އީރާނާ ދެކޮޅަށް އެމެރިކާއިން ފަށާފައިވާ ޣައިރުޤާނޫނީ ހަނގުރާމައަށް އަށް މަސް ފުރެންދާއިރު، އީރާނުގެ ކަނޑުގެ ސަރަހައްދަށް އެމެރިކާއިން އަސްކަރީ މަތިންދާބޯޓު އުފުލާ ތިންވަނަ މަނަވަރެއް ފޮނުވާފައިވާ ކަން ހާމަކޮށްފިއެވެ. އެމެރިކާގެ މަޞްދަރަކުން ބުނީ، މެދުއިރުމައްޗަށް ދަތުރުކުރުމަށް އަސްކަރީ މަތިންދާބޯޓު 'ޔޫއެސްއެސް ތިއޮޑޯ ރޫޒެވެލްޓް' އާއެކު 2,000 އަށްވުރެ ގިނަ ސިފައިން ފުރާފައިވާ ކަމުގައެވެ. މިއާއެކު، ނޮވެންބަރު މަހުގެ ނިޔަލަށް އެ ސަރަޙައްދުގައި އެމެރިކާގެ އަސްކަރީ މަތިންދާބޯޓު އުފުލާ ތިން މަނަވަރު ހަރަކާތްތެރިވާނެއެވެ. މީގެ ސަބަބުން، އީރާނާ ދެކޮޅަށް ކުރަމުންދާ ހަނގުރާމަ އިތުރަށް ފުޅާކުރުމުގެ ފުރުޞަތު ރައީސް ޑޮނަލްޑް ޓްރަމްޕަށް ލިބިވަޑައިގަންނަވާނެ ކަމުގައި ވެސް އެމެރިކާގެ އޮފިޝަލު ވިދާޅުވިއެވެ.
އެ ސަރަޙައްދުގައި މިހާރު ވެސް ތިބި 50،000 ސިފައިންގެ އިތުރުން، އެފް-35 މަރުކާގެ އަސްކަރީ މަތިންދާބޯޓުތަކާއި އެތައް ހާސް ސިފައިން އަލަށް ފޮނުވާ ފައުޖުގައި ހިމެނެއެވެ. އެމެރިކާގެ ދިފާޢީ ވަޒީރު ޕީޓް ހެގްސެތު ވިދާޅުވީ، ޓްރަމްޕް ޢަމުރުކުރައްވައިފިނަމަ ހަމަލާތައް ފުޅާކޮށް ވަރުގަދަކުރުމަށް ފައުޖުތައް އޮތީ ތައްޔާރަށް ކަމުގައެވެ. އަދި، އަސްކަރީ ފިޔަވަޅުތަކުގެ އިތުރުން، އެމެރިކާއިން ވަނީ އީރާނުގެ ރޭލާއި އެއްގަމު އުޅަނދު އުފައްދާ ކުންފުނިތަކަށް އަމާޒުކޮށް އިޤުތިޞާދީ ދަތިކުރުމުގެ އައު ފިޔަވަޅުތަކެއް ވެސް އަޅައިފައެވެ.
ހަނގުރާމަ ހޫނުވަމުންދާއިރު، ޤަޠަރު މެދުވެރިކޮށް އީރާނުން ވަނީ ހަތް ދުވަހުގެ މަގުޗާޓެއް އެމެރިކާއަށް ހުށަހަޅާފައެވެ. އެއީ، އެމެރިކާގެ ކަނޑުގެ ޙިޞާރު ނިމުމަކަށް ގެނައުމަށާއި، ލުބްނާނާއި ޔަމަނުގައި ހަނގުރާމަ ހުއްޓާލުމުގެ ބަދަލުގައި، ހުރްމުޒް ކަނޑުއޮޅި ހުޅުވާލައި ނިއުކްލިޔަރ ވާހަކަތައް އަލުން ފެށުމަށް ހުށަހަޅާފައިވާ ހުށަހެޅުމެކެވެ. ނަމަވެސް، ޓްރަމްޕް ވަނީ މި ހުށަހެޅުމަށް އިންކާރު ކުރައްވާފައެވެ. އެމެރިކާއިން އެކުވެރި ދައުލަތްތަކަށް (އދ) ކަނޑައަޅާފައިވާ ސަފީރު މައިކް ވޮލްޓްޒް ވިދާޅުވީ، އދގެ ސަލާމަތީ މަޖިލީހުގެ ނިންމުންތަކާ ޚިލާފަށް ނިއުކްލިޔަރ ޕުރޮގުރާމަކަށް ދޫދިނުމަކީ ވާހަކަދެއްކޭނެ ކަމެއް ނޫން ކަމުގައެވެ.
އީރާނުގެ ޚާރިޖީ ވަޒީރު ޢައްބާސް ޢިރާޤިޖީ ވިދާޅުވީ، އީރާނުން އޮތީ ހަނގުރާމައަށް ފުރިހަމައަށް ތައްޔާރުވެގެން ކަމަށާއި، ނަމަވެސް އެ ޤައުމުން އެދެނީ ޞުލްޙަ ޤާއިމުކުރުމަށް ކަމުގައެވެ. މި ދަނޑިވަޅުގައި، ޓްރަމްޕް ފަށްޓަވާފައިވާ ހަނގުރާމައާ އެމެރިކާގެ ޢާންމު ރައްޔިތުންގެ %70 މީހުން ދެކޮޅުކަން، ޚިޔާލު ހޯދުމުގެ ސާވޭއަކުން ވަނީ ހާމަވެފައެވެ. ނަމަވެސް، ކުރިއަށް އޮތް މިޑްޓަރމް އިންތިޚާބާ ދިމާކޮށް ސިޔާސީ މަސްރަޙު ނުތަނަވަސްވެފައިވާއިރުވެސް، ޓްރަމްޕް ގެންދަވަނީ މި ހަނގުރާމަ ވަރަށް އަވަހަށް ކާމިޔާބު ކުރައްވާނެ ކަމުގައި ވިދާޅުވަމުންނެވެ.