ތިން ބައްޔެއް ނައްތާލި ފުރަތަމަ ޤައުމަކަށް ރާއްޖެ، ރައީސްގެ ޝުކުރު ސިއްޙީ ޚިދުމަތްތެރީންނަށް

މައިމީހާގެ ފަރާތުން ތުއްތު ދަރިފުޅަށް ޖެހޭ ބަލިތަކުގެ ތެރެއިން 3 ބައްޔެއް ނައްތާލެވުނު ފުރަތަމަ ޤައުމަކަށް ރާއްޖެވުމާއި ގުޅިގެން ސިއްޙީ އެހީތެރިންނަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ޝުކުރުއަދާކުރައްވައިފިއެވެ. މިއީ ތާރީޚީ ކާމިޔާބީއެއްކަމަށް ރައީސުލްޖުމްހޫރިއްޔާވަނީ ވިދާޅުވެފައެވެ.

ގައިން ގަޔަށް އަރާ އެކި ބަލިތަކާއި ދެކޮޅަށް ރާއްޖޭގެ ސިއްޙީ ދާއިރާއިން އަންނަނީ ދުނިޔޭގެ ސިއްޙަތު ޖަމްޢިއްޔާ، ޑަބްލިއުއެޗްއޯއާއެކު މަސައްކަތް ކުރަމުންނެވެ. މިގޮތުން ކުރެވުނު މަސައްކަތުން މީގެކުރިންވެސް ރާއްޖެއިންވަނީ އެޗްއައިވީއާއި ސިފިލިސްބަލި ނައްތާލާފައެވެ. އެހެންނަމަވެސް ޑަބްލިއުއެޗްއޯއިން ކަނޑައަޅާފައިވާ މިންގަނޑާއެއްގޮތަށް މިތިން ބަލި އެއްކޮށް ފުރަތަމަ ފަހަރަށް ނައްތާލެވުނު ޤައުމަކަށް ރާއްޖެވަނީވެފައެވެ.

Today, the Maldives makes history. 🇲🇻
We are proud to be the first country in the world to achieve 'triple elimination' of mother-to-child transmission of HIV, syphilis, and hepatitis B.

It is a remarkable milestone officially recognized by the World Health Organization (WHO).… https://t.co/KL2ExiNJEq

— Dr Mohamed Muizzu (@MMuizzu) October 13, 2025

މިކާމިޔާބީއާއި ގުޅިގެން ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، މިއީ ތާރީޚީ ދުވަހެއްކަމަށެވެ. އެގޮތުން އެޗްއައިވީ، ސިފިލިސް އަދި ހެޕިޓައިޑިސް ބީ ނައްތާލެވުނު ފުރަތަމަ ޤައުމަކަށް ރާއްޖެވުމަކީ ރާއްޖެއިން ސިއްޙީ ދާއިރާއިން ހޯދި ބޮޑު ކާމިޔާބީއެއްކަމަށެވެ. އަދި މިބަލިތައް ނައްތާލުމަށް އެކި ގޮތްގޮތުން މަސައްކަތް ކުރެއްވި ހުރިހާ ސިއްޙީ އެހީތެރިންނަށް ރައީސުލްޖުމްހޫރިއްޔާވަނީ ޝުކުރުއަދާކުރައްވާފައެވެ.

ގައިން ގަޔަށް އަރާ އެކި ބަލިތަކާއި ދެކޮޅަށް ޤައުމީ ފެންވަރުގައި އެކި މަސައްކަތްކޮށްގެން ރާއްޖެއިންވަނީ އެކި ބަލިތައް ރާއްޖެއިން ކާމިޔާބިކަމާއެކު ނައްތާލާފައެވެ. އެގޮތުން މެލޭރިއާއާއި ހިމަބިއްސާއި ލިންފަޓިކް ފައިލޭރިއާސިސް ފަދަ ނުރައްކާތެރި ބަލިތައްވަނީ ނައްތާލާފައެވެ. މިބަލިތަކާއި ދެކޮޅަށް ކާމިޔާބުކަމާއެކު ޤައުމީ ވެކްސިންގ ކެމްޕޭން އަންނަނީ ހިންގަމުންނެވެ.