ޚަބަރު
ސައުދީން ހަދިޔާކުރި 50 ޓަނުގެ ކަދުރު ރާއްޖެ ގެނެސްފި
-
އިފްޠާރު ޕްރޮގްރާމް ހިންގަން ބޭނުންވާ ޖަމިއްޔާތަކަށްވެސް ކަދުރުން ބައެއް ދޭން ނިންމާފައިވޭ
ސަޢުދީ ސަރުކާރުން ހަދިޔާކުރި ކަދުރު ހަވާލުކުރުމަށް ބޭއްވި ރަސްމިއްޔާތުގެ ތެރެއިން، ފައިލް ފޮޓޯ:އިސްލާމީ ކަންތައްތަކާ ބެހޭ ވުޒާރާ
ސަޢޫދީ އަރަބިއްޔާގެ ސަރުކާރުން ކޮންމެ އަހަރަކު ރަމަޟާންމަހު ދެއްވާ 50 ޓަނުގެ ކަދުރު ރާއްޖެ އަތުވެއްޖެއެވެ.
އިސްލާމީ ކަންތައްތަކާބެހޭ ވަޒީރު ޑރ.މުޙައްމަދު ޝަހީމް އަލީ ސަޢީދު ވިދާޅުވީ ސަޢުދީ އަރަބިއްޔާއިން ކޮންމެ އަހަރަކުވެސް ދެމުން އަންނަ ކަދުރު މިހާރު އެ ވުޒާރާއަށް ލިބިފައިވާކަމަށެވެ. ވަޒީރު ވިދާޅުވީ ރަމަޟާންމަސް ފެށުމުގެ ކުރިން ކަދުރު ބަހައި ނިންމާނެކަމަށެވެ.
ވަޒީރު ވިދާޅުވީ މި ފަހަރު ކަދުރު ބެހުމުގައި މިސްކިތްތަކުގައި އިފްޠާރު ޕްރޮގްރާމް ހިންގަން ބޭނުންވާ ޖަމިއްޔާތަކަށްވެސް ކަދުރުން ބައެއް ދޭނެކަމަށެވެ.
ކޮންމެ އަހަރަކުވެސް ރަމަޟާންމަހާ ދިމާކޮށް ސަޢުދީ ސަރުކާރުން އަންނަނީ ރާއްޖެއަށް ކަދުރު ހަދިޔާކުރަމުންނެވެ. މި ކަދުރު ބަހަނީ އިސްލާމީ ކަންތައްތަކާބެހޭ ވުޒާރާގެ ބެލުމުގެ ދަށުންނެވެ.