އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓްގައި ރާއްޖޭން ބައިވެރިވާން ނިންމައިފި

އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓް (އޭ.ޕީ.އާރް.އެފް.އެޗް.އީ)ގެ މެންބަރު ޤައުމެއްގެ ގޮތުގައި ދިވެހިރާއްޖޭން ބައިވެރިވުމަށް ވަޒީރުންގެ މަޖިލީހުން ނިންމަވައިފިއެވެ.

މިގޮތަށް ނިންމަވާފައިވަނީ މިމަހުގެ 1 ވަނަ ދުވަހު ބޭއްވެވި ވަޒީރުންގެ މަޖިލީހުގެ ޖަލްސާއަށް ސިއްޙަތާ ބެހޭ ވުޒާރާއިން ހުށަހެޅުއްވި ހުށައެޅުއްވުމަކާ ގުޅިގެންނެވެ.

އޭ.ޕީ.އާރް.އެފް.އެޗް.އީގެ މެންބަރަކަށްވުމުން ދިވެހިރާއްޖެއަށް ކުރާނެ ފައިދާތަކުގެ ތެރޭގައި، ފޯރަމްގެ މެމްބަރު ޤައުމުތަކާ ގުޅުން ބަދަހިވެ، ސިއްޙަތާއި ތިމާވެއްޓާ ގުޅުންހުރި ސިޔާސަތުތަކާއި ޤައުމީ ޕްލޭންތައް އެކުލަވާލުމާއި ތަންފީޒުކުރުމަށް ސަރަޙައްދީ އެއްބާރުލުން ލިބުމާއި، ދިވެހިރާއްޖޭގެ ތިމާވެއްޓާއި ސިއްޙަތަށް ކުރާ ނޭދެވޭ އަސަރުތައް ކުޑަކުރުމަށް ވަކާލާތު ކުރުމާއި، ސަރަޙައްދީގޮތުން އެކުގައި މަސައްކަތް ކުރުމުގެ ފުރުޞަތުލިބުން ހިމެނެއެވެ.

މީގެ އިތުރުން، ސިއްޙީ އަދި ތިމާވެށީގެ ދާއިރާއިން ޚިދުމަތްދިނުމުގައި ޑިޖިޓަލް ހެލްތު ބޭނުންކުރުމުގެ ލުއިފަސޭހަކަން ލިބި ފަންނީ އެހީތެރިކަން ހޯދުމަށް މަގުފަހިވާނެއެވެ. ފޯރަމްގެ ނޮލެޖު ނެޓްވަރކްގެ ޒަރިއްޔާއިން ދިރާސީ މަސައްކަތްތަކަށް އެހީތެރިކަން ލިބި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި މޫސުމަށް އަންނަ ބަދަލުތަކުގެ ސަބަބުން ޢާންމު ސިއްޙަތަށް ހުރި ނުރައްކާތައް ވަޒަންކޮށް މިންކުރުމާއެކު މި ދެ ދާއިރާއިން އެއް މަންސައެއްގައި، ވަށާޖެހޭގޮތަކަށް ލަނޑުދަނޑި ޙާޞިލުކުރުމަށް މަސައްކަތްކުރެވޭނެއެވެ. އަދި ފަންނީ ތަމްރީނުތައް ހޯދުމުގެ ފުރުޞަތު ބޮޑުވެ، މި ކަމަށް ބާރުއެޅޭނެއެވެ.

އޭޝިޔާ ޕެސިފިކް ރީޖަނަލް ފޯރަމް އޮން ހެލްތު އެންޑް ދަ އެންވަޔަރަންމަންޓަކީ، ތިމާވެއްޓަށް އަންނަ ބަދަލުތަކުގެ ސަބަބުން އިންސާނުންގެ ސިއްޙަތަށް ކުރިމަތިވެފައިވާ ނުރައްކާތައް ޙައްލުކުރުމުގެ ގޮތުން 2004 ވަނަ އަހަރު އެކުލަވާލި ފޯރަމެކެވެ. ޤައުމުތަކުން މި ފޯރަމުގައި ބައިވެރިވަނީ ވޮލަންޓަރީކޮށެވެ. މި ފޯރަމުގައި ބައިވެރިވުމުން، މި ފޯރަމްގެ ތެރެއިން އިންތިޒާމުކުރާ ތީމެޓިކް ވަރކިންގް ގްރޫޕްތަކުގައި އެކި ދާއިރާތަކުން މަސައްކަތްކުރުމުގެ ފުރުޞަތު ލިބޭނެއެވެ. އަދި ޤައުމުތަކަށްން ފޯރަމްގެ ޗެއަރމަންޝިޕް އަދާކުރުމުގެ ފުރުޞަތު ލިބިގެންދާނެއެވެ.

މި ފޯރަމްގެ މަޤްޞަދަކީ، ސަރަޙައްދީ އަދި ޤައުމީ ފެންވަރުގައި ސިއްޙީ ދާއިރާއާއި ތިމާވެށީގެ ދާއިރާތަކުގެ މެދުގައި އެއްބާރުލުން ދިނުމުގެ މަންސައެއް މެދުވެރިކޮށްދިނުމާއި، ތިމާވެއްޓަށް ބޭރުކުރާ ވިހަ މާއްދާތަކުގެ ސަބަބުން ތިމާވެށި ތަޣައްޔަރުވުމާއި، މޫސުމަށް އަންނަ ނޭދެވޭ ބަދަލުތަކުން ޢާންމު ސިއްޙަތަށް ހުރި ނުރައްކާތައް ކުޑަކުރުމަށް ޤައުމުތަކުން އަޅަންޖެހޭ ފިޔަވަޅުތައް އެޅުމެވެ. އަދި ސިޔާސަތުތަކާއި ކުރަންޖެހޭ މަސައްކަތްތަކާ ގުޅޭގޮތުން ވަކާލާތުކުރުމާއި، ދެމެހެއްޓެނިވި ތަރައްޤީގެ ލަނޑުދަނޑިތައް، ޕެރިސް އެގްރީމަންޓް، ނެޝަނަލީ ޑިޓަރމައިންޑް ކޮންޓްރިބިއުޝަން، މިނަމާޓާ ކޮންވެންޝަންސް އަދި ގްލޯބަލް ބަޔޯޑައިވަރސިޓީ ފްރޭމްވަރކްގެ މައިގަނޑު އަސާސްތަކާ އެއްގޮތްވާގޮތުގެ މަތިން ތިމާވެށި ހިމާޔަތްކޮށް، ޢާންމު ސިއްޙަތު ރައްކާތެރިކުރުމަށްޓަކައި ދަތުރުފަތުރާއި، ތަޢުލީމާއި، ހަކަތަ އާއި، ވިޔަފާރީގެ ދާއިރާ ފަދަ އެހެނިގެން ދާއިރާތައް ކުރިއެރުވުމެވެ.

މި ފޯރަމުގައި ބައިވެރިވުމުން ދައުލަތުން އަދި އާންމު ފަރުދުން އެއްވެސް އިލްތިޒާމެއް އުފުލާކަށް ނުޖެހޭނެއެވެ.