ގުޅިފަޅުން 3520 މީހުންނަށް ބިން ލިބުނު ސަރަޙައްދު ގުރުއަތުން ކަނޑައަޅައިފި

ގުޅިފަޅުން 3520 މީހަކަށް ބިން ލިބުނު ސަރަޙައްދު ގުރުއަތުން ކަނޑައަޅައިފިއެވެ.

ގޯތި ލިބުނު ފަރާތްތަކަށް ލިބުނު ސަރަޙައްދު ކަނޑައަޅާފައިވަނީ ދަރުބާރުގޭގައި ކުރިއަށްގެންދިޔަ ގުރުއަތުލުމުގައެވެ. ގުޅިފަޅުން ގޯތި ލިބުނު ފަރާތްތަކުގެ ގޯތި ކުރިން ލިބުނު ސަރަހައްދު ބަދަލުވީ ގުޅިފަޅުގެ ލޭންޑް ޔޫސް ޕްލޭނަށް އައިސްފައިވާ ބަދަލަކާ ގުޅިގެންނެވެ.

ގުރުއަތުލުމުގެ ކަންތައްތައް ކުރިއަށް ދިޔަގޮތާއި ގުޅޭގޮތުން ޕީއެސްއެމްނިއުސްއަށް މަޢުލޫމާތު ދެއްވަމުން ގެދޮރުވެރިކަމާ ބިމާ ޢުމްރާނީ ތަރައްޤީއާއި ބެހޭ ވުޒާރާއިން ވިދާޅުވީ، ގުރުއަތުލުމުގެ ކަންކަން ދިޔައީ ޖުމްލަކޮށް އަމާންކަމާއެކު ކަމަށެވެ.

ގެދޮރުވެރިކަމާ ބިމާ ޢުމްރާނީ ތަރައްޤީއާ ބެހޭ ވުޒާރާއިން ވިދާޅުވީ، ގުޅިފަޅުން ގޯތި ލިބުނު ފަރާތްތަކުގެ ރަޖިސްޓްރި ޙަވާލުކުރުމުގެ މަސައްކަތް ކުރިއަށް އޮތް ދެތިން މަހެއްގެ ތެރޭގައި ނިމޭނެކަމަށް ލަފާކުރެވޭކަމަށެވެ. އެގޮތުން ރަޖިސްޓްރީ ޙަވާލުކުރަމުންދާނީ ބިން ހިއްކާފައިވާ ސަރަޙައްދުތަކުންކަމަށް ސަރުކާރުންވަނީ ވިދާޅުވެފައެވެ.

މިގުރުއަތުގައިވަނީ ޕްލޮޓް ހަވާލުކޮށްފައިވާ ފަރާތްތަކާއި، މިހާތަނަށް ޕްލޮޓް ހަވާލުނުކޮށް ތިބި ފަރާތްތަކުގެ އިތުރުން ގިރާވަރު ފަޅުން ލިބިފައިވާ ގޯތިތައް ގުޅީފަޅަށް ބަދަލުކުރި މީހުންގެ ގޯތީގެ ގުރުއަތުލުންވެސްވަނީ ކުރިއަށްގެންގޮސްފައެވެ.

ގުޅިފަޅުން ދޫކޮށްފައިވަނީ 7 ސައިޒެއްގެ ގޯތިތަކެކެވެ.

• ގުޅިފަޅުން ދޫކުރާ ގޯތީގެ ތަފްސީލް:
• • 1250 އަކަފޫޓުގެ 669 ގޯތި
• • 1650 އަކަފޫޓުގެ 1234 ގޯތި
• • 2050 އަކަފޫޓުގެ 916 ގޯތި
• • 2450 އަކަފޫޓުގެ 473 ގޯތި
• • 2850 އަކަފޫޓުގެ 158 ގޯތި
• • 3250 އަކަފޫޓުގެ 49 ގޯތި
• • 3650 އަކަފޫޓުގެ 21 ގޯތި

ގުޅިފަޅުގެ ކުރީގެ ލޭންޑް ޔޫސް ޕެލޭނުގައި ސިނާޢީ މަސައްކަތްކުރާ ސަރަހައްދާއި މީހުން ދިރިއުޅޭ ސަރަހައްދާ ދެމެދު 100 ފޫޓުގެ ދުރުމިންވެސް ނެތެވެ. އަދި ރައްޔިތުންނަށް ޢާންމު ޚިދުމަތްތައް ފޯރުކޮށްދޭ ތަންތަނަށް މީހުން ދިރިއުޅޭ ސަރަހައްދާ ދުރުކަމަށްވެސް ފާހަގަކޮށްފައިވެއެވެ. އަދި އެކަށީގެންވާވަރަށް ކުޅިވަރު ކުޅޭނެ ތަންތަނާއި ޕާކުތައް މީހުން ދިރިއުޅޭ ސަރަހައްދުތަކުގައި ހިމަނާފައިނުވެއެވެ. މީގެ އިތުރުން ގްރީން ސްޕޭސްގެ ގޮތުގައި ކަނޑައަޅާފައިވަނީ އެންމެ 8 އިންސައްތައެވެ. އެހެންކަމުން ލޭންޑް ޔޫސް ޕްލޭނަށް ބަދަލު ގެނެސް މިހާރުވަނީ ގުޅިފަޅަކީ ޢާއްމުންނަށް ހިތްފަސޭހަކަމާއެކު ދިރިއުޅެނެވޭނެ ގޮތަށް އެތަނުގެ ޕްލޭނަށް ބޮޑެތި ބަދަލު ގެނެސްފައެވެ.