ޔޫތް ޗެލެންޖަކީ، ޒުވާނުންނަށް މަތީ ތަޢުލީމާއި މަސައްކަތުގެ މައިދާނުގައި ހުރި ފުރުޞަތުތަކާބެހޭ މަޢުލޫމާތު ދެއްވުމަށް 2009 ވަނަ އަހަރުން ފެށިގެން ބާއްވަވަމުން އަންނަ ފެއަރއެކެވެ.
މިނިސްޓްރީ އޮފް ޔޫތު އެންޑް ސްޕޯޓްސްއިން އިންތިޒާމްކުރައްވައިގެން ބާއްވަވާ މިފެއަރ ބޭއްވެވުމަށް ހަމަޖެހިފައިވަނީ މާދަމާއިން ފެށިގެން މިމަހުގެ 6 ވަނަ ދުވަހުގެ ނިޔަލަށެވެ. " ދަ އޮޕޮޗުނިޓީ ޕޫލް" މި ޝިޢާރުގެ ދަށުން މިއަހަރުގެ ޔޫތު ޗެލެންޖް ބޭއްވެވުމަށް ހަމަޖެހިފައިވާއިރު، ސަރުކާރުގެ ވުޒާރާތަކާއި، މުއައްސަސާތަކާއި، އަމިއްލަ ކުންފުނިތަކުގެ ވަރަށް ބޮޑު ތަރުޙީބެއް މިއަހަރު ލިބިފައިވާ ކަމަށް މިނިސްޓަރ އޮފް ޔޫތު އެންޑް ސްޕޯޓްސް އިރުތިޝާމް އާދަމް ވިދާޅުވިއެވެ. ޕީ.އެސް.އެމްއަށް ދެއްވި ޚާއްޞަ އިންޓަވިއުއެއްގައި މިނިސްޓަރ ވިދާޅުވީ، މިއަހަރުގެ ޔޫތު ޗެލެންޖްގައި ޒުވާނުންނަށް އެކި ދާއިރާތަކުން އެއްހާހަށްވުރެ ގިނަ ފުރުޞަތު ފަހިވެގެންދާނެކަމަށެވެ.
"ޒުވާނުންނަށް ގާތްގަނޑަކަށް 600 ވަޒީފާގެ ފުރުޞަތު، 38 އިންޓާރންޝިޕް އަދި 109 ތަޢުލީމީ ފުރުޞަތު ހޯދައިދިނުމުގެ ފުރުޞަތު ތަނަވަސްވެގެންދާނެ. ޒުވާނުންގެ ސްކިލް ބޭސް ޑިވެލޮޕްކުރުމަށާއި އެ ގައިޑްކޮށްދީ. ކޮންކޮން ފުރުޞަތުތަކެއްތޯ ހުރީ އަދި ކެރިޔަރ ސްކިލްސް މެޗްކުރުމަށް އިސްކަމެއް ދެވޭނެ. މީގެ އިތުރުންވެސް ގާތްގަނޑަކަށް 1000 ތަފާތު އެކި ފުރުޞަތުތައް ޒުވާނުންނަށް ލިބިގެންދާނެ." މިނިސްޓަރ އޮފް ޔޫތު އެންޑް ސްޕޯޓްސް އިރުތިޝާމް އާދަމް ވިދާޅުވިއެވެ.
ޔޫތު މިނިސްޓަރ، އިރުތިޝާމް އާދަމް ވިދާޅުވީ، އެހެން އަހަރުތަކާއި ޚިލާފަށް މިއަހަރުގެ ޔޫތު ޗެލެންޖްގައި، ޒުވާނުންނަށް ހުރި ތަފާތު ފުރުޞަތުތައް ދައްކުވައިދޭ ގޮތަށް ހަމަޖެހިފައިވާ ކަމަށެވެ. އެގޮތުން، މިއަހަރުގެ ޝިޢާރާ ގުޅުވައިގެން ޒުވާނުންނަށް ހުރި ވަޒީފާގެ ފުރުޞަތުތަކާއި، ތަޢުލީމާއި ތަމްރީނު އަދި ވިޔަފާރި ކުރަމުންގެންދާ ޒުވާނުންގެ ވިޔަފާރިތަކާ ވިޔަފާރީގެ ބާޒާރަށް ތަޢާރަފުކުރަން ބޭނުންވާ އައު އުފެއްދުންތައް ޕްރޮމޯޓްކުރުމުގެ ފުރުޞަތާއި އިޖުތިމާޢީ މަސައްކަތުގައި ކުރިއަށްދާން ބޭނުންވާ ޒުވާނުންނަށް އެފުރުޞަތު ފަހިކޮށްދެއްވުމަށްޓަކައި، އެކުވެރި މާޙައުލަކުން ޒުވާނުންނަށް މަޢުލޫމާތުތައް ލިބޭނެގޮތް ފަހިކޮށްދެއްވުމަށް ރާއްވަވާފައިވާ ކަމަށެވެ.
