ސިޔާސީ ގޮތުން ބޮޑެތި ޚިޔާލު ތަފާތުވުންތަކެއް އުފެދިފައިވާ ޔޫކްރައިންގައި އެއްބައިވަންތަކަން ޤާއިމްކުރުމުގެ މަޝްވަރާތައް، ވެރިރަށް ކިއޭވްގައި އިފްތިތާޙު ކޮށްފިއެވެ.
މި މަޝްވަރާތައް އިފްތިތާޙުކޮށްދެއްވީ ޔޫކްރައިންގެ ވަގުތީ ރައީސް – އޮލެކްސޭންދްރަ ތުރުޝީނޯފްއެވެ. ޔޫކްރައިންގެ ޤައުމީ އެއްބައި ވަންތަކަމުގެ އިފްތިތާޙީ ބައްދަލުވުމުގައި، ސަރުކާރުގެ އޮފިޝަލުންނާ، ޤާނޫނުހަދާ މަޖިލީހުގެ މެމްބަރުންނާ، ކުރީގެ ލީޑަރުންގެ އިތުރުން ބައިނަލްއަޤްވާމީ ފެންވަރުގައި މެދުވެރިއެއްގެ ދައުރު އަދާކުރާ ފަރާތްތަކުން ބައިވެރިވެވަޑައިގެންނެވި ކަމަށް މަޢުލޫމާތު ލިބެއެވެ. ޔޫކްރައިންގެ އިރުމަތީ ސަރަޙައްދުތަކުގައި ހިންގަމުންދާ ހަމަނުޖެހުންތަކާ ކުރިމަތިލުންތައް ހޫނުވަމުންދާއިރު، ވަގުތީ ރައީސް ވަނީ، ޔޫކްރައިންގެ ކަމާ ބެހޭ ފަރާތްތަކުން މަޝްވަރާތަކަށް ތައްޔާރަށް އޮތްކަން ހާމަކުރައްވާފައެވެ.
ޔޫކްރައިންގައި ޤައުމީ ފެންވަރުގެ ސުލްޙަ ޤާއިމްކުރުމަށް ކުރިޔަށް ގެންދާ މަޝްވަރާތައް ދެން ކުރިޔަށް ގެންދިއުމަށް ހަމަޖެހިފައިވަނީ، ޔޫކްރައިން ސަރުކާރުން ވަކިވުމަށް ނިންމާފައިވަނާ ދޮންޔޭސްކްގައި، ހޮނިހިރުދުވަހުއެވެ.