"ހުރިހާ ރަށެއްގައި ފުލުހުންގެ މަރުކަޒު: ކުށުގެ ވެށި އުފެދުމުގެ ކުރިން ހައްލު"

އާބާދީއަށް ނުވަތަ ކުށުގެ މާހައުލަށް ބެލުމެއް ނެތި ދިވެހިރާއްޖޭގެ ހުރިހާ ރަށެއްގައި ފުލުހުންގެ މަރުކަޒު ގާއިމުކުރަނީ އެ ރަށްރަށުގައި ކުށުގެ ވެށި އުފެދުމުގެ ކުރިން ހައްލުތައް ހޯދައި، އަމާން މާހައުލެއް ގާއިމުކުރުމަށް ކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިޙްސާން ވިދާޅުވެއްޖެއެވެ.

ވަޒީރު މިހެން ވިދާޅުވީ އދ. ކުނބުރުދޫގައި އަލަށް ގާއިމުކުރި ފުލުހުންގެ މަރުކަޒު ހުޅުއްވައިދެއްވައި ވާހަކަދައްކަވަމުންނެވެ. މި ރަސްމިއްޔާތުގައި ވަޒީރު ވަނީ އެ ރަށުގައި ގާއިމުކުރި ފުލުހުންގެ މަރުކަޒާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ޚިދުމަތެއް ފުލުހުންގެ ފަރާތުން ފެނިގެންދާނެ ކަމަށް އުންމީދުކުރައްވާ ކަމަށް ވިދާޅުވެފައެވެ.

ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ރާއްޖޭގެ 63 ރަށެއްގައި ފުލުހުން ގާއިމުވެތިބެ ޚިދުމަތް ދެމުން ނުދާ ކަމަށެވެ. އަދި ގިނަ ރަށްރަށުގައި ފުލުހުން ޚިދުމަތް ދެމުން އައީ ކައުންސިލް އިދާރާތަކާއި އަމިއްލަ ތަންތަން ކުއްޔަށް ހިފައިގެން ކަމަށާއި މީގެ ސަބަބުން ޚިދުމަތް ދިނުމުގައި ދަތިތަކާ ދިމާވި ކަމަށްވެސް ވިދާޅުވިއެވެ.

ވަޒީރު ވިދާޅުވީ ރައީސް ޑރ. މުޢިއްޒު ވެރިކަމާ ހަވާލުވެވަޑައިގެން އެ ރަށްރަށުގައި ފުލުހުން ގާއިމުވެތިބެ ޚިދުމަތް ދޭން ފައްޓަވައި 154 ރަށެއްގައި ފުލުހުންގެ އަމިއްލަ މަރުކަޒުތައް އެޅުމުގެ މަސައްކަތް ފެއްޓެވި ކަމަށެވެ. އަދި ކުނބުރުދޫ ފަދަ އާބާދީ ކުޑަ އަދި ކުށް މަދު ރަށްރަށުގައި ވެސް ފުލުހުންގެ ޚާއްސަ މަރުކަޒުތައް ގާއިމުކުރަން ސަރުކާރުން ނިންމެވީ ކުށުގެ ވެއްޓެއް އުފެދުމުގެ ކުރިން އަޅަންޖެހޭ ފިޔަވަޅުތައް އަޅައި އަމާން ވެއްޓެއް ދެމެހެއްޓުމަށް ކަމަށް ވިދާޅުވިއެވެ.

"ރަށުގައި މާ ބައިވަރު އަދި ކުށްތަކެއް ނުހިނގި ކަމުގައިވިޔަސް، މިފަދަ މަރުކަޒެއް ހުރެގެން ރަށުގެ ރައްޔިތުންނާއި ރަށުގެ އެކިއެކި މުއައްސަސާތަކާ ގުޅިގެން ފުލުހުން ކުރަމުންދާ ކޮމިއުނިޓީ ބޭސްޑް މަސައްކަތްތަކަކީ ރަށުގެ ކުށުގެ މާހައުލު ނެތި މި އޮންނަ އަމާން ވެށި ދެމެހެއްޓުމަށްޓަކައި ކޮންމެހެން ކުރަންޖެހޭ ކަމެއް،" ވަޒީރު އަލީ އިޙްސާން ވިދާޅުވިއެވެ.

ދާޙިލީ ވަޒީރު ވަނީ ޤައުމީ ފެންވަރުގައި ފުލުހުންގެ ޚިދުމަތުން ޚާއްސަ އިސްކަން ދޭންޖެހޭ ކަންކަންވެސް މި ރަސްމިއްޔާތުގައި ތަކުރާރު ކުރައްވާފައެވެ. އެގޮތުން މަސްތުވާތަކެތީގެ މާހައުލު ނައްތާލުމަށާއި ގޭންގު ކުށްތައް ހުއްޓުވުމަށާއި ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމުގެ އިތުރުން ކުޑަކުދިން ކުށުގެ ވެށިން ރައްކާތެރިކުރުމަށް ޚާއްސަ އިސްކަމެއް ދެއްވުމަށް ވަޒީރު އެދިވަޑައިގެންނެވިއެވެ.

މީގެ އިތުރުން އެކި ރަށްރަށުގައި ގާއިމުކުރާ އައު މަރުކަޒުތަކާއެކު ރައްޔިތުންނާ ގާތުން، ރައްޔިތުންގެ އިތުބާރު ލިބޭ ފަދަ ފުރިހަމަ ޚިދުމަތެއް ފުލުހުންގެ ފަރާތުން ފެންނާނެ ކަމަށް އުންމީދުކުރައްވާ ކަމަށްވެސް ވަޒީރު އަލީ އިޙްސާން ވިދާޅުވިއެވެ.