ބޮޑު ކަންނެލީގެ މަސްވެރިކަމުގައި ހުރި ދަތިތައް ހައްލުކޮށްދެއްވާނެކަމުގެ ޔަޤީންކަން ރައީސް ދެއްވައިފި

ރާއްޖޭގައި ބޮޑުކަންނެލީގެ މަސްވެރިކަމަށް ދިމާވެފައިވާ މައްސަލަތައް ގާތުން ބައްލަވައި ހައްލު ހޯއްދަވާދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވައިފިއެވެ. ރައީސް މިޔަޤީންކަން ދެއްވާފައިވަނީ ބޮޑުކަންނެލީގެ މަސްވެރިންގެ ޔޫނިއަންއާއިއެކު މިއަދު ބޭއްވެވި ބައްދަލުވުމުގައެވެ.

ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒާއި، މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު ވަނީ ބޮޑުކަންނެލީގެ މަސްވެރިންގެ ޔޫނިއަންގެ މެންބަރުންނާއި ބައްދަލުކުރައްވާފައެވެ.

މިއަދުގެ ބައްދަލުކުރެއްވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ މިފަދަ ބައްދަލުވުމެއްގެ ބޭނުމަކީ ރައްޔިތުންނާ ގާތުން ރައްޔިތުން އެދޭގޮތަށް ސަރުކާރުގެ ކަންކަން ކުރިއަށް ގެންދިއުންކަމުގައެވެ. އަދި މެނިފެސްޓޯގައި ހުރި ކަންކަން ކުރިއަށްގެންދިއުމަށް މަސައްކަތް ކުރައްވާކަމަށާއި، އެކަންކަން ނިމުމުން މަސްވެރިކަމުގެ ސިނާއަތަށް ޖުމްލަ ގޮތެއްގައި ހައްލެއް ލިބިގެންދާނެކަމުގައި ފާހަގަކުރެއްވިއެވެ. އަދި ބީ.ކޭ.އެމް.ޔޫ މެންބަރުންގެ ޝުޢޫރުތަކާއި ކަންބޮޑުވުންތައް ޙިއްޞާކުރެއްވުމަށް ރައީސުލްޖުމްހޫރިއްޔާ ފުރުޞަތު ދެއްވިއެވެ.

މި ބައްދަލުކުރެއްވުމުގައި ބީ.ކޭ.އެމް.ޔޫގެ މެންބަރުން ވަނީ މަސްވެރިކަމުން ލިބޭ އާމްދަނީ ކުޑަވުމުންނާއި، މަސްވެރިކަމުގެ ސިނާޢަތަށް ވަންނަ ނުވަތަ ގުޅޭ ފަރާތްތައް މަދުވުމުގެ ސަބަބުން ކުރިމަތިވާ ގޮންޖެހުންތައް ޙިއްޞާކުރައްވާފައެވެ. އަދި މަސް ކިރުމުގައި ހުރި ދަތިތަކާއި، ދޯނިތަކަށް ހޯދަންޖެހޭ ސާފުތާހިރުކަމުގެ ލިޔުން ހޯދުމުގައި ހުރި ކަންބޮޑުވުންތައް ޙިއްޞާކުރައްވާފައިވެއެވެ. މީގެ އިތުރުންވެސް މިހާރު މަސްދޯނި ފަހަރު އޮންނަ ސަރަހައްދު ބެލުމަށް ބޭނުންކުރާ ޑިވައިސްގައި ހުރި އުނދަގޫކަން އެބޭފުޅުން ފާހަގަކުރެއްވިއެވެ. އަދި އެ ބޭފުޅުންވަނީ "ފްލޯ ޕްރައިސް" ގެ ދަށުން މަސްވިއްކޭނެ ގޮތެއް ސަރުކާރުން ހޯދައި ދިނުމަށާއި، ބޮޑުކަންނެލި މަސްވެރިކަމަށް ޚާއްޞަ ބޮއި ހޯދައިދެއްވުމަށާއި، އެންވެރިކަން ކުރާ ސަރަހައްދުތައް ރައްކާތެރިކޮށްދެއްވުމަށް އެދިވަޑައިގެންފައެވެ.

