ސިފައިންގެ ތަމްރީން މަރުކަޒުކަމަށްވާ ކ.ގިރިފުށިން 35 މީހަކު ކޯވިޑަށް ޕޮޒިޓިވްވެފައިވާކަމަށް ހެލްތު އިމަރޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ. އެޗްއީއޯސީން ވިދާޅުވީ، އެންމެ ފުރަތަމަ ގިރިފުށިން ޕޮޒިޓިވްވި 4 މީހެއްކަމަށާއި، އޭގެ ފަހުން ފަސްމީހުން އަދި އިއްޔެ 26 މީހުން ކޯވިޑަށް ޕޮޒިޓިވްވެފައިވާކަމަށެވެ.
ގިރިފުއްޓަކީ ސިފައިން އަސްކަރީ ތަމްރީނުހެދުމަށް ޚާއްސަ ރަށެކެވެ. އެރަށުން ކޯވިޑް-19އަށް ޕޮޒިޓިވްވެފައިވާ މީހުންގެ ތެރޭގައި މިހާރު ސިފައިންގެ ޓްރެއިނިންގ ހަދަމުންދާ ބަޔަކު ހިމެނޭކަމަށް މަޢުލޫމާތު ލިބެއެވެ. ގިރިފުށިން ޕޮޒިޓިވް ކޭސްތަކެއް ފެނުމުން އެރަށަށްއަރާފޭބުން ވަނީ މަނާކޮށްފައެވެ.
ކޯވިޑް-19އާއި ގުޅިގެން އިސްސަފުގައި ޙަރަކާތްތެރިވަމުން އަންނަ ގިނަ ޢަދަދެއްގެ ޚިދުމަތްތެރިން ކޯވިޑް-19އަށް ޕޮޒިޓިވްވެފައިވާ ކަމަށް އެޗްއީއޯސީން ހާމަކުރައްވައެވެ. އޭގެ ތެރޭގައި ސިއްޙީ ޚިދުމަތްތެރިންނާއި ސިފައިންނާއި ފުލުހުން ޕޮޒިޓިވްވެފައިވާކަން ފާހަގަކުރެވެއެވެ.