އަލިފާން ނިއްވުމަށް ބޭނުންކުރާ ޑީޕް ޓްރެކަރަކާއި ޑްރޯނެއް ސްޓެލްކޯއިން އެމްއެންޑީއެފަށް ހަދިޔާކޮށްފި
-
ހަދިޔާކުރި ޑްރޯނަކީ 200 މީޓަރު އުހަށް ދަތުރު ކުރުމުގެ ޤާބިލުކަން ލިބިފައިވާ ޑްރޯނެއް
-
ޑީޕް ޓްރެކަރަކީ 200 މީޓަރު އަޑިއަށް ދަތުރުކުރެވޭ އެއްޗެއް
ކަނޑުއަޑީގެ ސާޗް އެންޑް ރެސްކިޔުގައި ބޭނުންކުރާ ވަސީލަތެއް ކަމުގައިވާ ޑީޕް ޓްރެކަރަކާއި، އުސް އިމާރާތްތަކުގެ އަލިފާން ނިންވުމުގައި އެހީތެރިވެދިނުމަށް، ފެންޖެހުމަށް ބޭނުންކުރާ ޑްރޯނެއް ސްޓެލްކޯއިން އެމްއެންޑީއެފަށް ހަދިޔާ ކޮށްފިއެވެ.
ޑީޕް ޓްރެކަރާއި ޑްރޯން ސްޓެލްކޯއިން އެމްއެންޑީއެފަށް ހަދިޔާކޮށްފައިވަނީ މިކަމަށްޓަކައި ބަންޑާރަކޮށީގައި މިއަދު ބޭއްވި ޚާއްސަ ރަސްމިއްޔާތެއްގައެވެ. މިވަސީލަތްތައް ސްޓެލްކޯގެ ފަރާތުން އެމްއެންޑީއެފަށް ހަވާލުކޮށްދެއްވީ އެ ކުންފުނީގެ މެނޭޖިން ޑިރެކްޓަރ، ޙުސައިން ފަހުމީއެވެ. އެމްއެންޑީއެފްގެ ފަރާތުން އެވަސީލަތްތަކާ ހަވާލުވެ ވަޑައިގެންނެވީ، ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީއެވެ.
ސްޓެލްކޯއިން ހަދިޔާކުރި އަލިފާން ނިއްވުމަށް ބޭނުންކުރާ ޑްރޯނަކީ ފެން ހޮޅިއާއެކު 200 މީޓަރު އުހަށް ދަތުރު ކުރުމުގެ ޤާބިލުކަން ލިބިފައިވާ ޑްރޯނެއްކަމަށް ސްޓެލްކޯއިން ވިދާޅުވެއެވެ. އަދި ޑީޕް ޓްރެކަރަކީ 200 މީޓަރު އަޑިއަށް ދަތުރުކޮށް ރޮބްޓިކް އާރމެއްގެ އެހީއާއެކު ކަނޑުއަޑިން ތަކެތި ނެގުމުގެ ޤާބިލުކަން ލިބިފައިވާ ވަޞީލަތެއްކަމަށްވެސް އެ ކުންފުނިން ވިދާޅުވެއެވެ.
މިވަސީލަތްތައް ހަދިޔާކުރެއްވުމަށް ބޭއްވި ރަސްމިއްޔާތުގައި ވައިސް ޗީފް އޮފް ޑިފެންސް ފޯސް، ބްރިގޭޑިއަރ ޖެނެރަލް އަޙްމަދު ޣިޔާޘްއާއި، އެމްއެންޑީއެފްގެ ޖެނެރަލް އޮފިސަރުންނާއި، ސްޓެލްކޯގެ އިސްވެރިން ބައިވެރިވެ ވަޑައިގެންނެވިއެވެ.