ޤާނޫނުތަކަށް ބަދަލުގެނެސް، ތިނަދުއަށް ސިޓީއެއްގެ ދަރަޖަ ދޭނަން: މުޢިއްޒު

ޤާނޫނުތަކަށް ގެންނަންޖެހޭ ބަދަލުތައް ގެނެސް، ގދ. ތިނަދޫއަށް ސިޓީއެއްގެ ދަރަޖަ ދެއްވާނެކަމަށް ޕީ.ޕީ.އެމް ޕީ.އެން.ސީގެ ފަރާތުން ކުރިއަށްއޮތް ރިޔާސީ އިންތިޚާބުގައި ވާދަކުރައްވާ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރިޔާސީ އިންތިޚާބަށް ކެމްޕޭން ކުރެއްވުމަށް އަތޮޅުތަކަށް ކުރައްވާ ދަތުރުފުޅުގެ ތެރެއިން ގދ. ތިނަދޫގައި ރޭ ބޭއްވި ޖަލްސާގައި ވާހަކަދައްކަވަމުން ޑރ. މުޢިއްޒު ވަނީ އެމަނިކުފާނުގެ ވެރިކަމެއްގައި ތިނަދޫގެ ރައްޔިތުން ބޭނުންވާ ތަރައްޤީ ގެނެސްދިނުމުގައި ކާމިޔާބީ ހޯދައިދޭނެކަމަށް ވިދާޅުވިއެވެ.

ޑރ. މުޢިއްޒު ވިދާޅުވީ، ކުރީގެ ރައީސް ޔާމީންގެ ވެރިކަމުގައި ތިނަދޫގެ ތަރައްޤީއަށް އެކަނިވެސް ބިލިއަނަށްވުރެ ގިނަ ރުފިޔާ ޚަރަދުކޮށްފައިވާކަމަށެވެ. އަދި ޢުމްރާނީ ތަރައްޤީގެ ރޮނގުންނާއި، ޚިދުމަތް ދިނުމަށް ހުރި ވަޞީލަތްތަކުގެ ގޮތުން ބެލިނަމަވެސް ސިޓީއަކަށް ބޭނުންވާ ހުރިހާކަމެއް ރައީސް ޔާމީންގެ ވެރިކަމުގައި ތިނަދޫގައި ޤާއިމުކޮށްދީފައިވާކަމަށެވެ.

ޤާނޫނުގައި މިހާރު އޮންނަގޮތުން ސިޓީއެއްގެ ދަރަޖަ ދެވޭނީ އެތަނެއްގެ އާބާދީ 10،000 އިން މަތިކަމަށްވާނަމައެވެ. ނަމަވެސް އެކަށީގެންވާ ވަޞީލަތްތައްހުރެ، އާބާދީ 8000 އިން މައްޗަށް އަރާނަމަ ސިޓީއެއްގެ ދަރަޖަ ލިބެންވާނެކަމަށް ޤަބޫލުކުރައްވާކަމަށް ޑރ. މުޢިއްޒު ވިދާޅުވިއެވެ.

އެހެންކަމުން ކުރިއަށްއޮތް ރިޔާސީ އިންތިޚާބުގައި އެމަނިކުފާނު އިންތިޚާބުކޮށްދެއްވައިފިނަމަ، ޤާނޫނުތަކަށް ގެންނަންޖެހޭ ބަދަލުތައް ގެނެސް، ތިނަދޫއަށް ސިޓީއެއްގެ ދަރަޖަދެއްވާނެކަމަށް ޑރ. މުޢިއްޒު ވަނީ ވަޢުދުވެވަޑައިގެންފައެވެ.

"އަޅުގަނޑު ތިބޭފުޅުންނަށް ދޭ ޔަޤީންކަމަކީ، ތިބޭފުޅުން އަޅުގަނޑަށް އިތުބާރުކޮށް 9 ސެޕްޓެމްބަރު އޮންނަ ވޯޓުގައި އިންތިޚާބުކުރައްވައިފިނަމަ އަޅުގަނޑުމެންގެ ސަރުކާރެއްގައި ޤާނޫނުތަކަށް ގެންނަންޖެހޭ ބަދަލުތަކެއް ގެނެސް ތިނަދޫއަކީ ސިޓީއަކަށް އިރާދަކުރެއްވިއްޔާ ކަނޑައަޅައިދޭނަމޭ. އަޅުގަނޑު ޤަބޫލުކުރަނީ 8000 މީހުން ހަމަވާކަމަށްވަންޏާ ސިޓީއަކަށް ހެދެންވާނެކަމަށް" ޑރ. މުޢިއްޒު ވިދާޅުވިއެވެ.

ޑރ. މުޢިއްޒު ވިދާޅުވީ، ތިނަދޫއަށް ސިޓީއެއްގެ ދަރަޖަ ލިބުމާއެކު ތަރައްޤީގެ ރޮނގުން އިތުރު ދޮރުތަކެއްވެސް ހުޅުވިގެންދާނެކަމަށެވެ. އަދި ތިނަދޫއާއި ހުވަދުއަތޮޅުގެ ތަރައްޤީއަށް އެމަނިކުފާނު ގެންގުޅުއްވާ ތަޞައްވުރު ވަނީ ހިއްސާކުރައްވާފައެވެ.

އޭގެ ތެރޭގައި ކާޑެއްދޫ އެއަރޕޯޓު އިތުރަށް ތަރައްޤީކުރުމާއި، މަސްވެރިންނަށް ބޭނުންވާ ވަޞީލަތްތައް ޤާއިމުކޮށްދިނުމާއި، 10،000 އެނދާއެކު ޓޫރިޒަމްގެ ހަބަކަށް ހެދުން ހިމެނެއެވެ. އަދި ޓަރޝަރީ ފެންވަރަށް ހޮސްޕިޓަލް ބަދަލުކޮށް، ކުޅިވަރުގެ ގިނަ ވަޞީލަތްތައް ޤާއިމުކޮށްދެއްވާނެކަމަށްވެސް ޑރ. މުޢިއްޒު ވިދާޅުވިއެވެ.

މި ޖަލްސާގައި ޑރ. މުޢިއްޒު ވަނީ އެމަނިކުފާނުގެ ސަރުކާރެއްގައި އިޤްތިޞާދީ އިޖްތިމާޢީ ދާއިރާއިން ގެންގުޅުއްވާނެ ބައެއް މުހިންމު ސިޔާސަތުތަކުގެ މައްޗަށްވެސް އަލިއަޅުއްވާލައްވާ ވާހަކަދައްކަވާފައެވެ.

އެގޮތުން ކާޑުން ޑޮލަރު ނެގޭ ލިމިޓް އުވާލެއްވުމާއި، އުމުރުން 55 އަހަރާއި 65 އަހަރާއި ދެމެދުގައި ވަޒީފާއިން އަމިއްލައަށް ރިޓަޔާކުރާ މީހުންނަށް ޚާއްސަ އެލަވެންސެއް ތަޢާރަފުކުރައްވާނެކަމަށް ވިދާޅުވިއެވެ. އަދި ޖުޑީޝަލް ސަރވިސް ކޮމިޝަންގައި ސިޔާސީ މީހުން މަދުކޮށް ޝަރުއީ މީހުން ގިނަކުރައްވާނެކަމަށާއި، ފަނޑިޔާރުންނަށް ޚާއްސަކޮށް ބޯހިޔާވަހިކަމުގެ މަޝްރޫޢެއް ހިންގަވާނެކަމަށްވެސް އެމަނިކުފާނު ވިދާޅުވިއެވެ.