މާސްޓަރ ޝެފް ޚާއްސަ އެޕިސޯޑުގައި ރާއްޖޭގެ ރަހަތައް

ދުނިޔޭގެ އެންމެ މަޤުބޫލު އެއް ކަލިނަރީ ޓީވީ ޕްރޮގްރާމް ކަމަށްވާ "މާސްޓަރޝެފް ސްރީލަންކާ" ގެ ޚާއްސަ އެޕިސޯޑެއް ދިވެހިރާއްޖޭގައި ޝޫޓްކޮށް، ރާއްޖޭގެ ކެއުންތަކާއި ސަޤާފަތް ދައްކުވައިދޭ އެޕިސޯޑެއް މާދަމާރޭ ޓީވީއެމްއިން ދައްކާގޮތަށް ހަމަޖެހިއްޖެއެވެ.

ވިޒިޓް މޯލްޑިވްސް ކޯޕަރޭޝަން، ވީއެމްސީއިން ވިދާޅުވީ، މި އެޕިސޯޑު ދެއްކުމަށް ހަމަޖެހިފައިވަނީ މާދަމާ ރޭ 10:00 ގައި ކަމަށެވެ.

މި ޚާއްސަ އެޕިސޯޑަކީ މޯލްޑިވްސް ހޮލިޑޭ ކަލެކްޝަންސް، އެމްއެޗްސީ ގްރޫޕާއި، އޮފިޝަލް ޑެސްޓިނޭޝަން ޕާޓްނަރުގެ ގޮތުގައި ވިޒިޓް މޯލްޑިވްސް ކޯޕަރޭޝަން، ވީއެމްސީ ގުޅިގެން ގެނެސްދޭ ޕްރޮގްރާމެކެވެ. މި އެޕިސޯޑުގައި މާސްޓަރޝެފް ސްރީލަންކާގެ ފަނޑިޔާރުންނާއި، ހޯސްޓް އަދި ބައިވެރިން ރާއްޖެ އައިސް، ރާއްޖޭގެ ރީތި މާހައުލުގައި ކެއްކުމުގެ ގޮންޖެހުންތަކާ ކުރިމަތިލާ މަންޒަރު ފެނިގެންދާނެއެވެ.

ވިޒިޓް މޯލްޑިވްސްއިން ވިދާޅުވީ، މި އެޕިސޯޑުގެ ސަބަބުން ބެލުންތެރިންނަށް ރާއްޖެއާ މެދު ތަފާތު ނަޒަރަކުން ދެކުމުގެ ފުރުސަތު ލިބިގެންދާނެ ކަމަށެވެ. އެގޮތުން، މި ވާދަވެރި މުބާރާތުގެ ތެރެއިން ދިވެހި ކެއުމުގެ ބާވަތްތަކާއި، ރަހަތަކާއި މެހެމާންދާރީ ދައްކުވައިދީ، ސަރަހައްދީ ފެންވަރުގައި ރާއްޖޭގެ ކަލިނަރީ އައިޑެންޓިޓީ އުފައްދައި، މުޅި ދުނިޔެއަށް މަޝްހޫރު ރާއްޖޭގެ ގޮނޑުދޮށްތަކާއި ކަނޑުއަޑީގެ ރީތިކަމުގެ އިތުރުން ރާއްޖޭގެ އެހެނިހެން ތަޖުރިބާތައްވެސް ދައްކާލެވޭނެ ކަމަށެވެ.

އޮފިޝަލް ޑެސްޓިނޭޝަން ޕާޓްނަރުގެ ގޮތުގައި ވީއެމްސީން މި ޕްރޮޑަކްޝަނަށް އެއްބާރުލުން ދީފައިވަނީ، މަންޒިލް އިޝްތިހާރު ކުރުމުގެ އުކުޅުތައް ސިންދަފާތުކޮށް، ކޮންޓެންޓާއި މުނިފޫހިފިލުވުމުގެ ވަސީލަތްތައް މެދުވެރިކޮށް ބައިނަލްއަޤުވާމީ އޯޑިއަންސަކާ ހަމައަށް ވާސިލުވުމަށް ކުރަމުންދާ މަސައްކަތުގެ ތެރެއިންނެވެ.

މި ޕާޓްނަރޝިޕާ ގުޅޭގޮތުން ވިޒިޓް މޯލްޑިވްސް ކޯޕަރޭޝަންގެ ސީއީއޯ އަދި މެނޭޖިންގ ޑިރެކްޓަރ ޢަބްދުﷲ ޔާސިރު ވިދާޅުވީ، ކާބަފައިންގެ ކަލިނަރީ ތަރިކައާއި ދިވެހި ރަހަތަކަކީ ރާއްޖޭގެ ވާހަކަ ދުނިޔެއަށް ކިޔައިދިނުމަށް ލިބޭ މުހިންމު ވަސީލަތެއް ކަމަށާއި، މި ޕްރޮގްރާމްގެ ސަބަބުން ބެލުންތެރިންނަށް ރާއްޖޭގެ ތަފާތު މަންޒަރެއް ފެނިގެންދާނެ ކަމަށެވެ.

މި އުފެއްދުން ރާއްޖެއަށް ގެނައުމަށްޓަކައި އެމްއެޗްސީ ގްރޫޕުން ވަނީ ދަތުރުފަތުރާއި، އެކޮމޮޑޭޝަން އަދި ޝޫޓިންގއަށް ބޭނުންވާ ބަދިގެއާއި ސްޓޭޝަންތައް ތައްޔާރުކުރުން ފަދަ އެންމެހައި ލޮޖިސްޓިކْްސް ކަންކަން ފުރިހަމަކޮށްފައެވެ. އަދި ވީއެމްސީން ވަނީ ކަމާބެހޭ އިދާރާތަކާ ގުޅިގެން ހުއްދަތަކާއި އިދާރީ ކަންކަން ހަމަޖައްސައިދީފައެވެ.

މި ޕްރޮޑަކްޝަނުން ދައްކުވައިދެނީ ރާއްޖޭގެ ތަޖުރިބާކާރުންގެ އެހީގައި ބައިނަލްއަޤުވާމީ ޓެލެވިޒަން އަދި އުފެއްދުންތެރި ޕްރޮޑަކްޝަންތައް ބޭއްވުމުގެ ޤާބިލުކަން ރާއްޖޭގައި ހުރި މިންވަރެވެ. ވީއެމްސީއަށް މިފަދަ ގުޅުންތަކަކީ ދިވެހި ވާހަކަތައް އައު ބެލުންތެރިންނާ ހަމައަށް ގެންގޮސްދިނުމަށާއި، މަންޒިލްގެ ކޮންޓެންޓް ސިންދަފާތު ކުރުމަށާއި، އަދި ރާއްޖޭގެ ދުނިޔެ ބަލައިގެންފައިވާ ފަތުރުވެރިކަމުގެ ޚިދުމަތްތައް އިތުރަށް ފުރިހަމަކޮށްދޭ ކާބޯތަކެއްޗާއި، މީހުންނާއި، ސަޤާފަތާއި ތަޖުރިބާތައް ދައްކާލުމަށް ލިބޭ ފުރުސަތެކެވެ.