ހޭންޑް ބޯލް ކްލަބް ވޯލްޑް ޗެމްޕިއަންޝިޕް ވެޒްޕްރެމް ކާމިޔާބު ކޮށްފި

މިސްރުގައި ބޭއްވި 19 ވަަނަ އައި.އެޗް.އެފް. މެންސް ހޭންޑްބޯލް ކްލަބް ވޯލްޑް ޗެމްޕިއަންޝިޕް ހަންގޭރީގެ ވެޒްޕްރެމް އެޗްސީ ކާމިޔާބު ކޮށްފިއެވެ.

މިމުބާރާތުގެ ޗެމްޕިއަންކަން ވެޒްޕްރެމް ކާމިޔާބު ކޮށްފައިވަނީ ގާހިރާގެ ނިއު ކެޕިޓަލް ސްޕޯޓްސް ހޯލްފައި ކުޅުނު ފައިނަލް މެޗުގައި އެންމެ ފަހުގެ ޗެމްޕިއަން ސްޕެއިންގެ އެފްސީ ބާސެލޯނާ އާއި ބައްދަލުކޮށް 42 ލަނޑު 33 ލަނޑުން މެޗު ކާމިޔާބު ކޮށްގެންނެވެ. މިމެޗުގައި ފެށުނީއްސުރެ ނިމެންދެން ކުރީގައި އުޅުނީ ވެޒްޕްރެމްއެވެ. އަދި މިމެޗުގެ ފުރަތަމަ ހާފުގައި އެންމެ ބޮޑު ތަފާތަކަށް ވެގެންދިޔައީ މިސީޒަންގައި ބާސާއިން ވެޒްޕްރެމްއަށް ބަދަލުވި ކީޕަރ އެމީލް ނީލްސެންއެވެ. މިމެޗުގެ ފުރަތަމަ ހާފުގައި އޭނާ ވަނީ މޮޅު ކުޅުމެއް ދައްކާ ގިނަ ހަމަލާ ތަކެއް ދިފާއުކޮށްފައެވެ. ނަތީޖާ އަކަށް ވެގެންދިޔައީ ފުރަތަމަ ހާފު ނިމުނުއިރު ވެޒްޕްރެމްއިން 6 ލަނޑުގެ ލީޑެއް ނެގުމެވެ. މިއާއެކު ފުރަތަމަ ހާފު ނިމުނުއިރު ވެޒްޕްރެމް ކުރީގައި އުޅުނީ 22 ލަނޑު 16 ލަނޑުންނެވެ. މިހާފުގައި ބާސާއަށް އެންމެ ގާތް ކުރެވިފައިވަނީވެސް މެޗުގެ 25 ވަނަ މިނެޓްގައެވެ. އެއީ ދެ ލަނޑުގެ ތަފާތަކަށް ފަރަގު ކުޑަކުރުމެވެ.

މިމެޗުގެ ދެވަނަ ހާފުގައިވެސް ބާސާއަށް އެޓީމުގެ ކުޅުން ރަނގަޅު ކުރެވޭގޮތެއް ނުވިއެވެ. ނަތީޖާ އަކަށް ވެގެންދިޔައީ ވެޒްޕްރެމް އިން އެޓީމުގެ ނުރައްކާ ތެރި ހަމަލާތަކާއެކު ބާސާއަށް ނުރައްކާކޮށް ތަފާތު ބޮޑު ކުރުމެވެ. މިގޮތުން 39 މިނެޓްގެ ކުޅުން ނިމުނުއިރު ވެޒްޕްރެމް އިން ވަނީ މިމެޗުގައި 9 ލަނޑުގެ ލީޑެއް ނަގައިފައެވެ. އަދި އެލީޑު ދަމަހައްޓަމުން ގޮސް ވެޒްޕްރެމް އިން މިމެޗު ނިންމާލާ މިދިޔަ ސީޒަންގެ ފައިނަލްގައި ބާސާ އަތުން ބަލިވި ބަލިވުމުގެ ރަނގަޅު ބަދަލެއް ހޯދިއެވެ. އަދި މިކާމިޔާބީ ވަނީ ގިނަ ގޮތް ގޮތަކުން އާ ރިކޯޑްތަކެއްވެސް ހަދާފައިފައެވެ. މިގޮތުން މިއީ މިހާތަނަށް އެންމެ ތަފާތު ބޮޑުކޮށް ފައިނަލް މެޗެއް ނިމިގެންދިޔަ ފަހަރެވެ. ހަމައެއާއެކު ފައިނަލް މެޗުގައި ޓީމަކުން އެންމެ ގިނަ ލަނޑުވެސް ޖެހި ފަހަރަށް ވެގެން ގޮސްފައެވެ. އެއީ 42 ލަނޑާއެކުއެވެ. މީގެކުރިން މިރިކޯޑް އޮންނަނީ 2022 ވަނަ އަހަރުގެ ފައިނަލްގައި އޯވަރ ޓައިމް ކުޅެ 41 ލަނޑު 39 ލަނޑުން ބާސާ ބަލި ކުރި މަގްޑެބަރގް އަތުގައެވެ.

މިއީ މިމުބާރާތުގެ ތަށި ވެޒްޕްރެމް އިން ކާމިޔާބު ކުރި ދެވަނަ ފަހަރެވެ. އަދި މިއީ ފައިނަލްގައި 9 ފަހަރު ވާދަކުރި ބާސާ ބަލިވި ތިންވަނަ ފައިނަލެވެ. މިމުބާރާތުގެ ތިންވަނަ މަގާމް ހާސިލް ކޮށްފައިވަނީ ޒަމާލެކް ކްލަބް ބަލިކޮށް އަލް އަހްލީ އެސްސީއެވެ. މިމުބާރާތުގެ މޮޅު ކުޅުންތެރިޔަކަށް ހޮވިފައިވަނީ ވެޒްޕްރެމްގެ އެމީލް ނީލްސަންއެވެ. އަދި އެންމެ ގިނަ ލަނޑު ޖެހި ކުޅުންތެރިޔަކަށް ހޮވުނީ ވެޒްޕްރެމްގެ ހޫގޯ ޑެސްކާއެވެ. މިއީ އޭނާ މިމަގާމް ޖެހިޖެހިގެން ހޯދި ދެވަނަ ފަހަރެވެ. ހަމަ އެއާއެކު އެންމެ މޮޅު ކީޕަރަށް ހޮވިފައިވަނީ ބާސާގެ ސަރްގެއި ހެނާންޑޭޒްއެވެ.