އިސްލާމިކް ޔުނިވަރސިޓީގައި ދިރާސާކުރުމުގެ މަސައްކަތަށް މިއަހަރު 2 މިލިއަން ރުފިޔާ ކަނޑައަޅުއްވާފައިވާކަމަށް ދިވެހިރާއްޖޭގެ އިސްލާމިކް ޔުނިވަރސިޓީން ވިދާޅުވެއްޖެއެވެ.
ދިވެހިރާއްޖޭގެ އިސްލާމިކް ޔުނިވަރސިޓީން ވަނީ ދިރާސާކުރުމުގެ މަސައްކަތްތައް ފަށާ، އެކަމަށްޓަކައި އެހީތެރިކަން ފޯރުކޮށްދޭނެ ޚާއްސަ ފަންޑެއް އުފައްދަވާފައެވެ. މިކަމަށްޓަކައި ސިޔާސަތެއް ކަނޑައަޅާ، މިސިޔާސަތު އިއްޔެ ވަނީ އިޢުލާންކޮށްފައެވެ.
އިސްލާމިކް ޔުނިވަރސިޓީގެ ވައިސް ޗާންސެލަރ ޑޮކްޓަރ މުޙައްމަދު ޝަހީމް އަލީ ސަޢީދު ވިދާޅުވީ، ޤައުމަށް ބޭނުންވެފައިވާ ކަންތައްތަކާއި ގުޅޭ އިސްލާމީ ދިރާސާތަކެއް ކުރަންޖެހޭކަމަށާއި، އެގޮތުން މިޔުނިވަރސިޓީން ކުރާ ދިރާސާތަކަކީ މިސަރަޙައްދުގެ ޤައުމުތަކަށްވެސް ފޯރުކޮށްދެވޭ ފަދަ ދިރާސާތަކަކަށްވުމަކީ އުއްމީދެއްކަމަށެވެ. ދިރާސާ ކުރުމަށް މިފަންޑުގެ އެހީތެރިކަން ލިބޭނީ ޔުނިވަރސިޓީގެ ދާއިމީ ސްޓާފުންނާއި، ދަރިވަރުންގެ ތެރެއިން ދިރާސާކުރުމަށް ކުރިމަތިލާ ފަރާތްތަކުގެ ތެރެއިން އެންމެ ޤާބިލު އަދި އެންމެ ފައިދާހުރި ދިރާސާއެއްކުރުމަށް ހުށަހަޅާ ފަރާތްތަކުގެ ތެރެއިން ހޮވޭ ފަރަތާތްތަކަށްކަމަށް ޝަހީމް ވިދާޅުވިއެވެ.
އިސްލާމިކް ޔުނިވަރސިޓީގައި ކުރެވޭ ދިރާސާކުރުމަށްޓަކައި، މިކަމަށްޓަކައި މުވައްޒަފުން އަހުލުވެރިކޮށްފައިވާކަމަށާ އަދި ޔުނިވަރސިޓީގެ އިލްމީ މަޖައްލާގައި ޝާއިއުކުރެވޭނެކަމަށް އެފަރާތުން ވިދާޅުވެއެވެ. އަދި އެނޫންވެސް ވަސީލަތްތައް ބޭނުންކޮށްގެން މިދިރާސާތައް އާއްމުކުރުމުގެ ފުރުސަތު ދިރާސާ ކުރާ ފަރާތްތަކަށް ލިބިގެންދާނެކަމަށްވެސް އިސްލާމިކް ޔުނިވަރސިޓީން ވިދާޅުވެއެވެ.