އަލިފާނުގެ ހާދިސާއާ ގުޅިގެން ސޯޝަލް ސެންޓަރުގައި ވަގުތީ ހިޔާވަހިކަން ޤާއިމްކޮށްފި

ހައުންސިން މިނިސްޓްރީ އިމާރާތުގައި ރޯވި އަލިފާންގަނޑުގެ ސަބަބުން މި ސަރަހައްދުގައި ދިރިއުޅެމުންދާ ފަރާތްތައް ވަގުތީ ގޮތުން ސޯޝަލް ސެންޓަރ އަށް ބަދަލު ކުރުމުގެ މަސައްކަތް ފަށައިފިއެވެ.

މިކަމާއި ގުޅިގެން ޕީއެސްއެމްނިއުސް މަޢުލޫމާތު ދެއްވަމުން ނޭޝަނަލް ޑިޒާސްޓަރ މެނޭޖްމެންޓް އޮތޯރިޓީ (އެންޑީއެމްއޭ) ގެ ޗީފް އެގްޒެކެޓިވް ހިސާން ހަސަން ވިދާޅުވީ، އަލިފާނުގެ ހާދިސާއާއި ގުޅިގެން އެ ސަރަހައްދުގައި ދިރިއުޅޭ ފަރާތްތައް ސޯޝަލް ސެންޓަރަށް ބަދަލުކުރުމަށް މަސައްކަތް ފަށާފައިވާ ކަމަށެވެ. އެގޮތުން، މިވަގުތުވެސް އެ ސަރަހައްދުގެ ގެތަކަށް ދުމުގެ އަސަރު ދަނީ ކުރަމުންނެވެ.

އިމަންޖަންސީ އިވެކިއުއޭޝަން ސެންޓަަރ އެއް މިވަގުތު ވަނީ ސޯޝަލް ސެންޓަރގައި ގާއިމްކޮށްފަ. އެހީތެރިކަން ބޭނުންވާ ފަރާތްތަކުން 115 އަށް ގުޅައި ނުވަތަ އިވެކިއުއޭޝަން ސެންޓަރަށް ވަޑައިގަތުމަށް ދަންނަވަން.

— NDMA Maldives (@NDMAmv) December 12, 2024

އެންޑީއެމްއޭއިން ވިދާޅުވީ، މިކަމާއި ގުޅިގެން ސޯޝަލް ސެންޓަރުގައި އިމަޖެންސީ އިވެކުއޭޝަން ސެންޓަރެއް ޤާއިމްކޮށްފައިވާ ކަމަށެވެ. އަދި އެތަނުގައި ދިވެހި ރެޑް ކްރެސެންޓާއި އެންޑީއެމްއޭގެ ފަރާތްތައް މިހާރު ހަރަކާތްތެރިވަމުންދާ ކަމަށް އެންޑީއެމްއޭއިން ވިދާޅުވެއެވެ.

އެންޑީއެމްއޭއިން ވަނީ އެއްވެސް އެހީތެރިކަމެއް ބޭނުންވާ ފަރާތެއް ނަމަ 115 އަށް ގުޅައި ސެންޓަރަށް ވަޑައިގަތުމަށް އެދިވަޑައިގެންފައެވެ.

މިއަދު ހެނދުނު ރޯވި އަލިފާންގަނޑު އަދިވެސް ކޮންޓްރޯލް ނުވެއެވެ.