ގަލްފުގެ ޤައުމެއްގައި ޢަމަލީ ތަޖުރިބާ ހޯދުމުގެ ފުރުޞަތާއެކު، ބޯޓިން ދާއިރާއިން ތަމްރީންވުމުގެ ފުރުޞަތު ދިވެހި 10 ޒުވާނުންނަށް ދީފިއެވެ.
މި ފުރުޞަތަކީ ހައުސިން ޑިވެލޮޕްމަންޓް ކޯޕަރޭޝަން އެޗްޑީސީއާއި، މޯލްޑިވްސް އިންޓަގްރޭޓެޑް ޓުއަރިޒަމް ޑިވެލޮޕްމަންޓް ކޯޕަރޭޝަން އެމްއައިޓީޑީސީ އަދި ބޭރުގެ އިންސްޓިޓިއުޓަކާއި ގުޅިގެން ފަހިކޮށްދީފައިވާ ފުރުޞަތެކެވެ.
ހައުސިން ޑިވެލޮޕްމަންޓް ކޯޕަރޭޝަންގައި ބޭއްވި ރަސްމިއްޔާތެގައި، "އަރބަން ޔޫތް ޕްރޮގްރާމް"އަށް ހޮވުނު 10 ބައިވެރިންނާ ވަނީ ލިޔުން ހަވާލުކޮށްފައެވެ. މީގެތެރޭގައި ހިމެނެނީ 18 އަހަރާއި 35 އަހަރާއި ދެމެދުގެ ޒުވާނުންނެވެ.
މި ޕްރޮގްރާމްގެ މަޤުޞަދަކީ ހުނަރުވެރި ހަރުދަނާ ޒުވާނުން ބިނާކުރުމެވެ. އަދި ޕްރޮގްރާމް ފުރިހަމަކުރުމުން ދުނިޔޭގެ ކޮންމެތާކުވެސް މޮޓޯބޯޓު އޮޕަރޭޓްކުރެވޭނެ ރޯޔަލް ޔޮޓިން އެސޯސިއޭޝަންގެ ލައިސަންސް ހޯދުމުގެ ފުރުޞަތު ލިބޭނެއެވެ.
އެޗްޑީސީގެ މެނޭޖިން ޑިރެކްޓަރ އަޙުމަދު އާތިފް ވިދާޅުވީ މި ކުރަމުންދާ މަސައްކަތަކީ ސަރުކާރުގެ ސިޔާސަތާއި އެއްގޮތަށް، ރާއްޖޭގައި ހުރި ފުރުޞަތުތަކަށް ދިވެހި ޒުވާނުން އުފެއްދުންކަމަށެވެ. މިއާއި އެއްގޮތަށް އެޗްޑީސީން ފަށާފައިވާ އެކިއެކި ޕްރޮގްރާމްގެތެރެއިން މިހާތަނަށްވެސް، އިންޓަރންޝިޕާއި އެޕްރެންޓިސްޝިޕް ޕްރޮގްރާމްތަކުން ގިނަ ޒުވާނުންތަކެއް ވަޒީފާގެ މައިދާނަށް ނެރެފައިވާކަމަށް އޭނާ ވިދާޅުވިއެވެ.
ބައިނަލްއަޤްވާމީ ފެންވަރުގެ މިފަދަ ޕްރޮގްރާމެއް މީގެކުރިން އެޗްޑީސީން ބައިވެރިވެ ހިންގާފައި ނުވާކަން ފާހަގަކުރައްވާ އާތިފް ވިދާޅުވީ، މިއީ އިންޓަނޭޝަނަލް ލައިސެންސެއް ލިބޭގޮތަށް ހިންގާ މިފަދަ ފުރަތަމަ ޕްރޮގްރާމްކަމަށެވެ. އަދި ބޯޓިން މި ދާއިރާއަކީ، ރާއްޖޭގައި ގިނަ ފުރުޞަތުތައް ހުރި ދާއިރާއެއްކަން އާތިފް ފާހަގަކުރެއްވިއެވެ.
"އެޗްޑީސީގައި މި ފަށާ ތަރައްޤީގެ މަސައްކަތްތަކުގައި، ބޯޓިން މި ދާއިރާއާއި ގުޅޭ ވަޒީފާތައްވެސް އުފެދިގެންދާނެ. ހޮސްޕިޓަލިޓީ ދާއިރާއިން އެޗްޑީސީން އަރބަން އައިލް ލޯންޗްކޮށްފި، ޕިކްނިކް އައިލެންޑް އަދި ޔޮޓް މެރީނާއާއި އެކު މިފަދަ އިތުރު ވަޒީފާތައް އުފެދުމަށް މަގަކަށްވާނެ." އާތިފް ވިދާޅުވިއެވެ.
އެމްއައިޓީޑީސީގެ މެނޭޖިން ޑިރެކްޓަރ މުޙައްމަދު ރާއިދު ވިދާޅުވީ، މި ޕްރޮގްރާމުގެ 10 ބައިވެރިންނަށް ގަލްފުގެ ޤައުމެއްގައި ތަމްރީނާއި ޢަމަލީ ތަޖުރިބާ ޙޯދުމުގެ ފުރުޞަތު ލިބޭނެކަމަށެވެ. އަދި މިކަމުގެ ހުރިހާ ޚަރަދެއްވެސް ކުރާނީ އެ ޤައުމުންކަމަށް ރާއިދު ވިދާޅުވިއެވެ.
"މިފަދަ ޕްރޮގްރާމެއްގައި ސަޢުދީގެ ރިއާދުގެ މެރިނާގައި ދިވެހި 15 ޒުވާނަކު އެބަ ތަމްރީންވޭ. ޕްރޮގްރާމްގެ އެންމެ މޮޅު ޓީމަކީ ދިވެހި ބައިވެރިންގެ ޓީމްކަން ފާހަގަކޮށް އެފަރާތުން ލިޔުމެއްވެސް ވަނީ ފޮނުވާފައި. މިއީ ލަންކާ، ބަންގްލަދޭޝަން، ސައުތް އެފްރިކާގެ ހިސާބުން ކުދިން ބައިވެރިވާ ޕްރޮގްރާމެއް." ރާއިދު ވިދާޅުވިއެވެ.
ބޯޓިން ދާއިރާގެ ތަމްރީން ޕްރޮގްރާމްގެ ބައިވެރިންނަށް 2 ދުވަހުގެ ތިއެރެޓިކަލް ޓްރެއިނިންއެއް ދޭނެއެވެ. އަދި ރާއްޖެއިން ބޭރުގައި 10 ހަފްތާގެ ޢަމަލީ ތަޖުރިބާގެ ސެޝަންތައް ކުރިއަށްގެންދާނެއެވެ. މި ޕްރޮގްރާމް ފުރިހަމަކުރާ ޒުވާނުންނަށް ގަލްފްގެ ގައުމެއްގައި މަސައްކަތްކުރުމުގެ ފުރުޞަތު ލިބޭނެއެވެ.