ހުޅުމާލެ ދެވަނަ ފިޔަވަހިން އިތުރު 10 ބިން ވިއްކުމަށް ހުޅުވާލައިފި
-
ބިން ގަނެވޭނީ ހަމައެކަނި ދިވެހީންނަށް
-
ބީޗް ފްރަންޓުން 3 ބިން އަދި ބީޗް ސައިޑުން 7 ބިމެއް
-
ބީލަން ހުށައެޅޭނީ ހަމައެކަނި %100 ދިވެހީންގެ ހިއްސާ އޮންނަ ކުންފުނިތަކަށް
ބީލަމުގެ އުސޫލުން ހުޅުމާލޭ ދެވަނަ ފިޔަވަހިން އިތުރު 10 ބިން ވިއްކުމަށް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ހުޅުވާލައިފިއެވެ.
އެޗްޑީސީން ވިދާޅުވީ، ހަމައެކަނި ދިވެހީންނަށް ގަނެވޭގޮތަށް ހުޅުމާލެ ދެވަނަ ފިޔަވަހީގެ ބީޗް ފްރަންޓާއި، ބީޗް ސައިޑުން 10 ބިމެއް ވިއްކުމަށް ނިންމާފައިވާކަމަށެވެ. އޭގެތެރޭގައި ހިމެނެނީ ބީޗް ފްރަންޓުން 3 ބިމަކާއި، ބީޗް ސައިޑުން 7 ބިމެކެވެ.
ބީޗް ފްރަންޓުން ދޫކުރުމަށް ކަނޑައަޅާފައިވަނީ، 1559 އަކަފޫޓާއި، 3250އަކަފޫޓާއި ދެމެދުގެ ބިންތަކެކެވެ. އަދި ބީޗް ސައިޑުން ދޫކުރަނީ 1230 އަކަފޫޓާއި، 1534 އަކަފޫޓާއި ދެމެދުގެ ބިންތަކެއްކަމަށް އެޗްޑީސީން ވިދާޅުވެއެވެ.
ބީޗް ފްރަންޓުން ދޫކުރާ ބިންތަކުގެ ބީލަން ފެށޭއަގަކީ، 4500 ރުފިޔާއެވެ. އަދި ބީޗް ސައިޑުން ވިއްކާ ބިންތަކުގެ ބީލަން ފެށޭ އަގަކީ 4000 ރުފިޔާއެވެ. އެޗްޑީސީން ވިދާޅުވީ މިބިންތަކަށް އެދި ކޮންމެ ފަރާތަކަށްވެސް އެއްބިމަށްވުރެ ގިނަ ބިންގަތުމަށް އެދި ހުށައެޅިދާނެކަމަށެވެ.
ހަމައެކަނި ދިވެހީންނަށް ކުރިމަތިލެވޭގޮތަށް ހުޅުވާލި މިފުރުސަތުގައި ޢުމުރުން 18 އަހަރުވެފައިވާ ކޮންމެ ދިވެއްސަކަށްވެސް ބީލަމުގައި ބައިވެރިވެވޭނެކަމަށް އެޗްޑީސީން ވިދާޅުވެއެވެ. އަދި ބީލަން ހުށައެޅޭނީ ހަމައެކަނި ސައްތައިންސައްތަ ދިވެހީންގެ ހިއްސާ އޮންނަ ކުންފުނިތަކަށްކަމަށްވެސް އެޗްޑީސީން ވިދާޅުވެއެވެ.
ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ބިން ވިއްކުމަށް ހުޅުވާލާފައިވާ ބިންތަކަކީ ވިޔަފާރި އުސޫލުން ހެދިކާފަދަ ތަކެތި ވިއްކުމަށް ކިއޮސްކްތައް ދޫކޮށްފައިވާ ސަރަޙައްދާ ކައިރި ހިސާބެކެވެ. މީގެކުރިންވެސް އެޗްޑީސީންވަނީ އެކި ބޭނުންތަކަށް ބިން ވިއްކުމަށް ހުޅުވާލާފައެވެ. މިގޮތުން ބީލަމުގެ އުސޫލުން މިމަހުވެސް 8 ބިން ވިއްކުމަށް ހުޅުވާލިއެވެ.
ހުޅުމާލޭ ދެވަނަ ފިޔަވަހީގެ މާސްޓަރ ޕްލޭނާ އެއްގޮތަށް މިކްސްޑް ރެސިޑެންޝަލް ނުވަތަ އަމިއްލަ ފަރާތްތަކުން ގެދޮރުވެރިކަމުގެ މަޝްރޫޢުތައް ހިންގުމަށް ބިން ދޫކުރުމާއި، އެކި ކަހަލަ ވިޔަފާރިކުރުމަށް ޚާއްސަ އިމާރާތް އެޅުމަށްވެސް އެޗްޑީސީންދަނީ ބިންދޫކުރަމުންނެވެ.