ފ.މަގޫދޫގައި ސަރުކާރުން ބިނާކުރެއްވި މިސްކިތް ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ޤައްޔޫމް ހުޅުއްވައިދެއްވައިފިއެވެ.
މަގޫދޫ މިސްކިތް ރަސްމީގޮތުން ހުޅުއްވައިދެއްވާފައި ވަނީ މިއަދު މެންދުރު އެރަށުގައި ބޭއްވެވި ޚާއްސަ ރަސްމިޔާތެއްގައެވެ. މި މިސްކިތަކީ 500 އަށްވުރެ ގިނަ މީހުންގެ ޖާގައިގެ މިސްކިތެކެވެ. މި މިސްކިތުގެ ނަމަކީ "މަސްޖިދުއް ތަޤްވާ"އެވެ.
މި މިސްކިތް އިމާރާތްކުރެއްވުމަށް ދައުލަތުގެ ބަޖެޓުން 7.5 މިލިއަން ރުފިޔާ ޚަރަދުކުރައްވާފައިވެއެވެ. މަގޫދޫގައި މިއަދު ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ އޮފް ސްޓޭޓް ފޮރ އިސްލާމިކް އެފެއާރޒް އަލްއުސްޛާޒު އަލީ ވަޙީދު ވިދާޅުވީ، މަގޫދޫ މިސްކިތުގެ ބިންގާ 2011 ވަނަ އަހަރު އެޅުއްވި ނަމަވެސް، ތަފާތު އެކި ސަބަބުތަކާހުރެ މަސައްކަތް ނެފެށި ހުއްޓިފައިއޮއްވައި މި މިސްކިތުގެ މަސައްކަތް އަލުން ފަށްޓަވައި ނިންމެވީ ރައީސުލްޖުމްހޫރިއްޔާ ޢަބްދުﷲ ޔާމީންގެ ޒައާމަތުގައި ކަމަށް ވުމީ ރާއްޖޭގައި އިސްލާމީ ވަޙުދަތު ޤާއިމްކުރައްވަން އެމަނިކުފާނު ކުރައްވާ މަސައްކަތުގެ ހެއްކެއްކަމަށެވެ.
ރާއްޖޭގައި މިހާރުވެސް 27 މިސްކިތެއް ޢިމާރާތްކުރުމުގެ މަސައްކަތް ކުރިޔަށް ދާ ކަމަށް އިސްލާމިކް މިނިސްޓްރީން ވިދާޅުވެއެވެ. މީގެ ތެރޭގައި ސަޢުދީ ރަސްގެފާނުގެ ހިލޭ އެހީގެ ދަށުން ބިނާކުރައްވާ 10 މިސްކިތް ހިމެނެއެވެ. އަދި މީގެ އިތުރުން ދައުލަތުގެ ބަޖެޓުން ޚަރަދުކުރައްވައިގެން ޢިމާރާތްކުރައްވާ މިސްކިތްތަކާއި، ދީލަތި ފަރާތްތަކުގެ އެހީތެރިކަމާއެކު ބިނާކުރާ މިސްކިތްތައް ވެސް ހިމެނެއެވެ.