އެފްޑީސީން މާލެ ސަރަޙައްދުގައި 13،000 ހައުސިން ޔުނިޓް ތަރައްޤީކުރަނީ

އިޖުތިމާޢީ ބޯހިޔާވަހިކަން ކަށަވަރުކުރުމަށް މާލެ ސަރަހައްދުގައި 13،000 ހައުސިން ޔުނިޓް ތަރައްޤީކުރުމުގެ މަޝްރޫޢުއެއް ކުރިއަށް ގެންދިޔުމަށް ފަހި ދިރިއުޅުން ކޯޕަރޭޝަން، އެފްޑީސީން ނިންމައިފިއެވެ. މި މަޝްރޫއުތައް ކުރިއަށް ގެންދިޔުމަށްޓަކައި އެފްޑީސީން ވަނީ ރާއްޖެއިން ބޭރުގެ 3 ކުންފުންޏަކާއެކު ފްރޭމްވޯކް އެއްބަސްވުންތަކެއްގައި ސޮއިކޮށްފައެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އެފްޑީސީގެ މެނޭޖިން ޑިރެކްޓަރ ހަމްދާން ޝަކީލް ވިދާޅުވީ މާލެ ސަރަޙައްދުގައި ސޯޝަލް ހައުސިން ނުވަތަ އިޖުތިމަޢީ ބޯހިޔާވަހިކަމުގެ އިތުރު މަޝްރޫޢުތަކެއް ކުރިއަށް ގެންދިޔުމަށް އެކުންފުނިން ނިންމާފައިވާކަމަށެވެ. އެގޮތުން މި މަސައްކަތްތައް ކުރިއަށް ގެންދިޔުމަށްޓަކައި މިއަހަރުގެ ކުރީ ކޮޅު ސްރީލަންކާގެ ކުންފުންޏަކާއެކު 3000 ހައުސިން ޔުނިޓް ތަރައްޤީކުރުމުގެ ފްރޭމްވޯކް އެއްބަސްވުމެއްގައި ސޮއިކޮށްފައިވާކަމަށް ހަމްދާން ވިދާޅުވިއެވެ. އަދި މިހާރު ކުރިއަށް ގެންދަނީ އެ މަޝްރޫއުއަށް ބޭނުންވާ ފައިނޭންސް ހޯދުމުގެ މަސައްކަތްކަން ހަމްދާން ފާހަގަކުރެއްވިއެވެ.

މީގެ އިތުރުން ބޭރުގެ 2 ކުންފުންޏަކާ އެކު ޖުމުލަ 10000 ހައުސިން ޔުނިޓް ތަރައްޤީކުރުމުގެ ފްރޭމް ވޯކް އެއްބަސްވުމެއްގައިވެސް ސޮއިކޮށްފައިވާކަމަށްވެސް ހަމްދާން ވިދާޅުވިއެވެ. އަދި މި މަޝްރޫޢުތައް ކުރިއަށް ގެންދަނީ ބޭރުގެ އެކި ފައިނޭންސް އެޖެންސީތަކުން ލޯނު ނަގައިގެންކަމަށްވެސް އޭނާ ވިދާޅުވިއެވެ.

"މި މަޝްރޫޢުތައް ކުރިއަށް ގެންދިޔުމަށް ހަމަޖެހިފައިވަނީ ބޭރުން ލޯނު ނަގައިގެންކަމަށް. އަދި 2 މަސްދުވަހުގެ ތެރޭގައި އެ މަޝްރޫޢުތައް ކުރިއަށް ގެންދިޔުމުގެ ހުއްދަ ހޯދުމަށް ސަރުކާރަށް ހުށައަޅާނެ. ކުރިއަށްއޮތް 4 މަސްދުވަހުގެ ތެރޭގައި މަޝްރޫޢުތައް އިފްތިތާހްކުރާނެ. ސޯޝަލް ހައުސިން ބޭނުންވާ ކޮންމެ ރަށެއްގައި އެފަދަ މަޝްރޫޢުތައް ކުރިއަށް ގެންދިޔުމަށް އަޅުގަނޑުމެން މިތިބީ ތައްޔާރަށް." ފަހި ދިިރިއުޅުން ކޯޕަރޭޝަންގެ މެނޭޖިން ޑިރެކްޓަރ ހަމްދާން ޝަކީލް ވިދާޅުވިއެވެ.

ބޯހިޔާވަހިކަމުގެ އިތުރު މަޝްރޫޢުތަކެއް އެފްޑީސީން ކުރިއަށް ގެންދިޔުމަށް ނިންމާފައިވާއިރު އެކުންފުނިން މިހާރު ހަމައެކަނި ކުރިއަށްގެންދަނީ ހުޅުމާލެ ދެވަނަ ފިޔަވަހީގައި 4000 ހައުސިން ޔުނިޓް ތަރައްޤީކުރުމުގެ މަޝްރޫޢުއެވެ. މި މަޝްރޫގެ މަސައްކަތް އަންނަ އަހަރގެ ތެރޭގައި ނިންމުމަށް އަމާޒު ވަނީ ހިފާފައެވެ. އެގޮތުން އެ މަޝްރޫއުއަށް ނުދައްކާ އޮތް 178 މިލިޔަން ރުފިޔާ ދައްކާ ޚަލާސްކޮށްފައިވާއިރު މަސައްކަތް އަވަސްކުރުމަށް ބައެއްކަންކަމަށް ބަދަލުތަކެއްވެސް ގެނެސްފައިވެއެވެ.

ބޯހިޔާވަހިކަމުގެ މައްސަލައަކީ ރާއްޖެއަށް ދިމާވެފައިވާ ބޮޑު މައްސަލައަކަށްވާއިރު މި މައްސަލަ ހައްލުކުރުމަކީ ރައީސުލްޖުމްހޫރިއްޔާގެ އެންމެ އިސް އެއް ސިޔާސަތެވެ. އެގޮތުން އަންނަ އަހަރުގެ ބަޖެޓުގައި ގެދޮރުވެރިކުރުމާ ގުޅޭ މަޝްރޫޢުތަކަށް 3 ބިލިޔަނަށްވުރެ ބޮޑު ހޭދައެއް ކުރުމަށް ވަނީ ހިމަނާފައެވެ. ރައީސުލްޖުމްހޫރިއްޔާގެ ވަޢުދަކީ އެމަނިކުފާނުގެ 5 އަހަރުގެ ދަޢުރު ނިމޭއިރު، ބޯހިޔާވަހިކަމުގެ
ކޮންމެވެސް އެއް މަޝްރޫޢަކުން ފުރުޞަތު ނުލިބޭ ރައްޔިތަކު ނެތްކަން ކަށަވަރުކުރެއްވުމެވެ.