ބޭރު މަގުގައި ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނަގަން ފަށައިފި
-
މިހާތަނަށް ހަތަރު ފުރޮޅުލީ 9 އުޅަނދު ވަނީ ނަގާފައި
-
މިރޭވެސް ޓޯ ކުރުމުގެ މަސައްކަތް ކުރިއަށްދާނެ
-
މާދަމާ ހުޅުމާލޭގައި މި އޮޕަރޭޝަން ފަށާނެ
މާލޭގެ ބޮޑުތަކުރުފާނު މަގުގައި ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް ފުލުހުން ފަށައިފިއެވެ.
އެގޮތުން މިހާތަނަށް 9 އުޅަނދު ވަނީ ނަގާފައެވެ. ޤަވާއިދާ ޚިލާފަށް ޕާކުކޮށްފައިވާ އުޅަނދުތައް މަގުމަތިން ނެގުމަށް ފުލުހުން ކުރަމުންދާ މި މަސައްކަތް މިރޭވެސް ކުރިއަށްދާކަމަށް ފުލުހުން ވިދާޅުވިއެވެ.
މަގުމަތީގައި ޤަވާއިދާ ޚިލާފަށް އުޅަނދު ޕާކު ނުކުރުމަށާއި، އަދި އެގޮތަށް ޕާކުކޮށްފައިވާ އުޅަނދުތައް ނެގުމަށް އެންމެހައި ފަރާތްތަކަށް ދިވެހި ފުލުހުންގެ ޚިދުމަތުން ވަނީ އިލްތިމާސްކޮށްފައެވެ.
ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް މިހާތަނަށް ކުރިއަށް ގެންގޮސްފައިވަނީ، މާލޭގެ ބާޒާރުމަތީ ސަރަޙައްދުގައެވެ. އެ ސަރަޙައްދަކީ ސަރުކާރުން ދާދިފަހުން މަގު ފުޅާކޮށް، ތާރު އަޅާ ތަރައްޤީކުރި ސަރަޙައްދެކެވެ. މަގުގެ ތޮއްޖެހުމުގެ މައްސަލައަށް ބޮޑު ޙައްލެއް ގެނެސްފައިވެއެވެ. ނަމަވެސް ފަހަކަށް އައިސް، އެ މަގުގެ ދެފަރާތުގައި ވެހިކަލް ޕާކުކުރާ މިންވަރު އިތުރުވެ، އެ ސަރަޙައްދުން ދުއްވާ އުޅަނދުތަކާއި، އެކިއެކި ޚިދުމަތްތައް ހޯދާ މީހުންނަށް އޭގެ ދަތިކަން ވަނީ ކުރިމަތިވެފައެވެ.
ހުޅުމާލޭގައިވެސް މިގޮތަށް ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ނެގުމުގެ މަސައްކަތް މާދަމާ ފަށާނެއެވެ.