އެމްޑީޕީގެ ރިޔާސީ ޓިކެޓަށް ވާދަކުރައްވާނެކަން ފައްޔާޟް ޢިއުލާން ކުރައްވައިފި
-
ރިޔާސީ ޕްރައިމަރީގައި އެމްޑީޕީން އިތުރު ފަރާތެއް ވާދަކުރައްވާނެކަން މިހާތަނަށް އިޢުލާންކޮށްފައި ނުވޭ
2028ގައި ބާއްވާ ރިޔާސީ އިންތިޚާބަށް އެމްޑީޕީން ބާއްވާ ޕްރައިމަރީގައި ވާދަ ކުރައްވާނެކަމަށް އެމްޑީޕީގެ ޗެއަރޕާސަން ފައްޔާޟް އިސްމާޢީލް ވިދާޅުވެއްޖެއެވެ.
ފައްޔާޟް މިހެން ވިދާޅުވެފައިވަނީ އެޕާޓީގެ ޤައުމީ މަޖިލީހުގެ މެންބަރުން ތިއްބަވާ ވަޓްސް އެޕް ގްރޫޕަށް ހިއްސާ ކުރެއްވި މެސެޖެއްގައެވެ. އެގްރޫޕަށް ކުރެއްވި މެސެޖެއްގައި ފައްޔާޟް ވަނީ އެ ޕާޓީގެ ރިޔާސީ ޕްރައިމަރީގައި ވާދަކުރައްވަން ނިންމަވާފައިވާކަމަށާއި ހުރިހާ މީހުންވެސް ސަޕޯޓްކޮށްދިނުމަށް އެދިވަޑައިގެންފައެވެ.
އެ ޕާޓީން ރިޔާސީ އިންތިޚާބުގައި ވާދަކުރައްވާނެކަން މިހާތަނަށް ޢިއުލާން ކުރައްވާފައިވަނީ ފައްޔާޟް އެކަންޏެވެ. އެހެންނަމަވެސް ކުރީގެ ރައީސް އިބްރާހީމް މުހައްމަދު ޞާލިޙް ދާދިފަހުން ޓީވީ ޗެނަލަކަށް ދެއްވި ބަސްދީގަތުމެއްގައި ވަނީ އެޕާޓީގެ ރިޔާސީ ޕްރައިމަރީގައި ވާދަކުރެއްވުމަށް 5 ވަރަކަށް ބޭފުޅުން ޝައުޤުވެރިކަން ފާޅުކުރައްވާފައިވާކަން ހާމަކުރައްވާފައެވެ. ނަމަވެސް އެ މަނިކުފާނު ވާދަކުރެއްވުމާ ގުޅޭގޮތުން ވަކި އެއްޗެއް ވިދާޅުނުވާއިރު އެމަނިކުފާނުގެ ސިޔާސީ ކުރިމަގާއި ގުޅޭގޮތުން ޕާޓީގެ ލީޑަރޝިޕާ ހިއްސާކުރައްވާފައިވާކަމަށް ރައީސް ޞާލިހްވަނީ ވިދާޅުވެފައެވެ.