޑް ޕީކޭ އަދި ނޭމާ އާއި ލުއިސް ސުއަރޭޒާއި ތިއޭރީ އޮންރީ އާއި ސެމުއެލް އެޓޫގެ ފަދަ ކުޅުންތެރިން ތަމްސީލު ކުރި ޓީމަކީ ބާސެލޯނާގެ ތާރީހުގައި ފެނުނު އެންމެ ވަރުގަދަ ޓީމު ކަމަށް ގިނަ ބަޔަކު އެއްބަސްވެއެވެ. ބައެއް ފަރާތްތަކުން ތުހުމަތު ކުރަނީ މިއީ ރެއާލް މެޑްރިޑަށް މިދިޔަ ދެ ސީޒަނުގައި ތަށިތަކެއް ނުހޯދޭތީވެ އެކަން އޮއްބާލުމަށް ރެއާލްއިން ކުރާ ކަމެއް ކަމަށެވެ.