މަޝްހޫރު ލަވަކިޔުންތެރިޔާ އާޝާ ބޯސްލޭ، 12 އެޕްރީލް، އާދީއްތަ ދުވަހު މުމްބާއިގެ ހޮސްޕިޓަލެއްގައި ނިޔާވެއްޖެއެވެ. ނިޔާވީއިރު އުމުރަކީ 92 އަހަރެވެ.
މެޔަށް ޖެހުނު އިންފެކްޝަނަކާއި ވަރުބަލިކަމުގެ ސަބަބުން، މުމްބާއީގެ ބްރީޗް ކޭންޑީ ޕްރައިވެޓް ހޮސްޕިޓަލުގައި އާޝާ އެޑްމިޓްކޮށްފައިވަނީ 11 އޭޕްރީލް، ހޮނިހިރު ދުވަހުގެ ހަވީރުގެ ވަގުތެއްގައެވެ. ހޮސްޕިޓަލުން މަޢުލޫމާތު ދީފައިވާ ގޮތުގައި، އޭނާ އަވަހާރަވީ ހިތް ހުއްޓުމާއި ފުއްޕާމޭގެ ބަލިތަކާ ގުޅިގެން ކުރިމަތިވި ސިއްޙީ މައްސަލަތަކެއްގައެވެ.
އާޝާ ބޯސްލޭ އަކީ އިންޑިއާގެ ލަވަކިޔުމުގެ ދާއިރާގައި ފާހަގަކޮށްލެވޭ، 70 އަހަރަށްވުރެ ދިގު މާޒީއެއް އޮތް މަޝްހޫރު ލަވަކިޔުންތެރިއެކެވެ. އޭނާގެ ކެރިއަރު ފެށިގެން އައީ ދައްތަ ލަތާ މަންގޭޝްކަރުގެ ހިޔަނިދަށުން ކަމަށްވީ ނަމަވެސް، އަމިއްލަ ވަކި ހުނަރަކާއި ޖޯޝުން ފުރިގެންވާ ތަފާތު އަޑަކުން އޭނާ ވަނީ ލަވަކިޔުމުގެ ދުނިޔޭގައި އަމިއްލަ ނަމެއް ބިނާކޮށްފައެވެ.
އާޝާ ބޯސްލޭގެ އެންމެ ފާހަގަކޮށްލެވޭ ސިފައަކީ، މިއުޒިކުގެ ތަފާތު އެކި ގިންތިތަކުގެ ލަވަތައް އެއްވެސް އުނދަގުލަކާ ނުލައި ކިޔައިދިނުމުގެ ގާބިލުކަމެވެ. ލޯބީގެ މަޑުމައިތިރި ރާގުތަކުން ފެށިގެން، ހަލުވި ކެބަރޭ ލަވަތަކާއި، ގަޒަލްތަކާއި އަދި ޕޮޕް މިއުޒިކުގައި ވެސް އޭނާ ވަނީ އާދަޔާ ހިލާފު ކާމިޔާބީތަކެއް ހޯދާފައެވެ. އޯ.ޕީ ނައްޔަރު ފަދަ މިއުޒިކް ޑައިރެކްޓަރުންނާއެކު ކުރި މަސައްކަތުން "އާއޯ ހުޒޫރު ތުމްކޯ" ފަދަ އަބަދަށް ފެހި ލަވަތަކެއް އުފަންވިއިރު، އާރް.ޑީ ބަރްމަން އާއެކު އުފެއްދި "ޗުރާ ލިޔާ ހޭ ތުމްނޭ ޖޯ ދިލް ކޯ" ފަދަ ލަވަތަކަކީ މިއަދުވެސް މަގުބޫލުކަން ނުކެނޑޭ އުފެއްދުންތަކެކެވެ.
1960 އާއި 1970 ގެ އަހަރުތަކުގައި "ޕިޔާ ތޫ އަބް ތޯ އާޖާ" އަދި "ޔޭ މޭރާ ދިލް" ފަދަ ލަވަތަކުން ހިންދީ ސިނަމާގެ މިއުޒިކަށް އައު ދިރުމަކާއި ޖޯޝެއް އޭނާ ގެނެސްދިނެވެ. ހަމައެއާއެކު، "އިން އާންކޯން ކީ މަސްތީ" އަދި "ދިލް ޗީޒް ކިޔާ ހޭ" ފަދަ ކްލެސިކަލް ލަވަތަކުން އޭނާގެ އަޑުގެ ފުންކަމާއި، ގަދީމީ މިއުޒިކަށް ހުރި ކުޅަދާނަކަން ވަނީ ސާބިތުކޮށްދީފައެވެ.
1990 އާއި 2000 ގެ ކުރީކޮޅު، އާޝާ ބޯސްލޭ ވަނީ ޒަމާނާ އެއްގޮތަށް އޭނާގެ ކެރިއަރު އަނެއްކާވެސް އާކޮށްލާފައެވެ. އޭ.އާރް ރަހްމާން އާއެކު މަސައްކަތްކޮށް "ތަންހާ ތަންހާ" އަދި "ރަންގީލާ ރޭ" ފަދަ ޒަމާނީ ލަވަތަކުން އާ ޖީލެއްގެ މަގުބޫލުކަން ހޯދިއެވެ. އަދި "ކަބީ ތޯ ނަޒަރު މިލާއޯ" ފަދަ އިންޑިޕޮޕް ލަވަތަކާއެކު، ބަދަލުވަމުންދާ ޒަމާނާއެކުވެސް އޭނާގެ މިއުޒިކަކީ އަބަދުވެސް އަގުހުރި އެއްޗެއްކަން ދައްކުވައިދިނެވެ.
އާޝާ ބޯސްލޭގެ މިއުޒިކީ ހިދުމަތްތަކުގެ އަގުވަޒަންކުރުމުގެ ގޮތުން، އިންޑިއާގެ އެންމެ ޝަރަފުވެރި އެވޯޑުތައް ކަމަށްވާ "ދާދާސާހެބް ޕާލްކޭ އެވޯޑް" އަދި "ޕަދްމަ ވިބޫޝަން" ފަދަ މަތިވެރި ޝަރަފުތައް އޭނާއަށް ވަނީ އަރުވާފައެވެ.