ތިލަމާލެ ބްރިޖު މަޝްރޫއުގެ މަސައްކަތް އަވަހަށް ނިންމުމާ ގުޅޭގޮތުން މަޝްވަރާކޮށްފި

ތިލަމާލެ ބްރިޖްގެ މަސައްކަތްތައް ތާވަލާ އެއްގޮތަށް ނިންމުމާ ގުޅޭގޮތުން ބޭއްވި މަތީ ފެންވަރުގެ ބައްދަލުވުގައި އިމާރާތް ކުރުމާއި ބިނާރާ ބެހޭ ވަޒީރު ޑރ.ޢަބްދުﷲ މުއްޠަލިބް ބައިވެރިވެވަޑައިގަންނަވައިފިއެވެ.

މިބައްދަލުވުން ބާއްވާފައިވަނީ އިމާރާތް ކުރުމާއި ބިނާރާ ބެހޭ ވަޒީރު އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ވަޒީރު މުއްޠަލިބުގެ އިންޑިޔާއަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިންވަނީ ތިލަމާލެ ބްރިޖުގެ މަސައްކަތާ ގުޅޭ ޖޮއިންޓް ޕްރޮޖެކްޓް މޮނިޓަރިން ކޮމިޓީގެ 12 ވަނަ ބައްދަލުވުމުގެ ކޯ ޗެއަރކަން ކުރައްވާފައެވެ. މިކޮމިޓީގެ ކޯ ޗެއަރއަކީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައިކޮމިޝަނަރ މުނޫ މަހާވަރުއެވެ. މިކޮމިޓީގައި ވަޒީރާއެކު އިންޑިޔާއަށް ވަޑައިގެންނެވި ރާއްޖޭގެ އެކި ވުޒާރާތަކުގެ އިސްވެރިންނާއި އިންޑިއާގެ މިނިސްޓްރީ އޮފް އެކްސްޓާނަލް އެފެއަޒްގެ އިސްވެރިންނާއި އެގްޒިމް ބޭންކުގެ އިސްވެރިންގެ އިތުރުން ބްރިޖް މަޝްރޫޢުގެ ކޮންޓްރެކްޓަރާއި ކޮންސަލްޓެންޓުން ބައިވެރިވެވަޑައިގެންނެވިއެވެ.

މިބައްދަލުވުމުގައިވަނީ ތިލަމާލެ ބްރިޖް މަޝްރޫޢު ނުހުއްޓި ކުރިއަށް ގެންދިޔުމަށްޓަކައި ޓެކްނިކަލް ލެވެލްގައި މަޝްވަރާތައް ކުރިއަށްގެންގޮސްފައެވެ. އެގޮތުން ތިލަމާލެ ބްރިޖް މަޝްރޫޢުގެ މަސައްކަތް އަވަސްކުރުމަށާއި ކަނޑައެޅިފައިވާ ތާރީޚާ އެއްގޮތަށް މަޝްރޫޢު ނިންމުމުގެ މުހިއްމުކަމާ ގުޅޭގޮތުންވަނީ މަޝްވަރާކުރައްވާފައެވެ. މި ބައްދަލުވުމުގެ މަގްސަދަކީ މަޝްރޫއުގެ މަސައްކަތް ޓައިމްލައިނާ އެއްގޮތަށް ކުރިއަށް ގެންދިއުމަށް ދެ ފަރާތުން ގުޅިގެން މަސައްކަތް ކުރުންކަމަށް އިމާރާތްކުރުމާ ބިނާރާ ބެހޭ ވުޒާރާއިން ވިދާޅުވެއެވެ.

ތިލަމާލެ ބްރިޖް މަޝްރޫޢުގެ %43.59 މަސައްކަތް ނިމިފައިވާކަމަށް އިމާރާތްކުރުމާ ބެހޭ ވުޒާރާއިން ވިދާޅުވެއެވެ. މި މަޝްރޫއުގެ ޓައިމްލައިންގައިވާ ގޮތުން މާލެއިން ގުޅިފަޅަށް މަސައްކަތްތައް ނިންމުމަށް ތާވަލުކޮށްފައިވަނީ 31 މަރޗް 2026އަށެވެ.

ގުޅިފަޅުން ތިލަފުއްޓަށް ގުޅާލާ ބްރިޖްގެ މަސައްކަތް ނިންމުމަށް ތާވަލުކޮށްފައިވަނީ 30 ސެޕްޓެމްބަރު 2026އަށެވެ. މިއާއެކު މުޅި މަޝްރޫޢު ނިމޭނެކަމަށް ޓައިމްލައިންގައި ހިމަނާފައިވަނީ 30 ސެޕްޓެމްބަރު 2026 ކަމަށް އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވެއެވެ.

ތިލަމާލޭ ބްރިޖްގެ މަސައްކަތް 2025ގެ ނިޔަލަށް ނުވަތަ 2026ގެ ކުރީކޮޅު ނިންމުމަކީ ސަރުކާރުގެ އަމާޒެކެވެ. ހަތަރު ސަރަޙައްދެއް ގުޅުވާލާ، 6.7 ކިލޯމީޓަރުގެ މިބްރިޖު ތަރައްޤީކުރުމަށް 7 ބިލިއަނަށްވުރެ ގިނަ ދިވެހި ރުފިޔާ ހޭދަކުރެއެވެ.

އިމާރާތް ކުރުމާއި ބިނާރާ ބެހޭ ވަޒީރު ޑރ.މުއްޠަލިބު އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި ވަނީ މުމްބާއީގެ "އަދީތު ޓަނަލް"އަށްވެސް ޒިޔާރަތް ކުރައްވާފައެވެ. މިއީ ކަނޑުއަޑީގައި ތަރައްޤީކުރަމުންދާ 7.1 ކިލޯމީޓަރު ދިގު ޓަނަލެކެވެ.

އިމާރާތް ކުރުމާއި ބިނާރާ ބެހޭ ވުޒާރާއިން ވިދާޅުވީ މިޒިޔާރަތުގެ ސަބަބުން ރާއްޖޭގައި މަޝްރޫޢުތައް ކުރިއަށް ގެންދިޔުމަށް ތަޖުރިބާތަކެއް ލިބޭނެކަމަށެވެ.