ރާއްޖޭގެ އުތުރުގައި ޒަމާނީ ފެންވަރަށް ތަރައްޤީކުރާ ހަނިމާދޫ އިންޓަރނޭޝަނަލް އެއަރޕޯޓާއެކު އުތުރުގެ ފަތުރުވެރިކަން ދިރިގެންދާނެކަމަށް މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީގެ ޗެއާމަން މުހައްމަދު އުމަރު މަނިކު ވިދާޅުވެއްޖެއެވެ.
އުމަރު މަނިކު މިހެން ވިދާޅުވީ މަޓީގެ އަހަރީ އާންމު ޖަލްސާގައި ޕީއެސްއެމް ނިއުސްއަށް ދެއްވި އިންޓަވިއުއެއްގައެވެ.
މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ، މަޓީގެ އަހަރީ އާންމު ޖަލްސާއަށްފަހު ޕީއެސްއެމް ނިއުސްއާ ވާހަކަފުޅުދައްކަވަމުން މަޓީގެ ޗެއާމަން މުހައްމަދު އުމަރު މަނިކު ވިދާޅުވީ ނިމުނު އަހަރެކޭ އެއްފަދައިން މިއަހަރަކީ ފަތުރުވެރިކަމުގައި ފާހަގަކޮށްލެވޭނެ އަހަރެއްކަމަށެވެ. އަދި މިސިނާޢަތުގައި ހުރި ގޮންޖެހުންތައް ހައްލުކުރުމަށް މަޓީން އަބަދުވެސް މަސައްކަތް ކުރާނެކަމަށް އުމަރު މަނިކު ވިދާޅުވިއެވެ.
އުމަރު މަނިކު ވިދާޅުވީ، ރާއްޖޭގެ އުތުރާއި ދެކުނުގައި ސަރުކާރުން ހިންގާ މަޝްރޫއުތަކުގެ ސަބަބުން އެސަރަހައްދުތަކުގައި ފަތުރުވެރިކަން ފުޅާކުރެވިގެންދާނެކަމަށެވެ. އެގޮތުން، ސަރުކާރުން އުތުރުގައި ތަރައްޤީކުރާ ހަނިމާދޫ އިންޓަނޭޝަނަލް އެއަރޕޯޓާއި ދެކުނުގެ ގަން އިންޓަރނޭޝަނަލް އެއަރޕޯޓްގެ މަޝްރޫޢު އުމަރު ވަނީ ފާހަގަކުރައްވާފައެވެ.
" އުތުރުގައި އަދި ފުރަތަމަ ފަހަރަށް ޓޫރިޒަމް މިފެށެނީ ރަނގަޅަށް. އޭގެ ކުރީގައި އުތުރގައި ފަތުރުވެރިކަން އެހާ ބޮޑަކަށް ނެތް. އެހެންވީމަ އަޅުގަނޑަށް ހީވަނީ މީ ވަރަށް ރަނގަޅު ފިޔަވަޅެއްހެން. ޚާއްސަކޮށް ހަނިމާދޫ އެއަރޕޯޓް ހެދުމާއި މިކަންތަކާއިއެކު އުތުރު ދިރިގެންދާނެ. " އުމަރު މަނިކު ވިދާޅުވިއެވެ.
