ކޯވިޑް-19އިން ދިފާއުވުމަށް ޖަހާ ވެކްސިންގެ ތިންވަނަ ޑޯޒް ނުވަތަ ބޫސްޓަރ ޑޯޒް ނުޖަހާނަމަ 14 ދުވަހަށް ކަރަންޓީނުވާން ޖެހޭގޮތަށް ކަނޑައެޅުމަށް މަޝްވަރާ ކުރަމުންދާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭއިން) ވިދާޅުވެއްޖެއެވެ.
ޕީއެސްއެމް ނިއުސްއަށް މައުލޫމާތު ލިބިފައިވާ ގޮތުގައި، އެޗްޕީއޭއިން މިހާރުދަނީ ބޫސްޓަރ ޑޯޒް ޖެހުމަށް ޝަރުތު ހަމަވެފައިވާ، ނަމަވެސް މިހާތަނަށް ޖަހާފައިނުވާ މީހުންނަށް ވެކްސިންގެ ޑޯޒްތައް ފުރިހަމަކޮށްފައިވާ މީހުންނަށް ލިބިދޭ ލުއިތަކުން އުނިކުރުމަށް މަޝްވަރާ ކުރަމުންނެވެ. މިހާރު ޕޮޒިޓިވްވާ މީހުން 7 ދުވަހުގެ ކަރަންޓީނެއްގައި މަޑުކޮށް ކޮންޓްކްޓެއްނަމަ 10 ދުވަހުގެ ކަރަންޓީނެއްގައި އަންނަނީ މަޑުކުރަމުންނެވެ. އޭގެ ބަދަލުގައި މިހާރު ބޫސްޓަރ ޑޯޒް ނުޖަހާ ފަރާތްތަކުން ކަރަންޓީނު ވާންޖެހޭ މުއްދަތު 14 ދުވަހަށް އިތުރުކުރުމަށް އަންނަނީ މަޝްވަރާ ކުރަމުންނެވެ.
ކޯވިޑްގެ ބޫސްޓަރ ޑޯޒް ޖަހަން މަޖުބޫރުކޮށް ފިޔަވަޅު އަޅަން ނިންމާފައިވާ އެންމެ ބޮޑު ސަބަބަކީ ކޯވިޑްގެ ހަތަރުވަނަ ރާޅާއެކު ބަލިޖެހޭ މީހުންގެ ޢަދަދު ދެގުނައަށް އިތުރުވަމުންދާ ދަނޑިވަޅަކަށް ވުމުންނެވެ. ނަމަވެސް މި އުސޫލަށް ކަނޑައެޅިގެން ޢަމަލުކުރަން ފަށާނެ ދުވަހެއް އަދި އެނގިފައެއް ނުވެއެވެ.
ކޯވިޑް ވެކްސިންގެ ބޫސްޓަރ ޑޯޒް މިދިޔަ އޮކްޓޯބަރު މަހުގެ ހަތަރަކުން ފެށިގެންވަނީ ޖަހަންފަށާފައެވެ. އެގޮތުން އެންމެ ފުރަތަމަ ބޫސްޓަރ ޑޯޒް ޖަހަމުންދިޔައީ ފްރޮންޓްލައިންގައި މަސައްކަތްކުރާ ސިއްހީ ޚިދުމަތްތެރިންނާއި 50 އަހަރުން މަތީގެ މީހުންނާއި ދިފާޢީ ނިޒާމު ބަލިކަށި މީހުންނެވެ. ނަމަވެސް މި މަހުގެ 15ވަނަ ދުވަހުން ފެށިގެން 18 އަހަރުން މަތީގެ މީހުންނަށް ޢާންމުކޮށް ވެކްސިންގެ ބޫސްޓަރ ޑޯޒް ޖެހުމަށް ވަނީ ހުޅަވާލާފައެވެ. އެގޮތުން މިހާތަނަށް 49142 މީހަކު މިވަނީ ބޫސްޓަރ ޑޯޒް ޖަހާފައެވެ.
ކޯވިޑްގެ އައު ވޭރިއަންޓް، އޮމިކްރޯން ހަލުވިކަމާއިއެކު ފެތުރެމުންދާ މިދުވަސްވަރު މާލޭގެ އިތުރުން އަތޮޅު ތެރޭގައިވެސް ބަލިޖެހޭ މީހުންގެ ޢަދަދު މިހާރު މިވަނީ މައްޗަށް ގޮސްފައެވެ. އެގޮތުން ރާއްޖޭގައި ކޯވިޑް ޖެހުނު މީހުންގެ ޢަދަދު މިހާރު މިވަނީ އެއްލައްކައަށްވުރެ އިތުރުވެފައެވެ.