ޖަޕާނުގެ ހިލޭ އެހީގައި މާލޭގެ ބޭރު ތޮށި މަރާމާތުކުރަނީ

މާލޭގެ ބޭރު ތޮށި މަރާމާތު ކުރުމަށާއި މާލޭގެ ފެންހިންދާ ނިޒާމް އަޕްގްރޭޑްކުރުމަށް ޖަޕާނު ސަރުކާރުން 140،000 ޑޮލަރު ދިނުމަށް ނިންމައިފިއެވެ.

ޖަޕާން ސަރުކާރުގެ އެހީގައި ކުރިއަށް ގެންދިއުމަށް ހަމަޖެހިފައިވާ "ޑިޒާސްޓަރ ރެޒިލިއަންސް އެންހޭންސްމަންޓް އިން މާލެ އައިލަންޑް" މަޝްރޫޢުގެ އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވަޒީރު މޫސާ ޒަމީރުއެވެ. ޖަޕާން ސަރުކާރުގެ ފަރާތުން ސޮއިކުރެއްވީ ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޓަކެއުޗީ މިޑޯރީއެވެ. އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބްވެސް ބައިވެރިވެވަޑައިގެންނެވިއެވެ.

ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމްގެ ދަށުން ކުރިއަށްގެންދިއުމަށް ހަމަޖެހިފައިވާ މި މަޝްރޫޢަށް ހިލޭ އެހީގެ ގޮތުގައި ޖަޕާން ސަރުކާރުން 20 މިލިއަން ޖަޕާނީސް ޔެން ނުވަތަ 140،000 ޑޮލަރު ދިނުމަށް ވަނީ ނިންމާފައެވެ.

އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން ޚާރިޖީ ވަޒީރު މޫސާ ޒަމީރު ވަނީ ކަނޑުގެ ލޮނުގަނޑު އުފުލުމާއި މޫސުމާ ގުޅުންހުރި އެހެނިހެން ކާރިސާތަކުގެ ނުރައްކަލުން ރާއްޖެ ސަލާމަތްކުރުމަށް މި މަޝްރޫޢުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި މިމަޝްރޫޢަކީ، އަންނަން އޮތް ޖީލުތަކަށް ދެމެހެއްޓެނިވި ރައްކާތެރިކަން ފޯރުކޮށްދޭނެ މަޝްރޫޢެއްކަމަށް ވިދާޅުވިއެވެ.

2004 ވަނަ އަހަރުގެ އިންޑިއާ ކަނޑުގެ ސުނާމީ ކާރިސާއަށް އިޝާރާތް ކުރައްވައި، ވަޒީރު ވަނީ މާލެ އާއި މާލޭގައި ދިރިއުޅޭ ރައްޔިތުންގެ ސަލާމަތާއި ރައްކާތެރިކަމަށްޓަކައި، ޖަޕާނުގެ އެހީގައި 1990 ވަނަ އަހަރު ބިނާކުރި މާލޭގެ ވަށާތޮށި މުހިންމު ދައުރެއް އަދާކުރިކަން ފާހަގަކުރައްވާފައެވެ.

"މިފަދަ މަޝްރޫޢުތަކުން ރާއްޖޭގެ ތަރައްޤީގެ ދަތުރުގައި ޖަޕާނުން މުހިންމު ދައުރެއް އަދާކުރޭ. މިގޮތުން ތަޢުލީމީ ދާއިރާ، މޫސުމީ ބަދަލުތަކުން ލިބޭ ގެއްލުން ކުޑަކުރުމަށްޓަކައި ކުރިއަށްގެންދާ މަޝްރޫޢުތައް ހިމެނޭ." ޚާރިޖީ ވަޒީރު މޫސާ ޒަމީރު ވިދާޅުވިއެވެ.

ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޓަކެއުޗީ މިޑޯރީ ވިދާޅުވީ މާލޭ ބޭރު ތޮށި މަރާމާތު ކުރުމުގެ މަސައްކަތް އަންނައަހަރު ފަށާ 2027 ވަނަ އަހަރު މުޅިމަޝްރޫޢު ނިންމާލެވޭނެކަމަށް އުއްމީދުކުރައްވާކަމަށެވެ. އަދި މި މަޝްރޫޢުގެ ދަށުން މާލޭގެ ފެންހިންދާ ނިޒާމް އަޕްގްރޭޑްކުރުމަށް ބޭނުންވާ ސާމާނު ޖަޕާނު ސަރުކާރުން ފޯރުކޮށްދެއްވާނެކަމަށެވެ.

" ރާއްޖެއަކީ މޫސުމީ ބަދަލުތަކުގެ ސަބަބުން އަސަރުކުރާ ޤައުމުތަކުގެ ތެރޭގައި ހިމެނޭ ޤައުމެއް. އެހެންކަމުން ޖަޕާނު ސަރުކާރުން ރާޢްޖެއަށް އެހީތެރިވުމަށް އަބަދުވެސް އޮންނާނީ ތައްޔާރަށް." ޖަޕާނުން ރާއްޖެއަށް ކަނޑައަޅާފައި ހުންނަވާ ސަފީރު ޓަކެއުޗީ މިޑޯރީ ވިދާޅުވިއެވެ.

މި މަޝްރޫޢު ކުރިއަށްގެންދަނީ ޖަޕާން އިންޓަރނޭޝަނަލް ކޯޕަރޭޝަން އޭޖެންސީ، ޖައިކާގެ އެހީތެރިކަމާއެކުގައެވެ.

އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި އިމާރާތް ކުރުމާއި ބިނާރާ ބެހޭ ވުޒާރާގެ އިސްވެރިންނާއި ޚާރިޖީ ވުޒާރާގެ އިސްވެރިންގެ އިތުރަށް މާލީ ވުޒާރާގެ އިސްވެރިން ބައިވެރިވެވަޑައިގެންނެވިއެވެ. އަދި ޖަޕާނުގެ އެމްބަސީއާއި ޖަޕާން އިންޓަރނޭޝަނަލް ކޯޕަރޭޝަން އެޖެންސީ (ޖައިކާ) ގެ އިސްބޭފުޅުން ވެސް ބައިވެރިވެވަޑައިގެންނެވިއެވެ.

މީގެ 30 ހަކަށް އަހަރު ކުރިން މާލޭގެ ވަށާލެވިފައިވާ ތޮއްޓަކީ ރާއްޖެއާއި ޖަޕާނުގެ ގުޅުމުގެ މުހިންމު ރަމްޒެކެވެ. 1987 ވަނަ އަހަރު މާލެއަށް ބޮޑު ރާޅު އަރާ ލިބުނު ގެއްލުމަކީ، މާލެއަށް ކުރިމަތިވި މޫސުމީ އެންމެ ބޮޑު އެއް ކާރިސާއެވެ.

މި ކާރިސާގައި އެތައް ބައެއްގެ މުދަލަށް ގެއްލުން ލިބުނެވެ. އެހެންކަމުން މިފަދަ ކާރިސާތަކުން ސަލާމަތްވުމަށް މާލޭގެ އެއްގަމު ތޮށިލުމުގެ މަސައްކަތް ކޮށްފައިވަނީ ޖަޕާނު ސަރުކާރުގެ ހިލޭ އެހީގެ ދަށުންނެވެ. މިއީ 1991 އިން 1992 އަށް ޖައިކާ އިން ދިރާސާތަކެއް ކުރުމަށްފަހު، 1993 އިން 2002 އަށް އެއްގަމު ތޮށި ޑިޒައިންކުރުމާއި ޢަމަލީ މަސައްކަތް ކޮށްފައިވާ މަޝްރޫޢެކެވެ.