ރާއްޖޭގެ އުތުރުގައި ފަތުރުވެރިކަން ފޫޅާކުރުމަށް ސަރުކާރުން ކުރާ މަސައްކަތްތަކުގެ ދަށުން، ހަނިމާދޫ އިންޓަރނޭޝަން އެއަރޕޯޓު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ އަމަލީ މަސައްކަތް ފަށާފައިވަނީ މިދިޔަ މަހުގެ 18ވަނަ ދުވަހުއެވެ. މި މަޝްރޫޢުގެ ދަށުން ހަނިމާދޫގައި 2.46 ކިލޯމީޓަރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭނެ ޒަމާނީ ޓަރމިނަލަކާއި އެއަރޕޯޓަށް ބޭނުންވާނެ އެހެނިހެން ވަސީލަތްތައް ޤާއިމުކުރެވިގެންދާނެއެވެ. މިއީ ރާއްޖޭގެ ތާރީޚުގައިވެސް މާލޭ ސަރަޙައްދުން ބޭރުގައި ހިންގާ އެންމެ ބޮޑު ތަރައްޤީގެ މަޝްރޫޢެވެ
މަޓީގެ 33 ވަނަ އަހަރީ އާންމު ޖަލްސާގައި ވަނީ އެކުންފުނީގެ ހިންގާ ބޯޑަށް މެމްބަރުން އައްޔަންކޮށްފައެވެ. އަދި ފަތުރުވެރިކަމުގެ 50 އަހަރު ދުވަހުގެ ދިގު ތާރީޚާ ބެހޭ 2 ފޮތް ވަނީ އިފްތިތާހުކޮށްދެއްވަފައެވެ. މިފޮތް އިފްތިތާހްކޮށްދެއްވީ ޗެއަރމަން އުމަރު މަނިކާއި ޓޫރިޒަމް މިނިސްޓަރ ޑރ.އަބްދުﷲ މަޢުޞޫމްއެވެ.
މި ފޮތްތަކާއި ބެހޭގޮތުން ވާހަކަދައްކަވަމުން މަޓީގެ މަޓީގެ ސެކްރެޓަރީ ޖެނެރަލް އަހުމަދު ނަޒީރު ވިދާޅުވީ މަޓީގެ ފަތުރުވެރިކަމުގެ 50 އަހަރުގެ ތާރީޚާ ބެހޭ ފޮތެއް އިފްތިތާހްކުރެވުމަކީ ވަރަށް ފަހުރުވެރިވާކަމެއްކަމަށެވެ.
" ރާއްޖޭގެ ފަތުރުވެރިކަމުގެ ތާރީޚާ ގުޅޭ ފޮތެއް އެކުލަވައިލައި ފޮތެއް ޝާއިއުކުރުމުގެ ޚިޔާލު އެންމެ ފުރަތަމަ ދެކެވުނީ 2020 ވަނަ އަހަރުގެ ފަހުކޮޅު މަޓީގެ އެގެޒެކެޓިވް މެމްބަރުންގެ ތެރޭގައި. އަޅުގަނޑުމެންގެ މަޝްވަރާތައް ކުރިއަށް ދިޔަވަރަކަށް، އަޅުގަނޑުމެން ނިންމީ، ވަކިން ދެ ފޮތެއް ޝާއިޢުކުރަން. އެއް ފޮތަކީ ރާއްޖޭގެ ރިސޯޓްގެ އާކިޓެކްޗަރަލް އިވޮލިއުޝަން ޑޮކިއުމެންޓްކުރުމާއި، ރާއްޖޭގެ ފަތުރުވެރިކަމުގެ ސިނާއަތުގެ ކުރިއެރުން ދައްކުވައިދޭ ފޮތެއް" އަހުމަދު ނަޒީރު ވިދާޅުވިއެވެ.
މަޓީގެ 33 ވަނަ އަހަރީ އާންމު ޖަލްސާގައި އެކުންފުނީގެ އިސް މުވައްޒަފުންނާއި، އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދުގެ އިތުރުން، ފަތުރުވެރިކަމުގެ ސިނާއަތުގައި ހަރާކަތްތެރިވާ އިސް ވެރިން ވަނީ ބައިވެރިވަޑައިގެންފައެވެ.
މޯލްޑިވްސް އެސޯސިއޭޝަން ފޯ ޓޫރިޒަމް އިންޑަރސްޓްރީ، މަޓީއަކީ ރާއްޖޭގެ ރިސޯޓްތައް ތަމްސީލްކުރާ މައި ޖަމުއިއްޔާއެވެ.