ބީއެމްއެލް ކުޑަހުވަދޫ ބުރާންޗުގެ އައު އިމާރާތް ހުޅުވައިފި

ބޭންކް އޮފް މޯލްޑިވްސް، ބީއެމްއެލްގެ ދ. ކުޑަހުވަދޫ ބުރާންޗުގެ އައު އިމާރާތް ހުޅުުވައި ޚިދުމަތްދޭން ފަށައިފިއެވެ.

ކުޑަހުވަދޫގައި ބޭއްވި ޚާއްސަ ރަސްމިއްޔާތެއްގައި ބްރާންޗަށް އިތުރުކުރި އިމާރާތް ރަސްމީކޮށް ހުޅުއްވައިދެއްވީ މާލީ ކަންކަމާއި ތަރައްްގީގެ ރޭވުންތެރިކަމާ ބެހޭ ވަޒީރު މޫސާ ޒަމީރުއެވެ. މި ރަސްމިއްޔާތުގައި ބޭންކުގެ އިސްވެރިންނާއި، އަތޮޅު ކައުންސިލް މެންބަރުގެ އިތުރުން އެރަށު ކައުންސިލްގެ މެންބަރުންނާއި ރައްޔިތުން ވަނީ ބައިވެރިވެފައެވެ.

މި ރަސްމިއްޔާތު ޝަރަފްވެރިކޮށްދެއްވާ ވާހަކަފުޅުދައްކަވަމުން މާލީ ވަޒީރު މޫސާ ޒަމީރު ވިދާޅުވީ، ރައްޔިތުންނަށް އެމީހަކު ދިރިއުޅޭ ރަށެއްގައި ތިބެގެން ގިނަ ޚިދުމަތްތަކެއް ލިބޭނެ މަގު ފަހިކޮށްދިނުމަކީ ރައީސުލްޖުމްހޫރިއްޔާ ވަރަށް ބޮޑު އިސްކަމެއް ދެއްވާ ކަމެއް ކަމުގައެވެ. މީގެ އިތުރުން، ކުޑަހުވަދޫއަކީ އާބާދީ ބޮޑު ރަށަކަށް ވާއިރު، ހާއްސަކޮށް އަތޮޅު ވެރިކަން ކުރާ ރަށަށް ވާއިރު، މި ބްރާންޗުގެ ސަބަބުން ރަށުގެ ރައްޔިތުންނަށް ބޮޑެތި ފަސޭހަތަކެއް ލިބިގެންދާނެކަން ވަޒީރު ފާހަގަކުރެއްވިއެވެ.

ބީއެމްއެލުން ވިދާޅުވީ، ކުޑަހުވަދޫގައި ޤާއިމްކޮށްފައިވާ ބީއެމްއެލް ބްރާންޗުގެ އައު އިމާރާތް "ޕޭޕަރ ލެސް" ނުވަތަ ޑިޖިޓަލް ބޭންކިންގ ނިޒާމު ހިމެނޭ ބްރާންޗެއް ކަމަށެވެ. އަދި މި ބްރާންޗުން އިސްލާމީ ޝަރީއަތާ އެއްގޮތަށް އަމިއްލަ ފަރުދުންނާއި ވިޔަފާރިތަކަށް ބޭންކިންގެ ޚިދުމަތްތައް ފޯރުކޮށްދޭނެ ކަމަށްވެސް ބީއެމްއެލުން މައުލޫމާތުދެއެވެ.

ރަސްމީ ގަޑިތަކުގައި އެކައުންޓް ހުޅުވުމާއި، ލޯނު ދޫކުރުމުގެ މަސައްކަތްތަކުގެ އިތުރުން ކާޑުގެ ޚިދުމަތްތައްވެސް މި ބްރާންޗުން ލިބިގެންދާނެ ކަމަށް ބީއެމްއެލުން މައުލޫމާތުދެއެވެ. އަދި އަތޮޅުތަކުގައި ޤާއިމްކޮށްފައިވާ ބްރާންޗުތަކެކޭ އެއްގޮތަށް ކުޑަހުވަދޫ ބްރާންޗުންވެސް 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން، ބިލްތަކަށް ފައިސާ ދެއްކުމާއި ޓްރާންސްފަރ ކުރުމުގެ ޚިދުމަތްވެސް ފޯރުކޮށްދޭނެ ކަމަށް އެ ބޭންކުން ވިދާޅުވެއެވެ.

ކުޑަހުވަދޫގައި މި ހުޅުވާފައިވާ ބުރާންޗުގެ އައު އިމާރާތުން މުޅި ރާއްޖެ ހިމެނޭ ބީއެމްއެލް ބޭންކިންގެ ވިއުގަ މިވަނީ ފުޅާވެފައެވެ. އެގޮތުން 20 އަތޮޅެއްގައި 43 ބްރާންޗް، ސެލްފްސަރވިސް ބޭންކިންގ ސެންޓަރ، އޭޓީއެމް، އަދި 200އަށްވުރެ ގިނަ ކޭޝް އޭޖެންޓު މެދުވެރިކޮށް ބީއެމްއެލުން ދަނީ ބޭންކިންގެ ޚިދުމަތް ފޯރުކޮށްދެމުންދެއެވެ. އަދި އެންމެ ޒަމާނީ އޮންލައިން ބޭންކިންގ ޚިދުމަތާއެކު، އަމާޒަކީ އާންމު ފަރުދުންނާއި ވިޔަފާރިތަކުގެ އިތުރުން މުޅި މުޖުތަމަޢުއަށްވެސް އެހީތެރިކަން ފޯރުކޮށްދިނުން ކަމަށް ބީއެމްއެލުން ވިދާޅުވެއެވެ.

1982 ވަނަ އަހަރު ބޭންކް އޮފް މޯލްޑިވްސްގެ އެންމެ ފުރަތަމަ ބްރާންޗެއް ހުޅުވީ މާލޭގައެވެ. ގައުމީ ބޭންކުގެ ހައިސިއްޔަތުން، މާލީ ބައިވެރިވުން އިތުރުކުރުމަށް ޚާއްސަ އަހުމިއްޔަތުކަމެއް ދީގެން ކޮންމެ ރަށަކުންވެސް ބޭންކިންގ ޚިދުމަތް ލިބޭނެ ގޮތަށް ބީއެމްއެލުން ދަނީ ޚިދުމަތްތައް ފުޅާކުރަމުންނެވެ.