ގދ.ފަރެސްމާތޮޑާގައި ހަދާ އެއާޕޯޓުގެ ބޭނުންވާ އެރަށުން ހިއްކާ ބިމުގެ ފަސްދޮޅަސް އިންސައްތަ ހިއްކައި ނިމިފައިވާކަމަށް އެރަށު ކައުންސިލުން ވިދާޅުވެއްޖެއެވެ.
ފަރެސްމާތޮޑާ ކައުންސިލްގެ ރައީސް ނަސްރުﷲ މުހައްމަދު ވިދާޅުވީ، އެއާޕޯޓު ހެދުމަށްޓަކައި ހިއްކުމަށް ހަމަޖައްސާފައިވަނީ 19.8 ހެކްޓަރުގެ ބިން ކަމަށެވެ. އެބިމުގެ ފަސްދޮޅަސް އިންސައްތަ މިހާތަނަށް ހިއްކައި ނިމިފައިވާކަމަށާ، މަސައްކަތުގެ ބޮޑުމިނާއި، އޭގެ ހަލުވިމިނަށް ބަލާއިރު މުޅިމަސައްކަތް ނިންމަން އަދި ދުވަސްތަކެއް ނަގާނެކަމަށްވެސް އޭނާވިދާޅުވިއެވެ.
މިއަހަރު ނިމުމުގެ ކުރިން ފަރެސްމާތޮޑާ އެއާޕޯޓުގެ މަސައްކަތް ނިންމުމަކީ ސަރުކާރުގެ އަމާޒެއް ކަމަށް މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވަނީ ވިދާޅުވެފައެވެ. މިނިސްޓަރ އަސްލަމް ވިދާޅުވީ ފަރެސްމާތޮޑާ އެއަރޕޯޓުގެ މަޝްރޫޢަކީ އެރަށުގެ އިތުރުން މުޅި ގދ.އަތޮޅުވެސް އެމަޝްރޫއަކަށް އިންތިޒާރުކުރަމުންދާ މުހިންމު މަޝްރޫއެއްކަމަށެވެ.
މިމަޝްރޫއުގެ ދަށުން 1200 މީޓަރު ދިގު ރަންވޭއަކާއެކު ޑޮމެސްޓިކް އެއަރޕޯޓެއް ހެދުމަށްވަނީ ނިންމާފައެވެ. މިއީ ސަރުކާރުން ހަތަރު މިލިއަން ޑޮލަރު ޚަރަދުކޮށްގެން ކުރިއަށްގެންދާ މަޝްރޫޢެކެވެ. އެރަށުގައި އެއަރޕޯޓު ހެދުމަށްޓަކައި ބިންހިއްކުމުގެ މަސައްކަތް، މިދިޔަ އަހަރުގެ ސެޕްޓެމްބަރު މަހުން ފެށިގެން ދަނީ ކުރަމުންނެވެ.
މި މަޝްރޫއުގެ ދަށުން، މިއަހަރު ނިމުމުގެ ކުރިން އެއާޕޯޓު ހަދައި މުޅިން ނިންމުމަށް ސަރުކާރުން އަމާޒުހިފާފައިވާިއިރު، އެ މަޝްރޫއަށްވަނީ 40.3 މިލިއަން ރުފިޔާ މިއަހަރު ބަޖެޓުކޮށްފައެވެ.