މޫސުމަށް އަންނަ ބަދަލުތަކުގެ ސަބަބުން ކުރިމަތިވާ ގޮންޖެހުންތަކާއި، ދަތުރުފަތުރާއި މުދާ އުފުލުމުގެ ނިޒާމަށް ދިމާވެފައިވާ ހުރަސްތަކާ ހެދި، ދަނޑުވެރިކަމުގެ ބާޒާރަށް ބޮޑެތި ލޮޅުންތަކެއް އަރައިފިއެވެ.
މިގޮތުން، ވޭތުވެދިޔަ ގާތްގަނޑަކަށް ހަތަރު އަހަރު ދުވަހުގެ ތެރޭގައި ވެސް މައްޗަށް ނުދާ މިންވަރަށް މިދިޔަ ސެޕްޓެމްބަރު މަހު ދުނިޔޭގެ ކާބޯތަކެތީގެ އަގުތައް އުފުލިފައިވާ ކަމަށް އދގެ ކާބޯތަކެއްޗާއި ދަނޑުވެރިކަމާބެހޭ އިދާރާ، ފުޑް އެންޑް އެގްރިކަލްޗަރ އޯގަނައިޒޭޝަން (އެފްއޭއޯ) އިން ވަނީ ހާމަކޮށްފައެވެ.
ބާރުގަދަ 'އެލްނީނޯ' މޫސުމީ ކާރިސާގެ ނުރައްކާ އޮތުމާއެކު، ބައިނަލްއަޤުވާމީ ބާޒާރުގައި ހަކުރުގެ އަގު ވަނީ ފާއިތުވި 18 މަސްދުވަހުގެ ތެރޭގައި ރެކޯޑު މިންވަރަކަށް އުފުލިފައެވެ. މީގެއިތުރުން، ހަނގުރާމައިގެ ސަބަބުން ކަޅުކަނޑުގެ ވިޔަފާރި ދަތުރުފަތުރަށް ބުރޫއެރުމާ ގުޅިގެން، ވޭތުވެދިޔަ ތިން އަހަރު ދުވަހުގެ ތެރޭގައި ވެސް ގޮަދަނުގެ އަގު ނުއުފުލޭ މިންވަރަށް މިދިޔަ މަހުގެ ކުރީކޮޅު ވަނީ މައްޗަށް ގޮސްފައެވެ.
ދުނިޔޭގެ ބާޒާރުގައި ކާބޯތަކެތީގެ އަގުތަކަށް އަންނަ ބަދަލުތައް މިންކުރާ 'އެފްއޭއޯ ފުޑް ޕްރައިސް އިންޑެކްސް' ސެޕްޓެމްބަރު މަހު ހުރީ އެވްރެޖުކޮށް 136.0 ޕޮއިންޓުގައެވެ. މިއީ އޯގަސްޓް މަހު ހުރި 134.0 ޕޮއިންޓަށް ވުރެ އިތުރު ޢަދަދެއް ކަމަށްވާއިރު، މިއީ 2022 ވަނަ އަހަރުގެ ނޮވެމްބަރު މަހަށް ފަހު މި އިންޑެކްސް މިހާ މައްޗަށް ދިޔަ ފުރަތަމަ ފަހަރެވެ.
މިދިޔަ މަހު ގޮވާމާއި ހަކުރުގެ އިތުރުން ކައްކާ ތެލުގެ އަގުތައް އުފުލުނު ނަމަވެސް، މަހާއި ކިރުގެ ބާވަތްތަކުގެ އަގުތަކަށް ވަނީ ކޮންމެވެސް ވަރެއްގެ ދަށްވުމެއް އައިސްފައެވެ.
މިކަމާ ގުޅޭގޮތުން އެފްއޭއޯގެ ޗީފް އިކޮނޮމިސްޓް މެކްސިމޯ ތޮރޭރޯ ފާހަގަކުރެއްވި ގޮތުގައި، ހުރްމުޒް ކަނޑުއޮޅިއާއި ކަޅުކަނޑުގެ ދަތުރުފަތުރަށް ކުރިމަތިވެފައިވާ ހުރަސްތަކާއި މޫސުމީ ގޮންޖެހުންތަކުގެ ސަބަބުން، ހަކަތައާއި ދަތުރުފަތުރުގެ އިތުރުން އަސާސީ ކާބޯތަކެތީގެ އަގުތައް ދަނީ އުފުލެމުންނެވެ. އަދި މިއީ ދުނިޔޭގެ ބާޒާރުގައި މުދަލުގެ އަގުތައް ދެމެހެއްޓެނިވި ގޮތެއްގައި އަދި ފުޅާ ދާއިރާއެއްގައި މައްޗަށް ދާނެ ކަމުގެ ނިޝާނެއް ކަމަށް ވެސް އޭނާ ވިދާޅުވިއެވެ.
"މި ޙާލަތު މިގޮތަށް ދެމިއޮވެއްޖެނަމަ، ޚާއްސަކޮށް ކާބޯތަކެއްޗާއި ހަކަތަ އިމްޕޯޓްކުރުމަށް ބަރޯސާވާ ޤައުމުތަކުގައި، އާންމު ރައްޔިތުން ގަންނަން ލިބޭ ކާބޯތަކެތީގެ އަގުތައް އުފުލުމަކީ ދާދި އަވަހަށް ހިނގާނެ ކަމެއް،" އޭނާ ނެރުއްވި ބަޔާނުގައި ވިދާޅުވެފައިވެއެވެ.
މީގެއިތުރުން އެފްއޭއޯގެ ރިޕޯޓުގައި ބަޔާންކޮށްފައިވާ ގޮތުގައި، 2026 ވަނަ އަހަރު ދުނިޔޭގައި ގޮވާން އުފައްދާނެ ކަމަށް ލަފާކުރެވޭ މިންވަރު ބޮޑު ބަދަލެއް ނައިސް 2.979 ބިލިއަން މެޓްރިކް ޓަނުގައި ހިފެހެއްޓޭނެއެވެ. މިއީ އޭގެ ކުރީ އަހަރުގެ އެންމެ މަތީ ރެކޯޑަށް ވުރެ 2.1 އިންސައްތަ ދަށް ޢަދަދެއް ނަމަވެސް، މިއީ ތާރީޚުގައި ވެސް ދެވަނައަށް އެންމެ ގިނައިން ގޮވާން އުފައްދާނެ އަހަރެވެ.
ނަމަވެސް، ކަޅުކަނޑުން ދަތުރުފަތުރު ކުރުމުގައި ހުރި ދަތިތަކާ ހެދި ގޮދަނާއި ޒުވާރި އެކްސްޕޯޓް ކުރެވޭނެ މިންވަރު ވަނީ ދަށްވެފައެވެ. މި ސަބަބާ ހުރެ، މި އަހަރާއި އަންނަ އަހަރުގެ ތެރޭގައި ދުނިޔޭގެ ގޮވާމުގެ ވިޔަފާރި ކުރިއަށްދާނެ ކަމަށް ލަފާކުރި މިންވަރު ވަނީ ސެޕްޓެމްބަރު މަހުގެ އަންދާޒާއާ އަޅާބަލާއިރު 0.7 އިންސައްތަ ދަށްކޮށްފައެވެ.