ކާބޯތަކެއްޗަށް ޚާއްސަކޮށްގެން ރާއްޖޭގައި ބާއްވާ އެންމެބޮޑު އެއް ޝޯވ "ފުޑް އެންޑް ބެވަރޭޖް" ޝޯއަށް ރައީސުލްޖުމްހޫރިއްޔާގެ ނައިބް ފައިޞަލް ނަޞީމް ޒިޔާރަތްކުރައްވައިފިއެވެ.
ހައިރައިޒްއިން އިންތިޒާމްކޮށްގެން ކުރިއަށްގެންދާ ފުޑް އެންޑް ބެވަރޭޖް ޝޯ މިފަހަރު ކުރިއަށްދަނީ ހުޅުމާލެ ސެންޓްރަލް ޕާކްގައެވެ. މާދަމާގެ ނިޔަލަށް ކުރިއަށްގެންދާ މި ޝޯއަށް ރައީސުލްޖުމްހޫރިއްޔާގެ ނައިބް ފައިޞަލް ނަޞީމްވަނީ ޒިޔާރަތްކުރައްވާ އެތަނުގެ ހުރި ސްޓޯލްތަކަށް ޒިޔާރަތްކުރައްވާ އެތަންތަނުގައި ހުރި ކާބޯތަކެތީގެ ބާވަތްތަކުގެ މަޢުލޫމާތުތައް އޮޅުން ފިލުއްވާފައެވެ.
އެފްއެންޑްބީ ޝޯގައި މިއަހަރު 26 ކުންފުންޏަކުން ބައިވެރިވެއެވެ. މި ޝޯއަށް ޒިޔާރަތްކުރާ ފަރާތްތަކަށް އެކި ޕްރޮޑަކްޓުތައް ބަލައި ތަޖުރިބާކޮށްލުމާއި، އެކި ކުންފުނިތަކުން ކުރިއަށްގެންދާ ޕްރޮމޯޝަންތަކުގައި ބައިވެރިވުމުގެ ފުރުސަތު ލިބިގެންދެއެވެ.
މިޝޯ މެދުވެރިކޮށް އެފްއެންޑްބީ ދާއިރާގެ ޚިދުމަތްތަކާއި އުފެއްދުންތައް ޕްރޮމޯޓްކޮށް މާކެޓް ހޯދުމަށް މަގުފަހިވެގެންދާނެއެވެ. އަދި އެފްއެންޑްބީ ދާއިރާގައި މަސައްކަތްކުރާ ކުންފުނިތަކަށް އެމީހުންގެ ޕްރޮޑަކްޓްތަކާއި ޚިދުމަތްތައް އިޝްތިހާރުކޮށް މާކެޓް ހޯދުމުގެ ފުރުސަތު ފަހިކޮށްދިނުން މިޝޯ ބޭއްވުމުގެ ބޭނުންތަކުގެ ތެރޭގައި ހިމެނެއެވެ.
މިއީ އެފްއެންޑްބީ ޝޯ ބާއްވާ 6 ވަނަ އަހަރެވެ.