ތެލުގެ އަގު އުފުލުމާއި، މޫސުމީ ބަދަލުތަކުގެ ނޭދެވޭ އަސަރުތަކުގެ އިތުރުން ދަރަނީގެ ބުރަ ބޮޑުވުމުގެ ސަބަބުން، ތަރައްޤީވަމުން އަންނަ ޤައުމުތަކަށް މާލީ ގޮތުން ބޮޑެތި ގޮންޖެހުންތަކަކާ ކުރިމަތިލާން ޖެހިއްޖެއެވެ.
މެދުއިރުމަތީގެ ހަމަނުޖެހުންތަކާ ގުޅިގެން ދުނިޔޭގެ ބާޒާރުގައި ތެލުގެ އަގު މައްޗަށް ދިއުމާއި، "ސުޕަރ އެލް ނީނޯ" ގެ ސަބަބުން ކުރިމަތިވާ މޫސުމީ ގެއްލުންތަކުގެ އިތުރުން، ދަރަނީގެ އިންޓްރެސްޓް ރޭޓްތައް އުފުލުމަކީ ތަރައްޤީވަމުން އަންނަ ޤައުމުތަކުގެ މާލީ ހާލަތު އިންތިހާއަށް ދަށަށްދާނެ ކަމެއް ކަމުގެ އިންޒާރު އދ. ގެ ތަރައްޤީއާ ބެހޭ ޕްރޮގްރާމް (ޔޫއެންޑީޕީ) އިން ވަނީ ދީފައެވެ.
ޔޫއެންޑީޕީގެ އެޑްމިނިސްޓްރޭޓަރު އަލެކްސެންޑަރ ދެ ކްރޫ ފާހަގަކުރެއްވި ގޮތުގައި، މިހާރު ފެންނަމުންދާ ހާލަތަކީ ކޮވިޑް-19 ގެ ބަލިމަޑުކަމުގެ ތެރޭގައި ޖީ20 ގެ ޤައުމުތަކުން އެންމެ ފަޤީރު ޤައުމުތަކުގެ ދަރަނި ފަސްކޮށްދޭން ޖެހުނު ހާލަތާ ދާދި އެއްގޮތް ހާލަތެކެވެ. މީގެއިތުރުން، މިކަމުގެ ސަބަބުން އެއް ޤައުމަށްފަހު އަނެއް ޤައުމު މާލީ ގޮތުން އިނދަޖެހިގެންދާނެ "ޑޮމިނޯ އެފެކްޓެއް" އުފެދުމުގެ ފުރުޞަތު ބޮޑުކަމަށްވެސް އޭނާ ވިދާޅުވިއެވެ.
މި އޮކްޓޫބަރު މަހުގެ 12 އިން 18 އަށް ތައިލެންޑުގެ ބެންކޮކްގައި ބޭއްވުމަށް ހަމަޖެހިފައިވާ އިންޓަނޭޝަނަލް މޮނިޓަރީ ފަންޑު (އައިއެމްއެފް) އަދި ވޯލްޑް ބޭންކުގެ އަހަރީ ބައްދަލުވުމުގައި މި މައްސަލައާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ވަނީ ނިންމާފައެވެ.
ޔޫއެންޑީޕީގެ ދިރާސާތަކުން ދައްކާ ގޮތުގައި، މެދުއިރުމަތީގައި ހިނގަމުންދާ ހަނގުރާމައިގެ ނޭދެވޭ އަސަރުތައް މިހާރު ވަނީ އެ ސަރަޙައްދުގެ އިމުން ބޭރުވެ، މުޅި ދުނިޔޭގެ 100 އަށްވުރެ ގިނަ ޤައުމަކަށް ސީދާ ގޮތެއްގައި ފޯރާފައެވެ. މީގެ އިތުރުން، 1950 ގެ އަހަރުތަކަށްފަހު ކުރިމަތިވި އެންމެ ނުރައްކާތެރި "އެލް ނީނޯ" މޫސުމީ ބަދަލުތަކުގެ ސަބަބުން، 2027 ވަނަ އަހަރުގެ ނިޔަލަށް އިތުރު 49 މިލިއަން މީހުން ކާބޯތަކެއްޗަށް ޖެހުމުގެ ބިރު ބޮޑުވެފައިވާ ކަމަށްވެސް އެ ޖަމްޢިއްޔާއިން ހާމަކުރެއެވެ.
ޔޫއެންޑީޕީގެ ޗީފް އިކޮނޮމިސްޓް ޖޯޖް ގްރޭ މޮލީނާ ވިދާޅުވި ގޮތުގައި، ސެޕްޓެމްބަރު މަހުގެ ތެރޭގައި ގިނަ ޤައުމުތަކުން ވަނީ ތެލާއި ކާބޯތަކެތީގެ އަގުތައް ހިފެހެއްޓުމަށް ދެމުންދިޔަ ސަބްސިޑީތަކާއި ލުއިތައް ކަނޑާލަން ފަށާފައެވެ. މި ބަދަލާއެކު ތަކެތީގެ އަގު އިންތިހާއަށް އުފުލި، ރައްޔިތުންގެ ކަންބޮޑުވުންތައް އިތުރުވެގެން ދިޔައެވެ.
ހަމައެކަނި ސެޕްޓެމްބަރު މަހުގެ ތެރޭގައި ވެސް 10 ޤައުމެއްގައި އާންމުން މަގުމައްޗަށް ނުކުމެ މުޒާހަރާކުރުމުގެ ސަބަބުން އިޖުތިމާޢީ ނުތަނަވަސްކަން ވަނީ އުފެދިފައެވެ. މި ދިރާސާގައި ހިމެނުނު 26 ޤައުމުގެ ތެރެއިން އެއްވެސް ޤައުމަކަށް މި ހާލަތުން ސަލާމަތްވެވިފައި ނުވާއިރު، އެ ޤައުމުތަކުން ލަފާކުރަނީ މި ކަމުގެ އެންމެ ދަތި އަދި ގޯސް ހާލަތާ ކުރިމަތިލާން ޖެހޭނީ ކުރިއަށް އޮތް ދުވަސްތަކުގައި ކަމަށެވެ.