އިމާމުން ތާޒާކުރުމުގެ ޕްރޮގުރާމްގެ ދަށުން 6 އަތޮޅެއްގެ އިމާމުން ތަމްރީންކޮށްފި
-
6 އަތޮޅުން 272 އިމާމުން ތަމްރީންކޮށްފައިވޭ
-
މިހާތަނަށް 429 އިމާމުން ވަނީ ތަމްރީންކޮށްފައި
އިސްލާމީ ކަންތައްތަކާ ބެހޭ ވުޒާރާއިން ކުރިއަށްގެންދާ އިމާމުން ތާޒާކުރުމުގެ ޕްރޮގުރާމްގެ ދަށުން 6 އަތޮޅެއްގެ އިމާމުން ތަމްރީންކޮށް ނިންމާލައިފިއެވެ.
6 އަތޮޅެއްގެ އިމާމުން ތަމްރީންކުރުމުގެ ޕްރޮގްރާމް އިސްލާމީ ކަންތައްތަކާބެހޭ ވުޒާރާއިން ފެށީ މިމަހުގެ 11 ވަނަ ދުވަހުއެވެ. އިސްލާމީ ކަންތައްތަކާބެހޭ ވުޒާރާއިން ވިދާޅުވީ، ނ، ރ، ފ، ދ، ތ އަދި ލ އަތޮޅުން 272 އިމާމުން މިހާރު ތަމްރީންކޮށް ނިމިފައިވާ ކަމަށެވެ.
އިމާމުން ތާޒާކުރުމުގެ ޕްރޮގުރާމްގެ ދަށުން މިހާތަނަށް 429 އިމާމުން ވަނީ ތަމްރީންކޮށްފައެވެ. މީގެ ތެރޭގައި ހިމެނެނީ އިމާމުން ތަމްރީންކޮށް މިމަހުގެ ތެރޭގައި ނިމުނު 6 އަތޮޅުގެ އިތުރުން ގއ އަދި ގދ އަތޮޅުން 77 އިމާމުންނާއި، ފުވައްމުލަކުން 40 އިމާމުންނާއި މ އަދި ވ އަތޮޅުން ތަމްރީންކޮށްފައިވާ 40 އިމާމުންނެވެ.
އިމާމުން ތާޒާކުރުމުގެ ޕްރޮގްރާމުގައި ޖުމްލަ 9 މާއްދާއެއް ކިޔަވައިދޭކަމަށް އިސްލާމީ ކަންތައްތަކާބެހޭ ވުޒާރާއިން ވިދާޅުވެއެވެ. އެގޮތުން ޤުރްއާނާއި ތަޖުވީދުގެ ޢިލްމާއި ތަފްސީރާއި ފިޤުހާއި ޙަދީޘްގެ އިތުރުން އަޤީދާގެ ޢިލްމުގެ ދާއިރާއިން އިމާމުންނަށް ބޭނުންވާ މުހިއްމު ކަންކަން އުނގަންނައިދޭނެކަމަށް އެ ވުޒާރާއިން ވިދާޅުވެއެވެ.
ރާއްޖޭގައި ގާތްގަނޑަކަށް 700 އެއްހާ ދާއިމީ އިމާމުން އުޅެއެވެ. އިސްލާމީ ކަންތައްތަކާބެހޭ ވުޒާރާގެ އަމާޒަކީ މިއަހަރުގެ ތެރޭގައި ހުރިހާ ދާއިމީ އިމާމުން ތަމްރީންކޮށް ނިންމުމެވެ.