ސްކޫލްތަކުގެ ފުރަތަމަ ޓާމްގެ ބަންދަށްފަހު ސްކޫލްތަކުގައި ކިޔަވައިދޭން މިއަދު ފަށައިފިއެވެ. މިއަދު ހެނދު ރާއްޖޭގެ ހުރިހާ ސްކޫލެއްގައި ކިޔަވައިދޭން މިފެށީ 21 ދުވަހުގެ ޗުއްޓީއަކަށްފަހުއެވެ.
ސްކޫލްތަކުގައި ކިޔަވައިދޭން ފަށަފައިވަނީ ކޯވީޑްގެ މިހާރުގެ ހާލަތާއި ގުޅިގެން އަޅަފައިވާ ގިނަ ފިޔަވަޅުތަކާއެކުއެވެ. މިގޮތުން މާލެ ސަރަޙައްދުގެ ސްކޫލްތަކުގައި ހަފްތާއަކު މަދުވެގެން ދެދުވަހު ދަރިވަރުން ސްކޫލަށް ހާޒިރުވެގެން ކިޔަވައިދިނުމާއި ސެޝަންތައް ކުރުކުރުމަށް އެޑިއުކޭޝަނުން ވަނީ އަންގާފައެވެ. އަދި މި ދަނޑިވަޅުގައި އިތުރު ހަރަކާތްތަކާއި އެއްވެގެން ކުރާ ކަންތައްތައް ކުރިއަށް ނުގެންދިޔުމާއި ކްލާސްރޫމްތަކުގައި 3 ފޫޓް ދުރުމިން ބަހައްޓައިގެން ކިޔަވއިދިނުމުގެ އިތުރުން އަތްދޮވެވޭނެ އިންތިޒާމްތަކާއި ހުންބެލުމާއި ސެނިޓައިޒް ކުރެވޭނެ އިންތިޒާމްތައް ހަމަޖެއްސުމަށް އަނެއްކާވެސް މިވަނީ އަންގަވާފައެވެ. މިއީ ދަރިވަރުންގެ ހައްޤުގައި އެކުދިންގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ކުރާ މަސައްކަތްތަކެވެ. އަނެއްކާވެސް އިހުގެ ހާލަތަށް ނުދިއުމަށް ކުރެވޭ މަސައްކަތްތަކެވެ.
އެޑިއުކޭޝަން މިނިސްޓަރ ޑރ.ޢާއިޝަތު ޢަލީ ވިދާޅުވީ ސްކޫލްތަކުގައި ކިޔަވައިދޭން ފަށާފައިވަނީ ސްކޫލްތަކަށާއި ދަރިވަރުންނަށް ބޭނުން ހުރިހާ އިންތިޒާމްތަކާއި ވަސީލްތަތަކާއެކު ކަަމަށެވެ.
ދެވަނަ ޓާރްމެގ ކިޔެވުން ފެށިއިރު ޢަރަބިއްޔާ ސްކޫލްގެ ދަރިވަރުންނަށް ކިޔަވައިދޭން ފަށާފައިވަނީ ފޮރިން މިނިސްޓްރީ ވަގުތީ ގޮތުން ހިންގި ޢިމާރާތުގައެވެ. އެތަންވެސް ވަނީ ދަރިވަރުންނަށް ބޭނުންވާ ވަސީލަތްތަކާއެކު ސްކޫލެއްގެ މާހައުލަކަށް ބަދަލުކޮށްފައެވެ.
ސްކޫލްތަކުގައި ކިޔަވަން ފެށީ ރައްކާތެރިކަމުގެ ގިނަ ފިޔަވަޅުތަކާއެކުކަމަށް ވާއިރު، މިފަދަ ފިޔަވަޅުތައް އަޅާފައި ހުއްޓަސް ދަރިވަރުންނާއި މުދައްރިސުން އަދި ބެލެނިވެރިންވެސް ސަމާލުކަންދޭންވީ ކަންކަން ގިނައެވެ.
މިގޮތުން މުދައްރިސުންނާއި ދަރިވަރުން ސްކޫލްގައި ހޭދަކުރާ ވަގުތުތަކުގައި އަބަދުވެސް މާސްކް އެޅުމާއި ސާފުތާހިރުކަމަށް ސަމާލުވާންވާނެއެވެ. އަދި އެއްވެސްކަހަލަ ބަލީގެ އަލާމާތެއް ހުރެއްޖެނަމަ ސްކޫލްއަށް ނުގޮސް އެކަހެރިވުން މުހިއްމެވެ. ދަރިންގެ ކިބައިން އެއްވެސް އަލާމާތެއް ފެނިއްޖެނަމަ އެ ދަރިވަރުން ސްކޫލަށް ނުފޮނުވުމަކީ ބެލެނިވެރިންގެ ޒިންމާއަކަށް ހަދަންޖެހެއެވެ. އަދި ބަލި ހާލަތުގައި ބެލެނިވެރިންވެސް ސްކޫލްދޮށައް ދަރިވަރުން ބަލާ ދިއުމަކީ މިދަނޑިވަޅުގައި ރައްކާތެރިކަމެއް ނޫނެވެ.