ރާއްޖޭގައި ޤާއިމްކުރާ އެންމެ ބޮޑު ގޭސް ޕްލާންޓް ގދ.ތިނަދޫގައި

ރާއްޖޭގައި މިހާތަނަށް ޤާއިމުކުރާ އެންމެ ބޮޑު ގޭސް ޕްލާންޓް ގދ. ތިނަދޫގައި ޤާއިމުކުރާގޮތަށް ހަމަޖައްސައިފިއެވެ.

ތިނަދޫ ކައުންސިލްގެ ފަރާތުން މިހާރު ވަނީ އެކަމަށް ބޭނުންވާ ބިން މޯލްޑިވްސް ގޭސްއާއި ހަވާލުކޮށް، އެކަމުގެ އެއްބަސްވުމުގައި ސޮއިކުރައްވާފައެވެ.

މި ގޭސް ޕްލާންޓް އެޅުމަށްޓަކައި، ތިނަދޫ ކައުންސިލްގެ ފަރާތުން ވަނީ އެރަށު ޖެޓީ ސަރަހައްދުގެ ދެކުނު ކޮޅުން 10،000 އަކަފޫޓުގެ ބިމެއް ކަނޑައަޅުއްވާފައެވެ.

img:http://s2.psmnews.mv/images/660x400/14648242898742.jpg|ތިނަދޫގައި ގޭސް ޕްލާންޓް ޤާއިމް ކުރުމަށް ހަމަޖެހިފައިވާ ސަރަހައްދު- ފޮޓޯ: ޕީއެސްއެމް

މޯލްޑިވް ގޭސް ޕްރައިވެޓް ލިމިޓެޑުން ހާމަކުރެއްވިގޮތުގައި ތިނަދޫގައި ޤާއިމުކުރުމަށް ހަމަޖެހިފައިވާ މި ގޭސް ޕްލާންޓަށް 1500 މެޓްރިކް ޓަނުގެ ގޭސް އުފައްދައި، ރައްކާކުރުމުގެ ޤާބިލުކަން ލިބިގެންވެއެވެ. އެކުންފުނިން ތިލަފުށީގައި ޤާއިމުކޮށްފައިވާ ގޭސް ޕްލާންޓަށް އުފެއްދެނީ 1100 މެޓްރިކް ޓަނުގެ ގޭހެވެ. އަދި ތިލަފުށީގައި މިހާރު ބޭނުންކުރަމުންދާ ޕްލާންޓަކީ މެނުއަލް ޕްލާންޓެއް ކަމަށާއި، އެހެންނަމަވެސް ތިނަދޫގައި އަލަށް ޤާއިމުކުރެވިގެންދާ މި ގޭސް ޕްލާންޓަކީ އެންމެ ޒަމާނީ ވަސީލަތްތަކާއެކު "ފުލީ އޮޓޮމެޓިކް" ޕްލާންޓެއް ކަމަށް އެކުންފުނިން މަޢުލޫމާތުދެއެވެ.

ގާތްގަނޑަކަށް 130 މިލިއަނަށް ވުރެ ގިނަ ރުފިޔާ ޙަރަދުކޮށްގެން ކުރިއަށްގެންދާ މި މަޝްރޫޢުގެ ސަބަބުން އެކުންފުނީގެ ފަރާތުން އާއްމުންނަށް ގޭސް ފޯރުކޮށްދިނުމަށް ކުރަމުންދާ މަސައްކަތްތަކަށް އިތުރު ކުރިއެރުންތަކެއް ލިބިގެންދާނެއެވެ.