މިބައްދަލުވުމަށްފަހު ޕީއެސްއެމް ނިއުސްއަށް މައުލޫމާތުދެއްވަމުން ބޮޑުކަންނެލީގެ މަސްވެރިންގެ ޔޫނިއަންގެ ރައީސް ހުސައިން ނަޝީދު ވިދާޅުވީ، ބޮޑުކަންނެލީގެ މަސްވެރިންނަށް މިހާރު ދިމާވެފައިވާ ހުރިހައި ގޮންޖެހުންތަކެއްގެ ވާހަކަ ރައީސްއާ ހިއްސާކުރައްވާފައިވާކަމަށެވެ. އެގޮތުން މިމަސްވެރިކަމުން ލިބޭ އާމްދަނީ ދަށްވުމާއި، މާލެ ފަޅުގެ ދަތިކަން ހިއްސާކޮށްފައިވާކަމަށް އޭނާ ވިދާޅުވިއެވެ.

"އެންމެ ބޮޑު ގޮންޖެހުމަކީ ކަންނެލި މަސްވެރިކަމުގައި ލިބޭ އާމްދަނީ ދަށްވެ އަގުގެ ދަތިކަން. ކަންނެލި އެއް އަގެއްގައި ހިފެހެއްޓިފައި ނެތުން. ސަރުކާރުން ކަނޑައަޅާފައި އޮތް ގޮތަށް ފްލޯ ޕްރައިޒް ކަނޑައެޅުމަށް އެދިވަޑައިގަތިން." ހުސައިން ނަޝީދު ވިދާޅުވިއެވެ.

ހުސައިން ނަޝީދު ވިދާޅުވީ، ބޮޑުކަންނެލީގެ މަސްވެރިންނަށް ދިމާވެފައިވާ ގޮންޖެހުންތައް ހައްލު ކޮށްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ދެއްވާފައިވާކަމަށެވެ. އަދި މިބައްދަލުވުމަކީ ރައީސާއި މަސްވެރިކަމާއި ބެހޭ ވަޒީރާއެކީގައި ބޮޑުކަންނެލީގެ މަސްވެރިންނަށް ދިމާވެފައިވާ ދަތިތައް ހިއްސާކުރަން ލިބުނު ފުރަތަމަ ފުރުސަތުކަން ފާހަގަކުރައްވާފައެވެ.

"ރައީސުލްޖުމްހޫރިއްޔާގެ ފަރާތުން އަޅުގަނޑުމެންނަށް ވަރަށް ޕޮޒިޓިވް ޖަވާބުތަކެއް ލިބުނީ. ވަރަށް ކައިރި މުސްތަޤްބަލުގައި އަޅުގަނޑުމެންގެ ކަނބޮޑުވުންތައް ހައްލު ކޮށްދެއްވަން މަސައްކަތް ކޮށްދެއްވައި އަދި އަޅުގަނޑުމެންނާއި ވަރަށް ކައިރިން މަސައްކަތް ކޮށް ވަރަށް އަވަސް މުސްތަޤްބަލުގައި މިކަންކަމަށް ހައްލު ލިބިގެންދާނެކަމަށް." ހުސައިން ނަޝީދު ވިދާޅުވިއެވެ.

ރާއްޖޭގެ މަސްވެރިކަމުގެ ސިނާއަތު ކުރިއަރުވާއިރު މިސިނާއަތުގައި މަސައްކަތްކުރާ ފަރާތްތަކުގެ އަޑު އައްސަވާނެކަމަށް މި ސަރުކާރުން ވަނީ ހާމަކުރައްވާފައެވެ.