ޕީޕީއެމް އުވާލުމަށް ނިންމައިފި

ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުވާލުމަށް ނިންމައިފިއެވެ.

ޕީޕީއެމް އުވާލުމަށް ނިންމީ އެކަމަށްޓަކައި ބޭއްވި އެ ޕާޓީގެ ސެނެޓުގެ ބައްދަލުވުމެއްގައެވެ.

މިކަމާއި ގުޅޭގޮތުން އެޕާޓީން ނެރުނު ނޫސްބަޔާނުގައި ބުނީ، ޕްރޮގްރެސިވް ޕާޓީ އޮފް މޯލްޑިވްސްގެ ނަމުގައި އިލެކްޝަން ކޮމިޝަނުގައި ރެޖިސްޓްރީކޮށް ހިންގަމުންދާ ސިޔާސީ ޕާޓީ މިވަގުތު މަސައްކަތް ކުރަމުންދަނީ، ކޯލިޝަނެއްގެ ތެރެއިން ކަމަށެވެ. މިއާއެކު މިވަގުތު ވެރިކަން ކުރަމުންދަނީ އެޕާޓީގެ އުސޫލްތަކާއި ފިކުރާއި އެއްގޮތް ޕާޓީއެއް ކަމުގައިވާ ޕީޕަލްސް ނޭޝަނަލް ކޮންގްރެސް (ޕީއެންސީ) ކަމަށްވެފައި، އެޕާޓީއާއި ޕީޕީއެމްގެ ގިނަ އަދަދެއްގެ މެންބަރުން ގުޅެމުން ދިއުމާއެކު ޕާޓީގެ ލީޑާޝިޕަށް ވަކިން ސިޔާސީ ހަރަކާތެއް ކުރިއަށް ގެންދިއުމުގެ ބޭނުން ނުފެންނަކަމަށް ޕީޕީއެމްއިން ބުނެއެވެ.

މިއާއެކު ޕާޓީގެ އަސާސީ ޤަވާއިދުގައިވާ ގޮތުގެ މަތީން ޕާޓީގެ ލީޑާޝިޕުން ޕާޓީ އުވާލުމަށް ނިންމައި ޕާޓީ 3 ނައިބު ރައީސުންނާއި ސެކެރެޓަރީ ޖެނެރަލް ސޮއިކޮށް ސެނެޓަށް ޤަރާރެއް ވަނީ ހުށަހަޅާފައެވެ. ޕާޓީ އުވާލުމަށް ނިންމާފައިވަނީ ސެނެޓު ބައްދަލުވުމުގައި ބައިވެރިވި 42 މެންބަރުންގެ އިއްތިފާޤުންނެވެ.

ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމް އަކީ ކުރީގެ ރައީސް އަލްއުސްތާޛު މައުމޫން އަބްދުލްޤައްޔޫމް އިސްވެ ހުންނަވާ 2011 ވަނަ އަހަރު އުފެއްދެވި ސިޔާސީ ޕާޓީއެކެވެ.