މިނިސްޓަރ ވިދާޅުވީ، މިހާރުގެ ސަރުކާރަކީ ޒުވާނުންގެ އަޑުއަހާ ޒުވާނުންނަށް، ބޭނުންވާ ކަންކަން ދެނެގަނެ، އެކި ދާއިރާތަކުން ޒުވާނުން ކުރިޔަށް ދިއުމުގެ ފަހި ފުރުޞަތުތަކެއް ތަނަވަސްކޮށްދެއްވުމަށް މަސައްކަތްކުރައްވާ ސަރުކާރެއް ކަމަށެވެ. އެގޮތުން ސިޔާސަތުތައް އެކުލަވާލުމުގައްޔާއި، ތަންފީޒީ މަރުޙަލާގައިވެސް ޒުވާނުންގެ ޚިޔާލާއި ފިކުރު ހޯދަމުންދާ ކަމަށެވެ. އެގޮތުން މި ޔޫތު ޗެލެންޖުންވެސް މިފަދަ ފުރުޞަތުތަކެއް ޒުވާނުންނަށް ތަނަވަސްކޮށްދެއްވުމަށް މަސައްކަތް ކުރައްވާނޭކަމަށް ވިދާޅުވިއެވެ.
"ޒުވާނުންނަށް ވިޔަފާރީގެ ފުރުޞަތުތައް ލިބި، ބާޒާރުގައި ދައުރެއް އަދާކުރަން ފުރުޞަތު ލިބޭނެ. އަދި އޭގެ އިތުރުން ޒުވާނުންނަށް އެކިއެކި ޚިޔާލުތަކާއި ޝުޢޫރުތައް ހުށައަޅަންވެސް ފުރުޞަތު ލިބޭނެ. އަޅުގަނޑުމެން މިބަލަނީ ޒުވާނުންނަކީ ޒިންމާދާރު ބަޔަކަށް ހެދުމަށް. ޒުވާނުންގެ އަޞްލު އަޑުއެހުމުން ސިޔާސަތުތައް ބައްޓަންކޮށް، ޕްރޮގްރާމްތައް ރޭވުމަށް ސަރުކާރަށް ފަސޭހަވެގެންދާނެ." ޔޫތު އެންޑް ސްޕޯޓްސް މިނިސްޓަރ އިރުތިޝާމް އާދަމް ވިދާޅުވިއެވެ.
މިއަހަރުގެ ޔޫތް ޗެލެންޖުގައި މިނިސްޓްރީތަކާއި، ސަރުކާރުގެ އިދާރާތަކާއި މުއައްސަސާތަކުގެ އިތުރުން، މަދަނީ ޖަމާޢަތްތަކާއި، ކުންފުނިތަކާއި ހޮސްޕިޓަލްތައް ހިމެނޭ ގޮތަށް ޖުމްލަ 64 ސްޓޯލެއް ޤާއިމްކުރާނޭ ކަމަށް މިނިސްޓަރ ވިދާޅުވިއެވެ. ޔޫތު ޗެލެންޖް 2016ގެ މީޑީއާ ޕާޓްނަރަކީ ޕީއެސް.އެމްއެވެ. އޮންލައިން ޕާޓްނަރަކީ ވަގުތު އޮންލައިނެވެ. އަދި ޓެލެކޮމް ޕާޓްނަރަކީ ދިރާގެވެ.