ނޫސްވެރިޔާ އަހުމަދު ރިޟުވާން ވަގަށްނެގި މައްސަލަ އިސްތިއުނާފް ކުރުމުގައި ކޯޓާއި، ޕީޖީ ދައްކަމުންދާ ވާހަކަތައް މަޖިލީހުން ބަލާނެކަމުގައި ހެންވޭރު ހުޅަނގު ދާއިރާގެ މެމްބަރު ހަސަން ލަތީފް ވިދާޅުވެއްޖެއެވެ.
ނޫސްވެރިޔާ އަޙްމަދު ރިޟުވާން ވަގަށްނެގި މައްސަލާގައި އިސްތިއުނާފު ކޮށްފައިވާނެކަމަށް ޕީޖީވަނީ ވިދާޅުވެފައެވެ. އެހެންނަމަވެސް އެމައްސަލަ ކޯޓަށް ހުށަހަޅާފައި ނުވާކަމަށް ވިދާޅުވެ ކޯޓުން ދައްކަމުންދާ ވާހަކަތަކާ ގުޅިގެން ހަސަން ލަޠީފް ވިދާޅުވެފައިވަނީ މިކަން ހިނގާފައިވާގޮތުން ރައްޔިތުންގެ މަޖިލީހުން ބަލާނެކަމަށެވެ. މިމައްސަލައަކީ ވަރަށް ސީރިއަސް މައްސަލައެއްކަމަށްވާއިރު މިފަދަ ގޮތަކަށް ކޯޓާއި، ޕީޖީއާމެދު ވާހަކަހުރުމަކީ މިކަން ބަލަންޖެހޭ ކަމެއްކަމަށް ދެކޭކަމުގައި ހަސަން ލަތީފް ވިދާޅުވެފައިވެއެވެ.
ރިޟުވާން ވަގަށްނެގި މައްސަލާގައި ދައުވާކުރި ދެމީހުންގެ މައްޗަށް ކުށްސާބިތު ނުވާކަމަށް ކްރިމިނަލް ކޯޓުން ނިންމި ނިންމުން ހައިކޯޓްގައި ހަމަ އެދުވަހު އިސްތިއުނާފް ކޮށްފައިވާނެކަމަށް ޕީޖީވަނީ ވިދާޅުވެފައެވެ. ނަމަވެސް ހައިކޯޓުން އިއްޔެ ރިޟުވާނުގެ ޢާއިލާއަށް އަންގާފައިވަނީ ޕީޖީ އެމައްސަލަ އިސްތިއުނާފް ކޮށްފައި ނުވާކަމަށެވެ. ރިޟުވާން ގެއްލިފައިވަނީ މީގެ ފަސްއަހަރު ކުރިން 2014 އޮގަސްޓް 9 ވަނަ ދުވަހުއެވެ.