މާލޭގައި ހަދަމުންދިޔަ ޢިމާރާތެއްގެ މަތިން ސިމެންތި ބަސްތާއެއް ވެއްޓި ބަންގްލަދޭޝްގެ ކުޑަކުއްޖެއް ކަމަށްވާ ރައުޝަން ޖިއާން މަރުވި މައްސަލައިގައި ޑަބްލިއު ކޮންސްޓްރަކްޝަނުން ބަދަލުގެ ގޮތުގައި 4.2 މިލިއަން ރުފިޔާ ދިނުމަށް ސިވިލް ކޯޓުން ޙުކުމްކޮށްފިއެވެ.
ބަންގްލަދޭޝްގެ ރައްޔިތެއްކަމަށްވާ ޢުމުރުން 7 އަހަރުގެ ރައުޝާން ޖިއާން 2018 އަހަރުގެ ޑިސެމްބަރު މަހުގެ 17 ވަނަ ދުވަހު މަރުވެފައި ވަނީ ޑަބްލިއު ކޮންސްޓްރަކްޝަންސް ކުންފުނިން މާލޭގައި ޢިމާރާތް ކުރަމުންދިޔަ މ.ނަލަހިޔާ މަންޒިލްގެ ފަސްވަނަ ބުރިން ސިމެންތި ބަސްތާއެއް ވެއްޓި އެކުއްޖާގެ ބޮލުގައިޖެހި ލިބުނު ޒަޚަމްތަކަށް އައިޖީއެމްއެޗުގައި ފަރުވާދެމުންދަނިކޮށެވެ.
ރައުޝަން ޖިއާންގެ މަރުގެ މައްސަލައާއި ގުޅިގެން އެކުއްޖާގެ އާއިލާގެ ފަރާތުން ސިވިލް ކޯޓުގައި ދައުވާކޮށްފައިވަނީ ބަދަލުގެ ގޮތުގައި 17.4 މިލިއަން ރުފިޔާގެ ބަދަލެއް ނަގައިދިނުމަށެވެ. ސިވިލް ކޯޓުން އިއްޔެ ކުރި ޙުކުމުގައި ވަނީ ޖިއާންގެ މަންމަ ޑރ.ފަރްޒާނާ ހުސެއިން އާއި ބައްޕަ ކަމާލުއްދީން ޖާވިދުއަށް ދެ މަސް ދުވަހުގެ ތެރޭގައި އެފައިސާ ދެއްކުމަށް ޑަބްލިއު ކޮންސްޓްރަކްޝަންގެ މައްޗަށް ޢަމުރުކުރާކަމަށެވެ.
ފަނޑިޔާރު އަލީ ނަސީރު ކުރެއްވި ޙުކުމުގައި ވަނީ ޖިއާންގެ އާއިލާއަށް ބަދަލު ނަގައިދީފައި ވަނީ ތިން ކަމެއްގެ މައްޗަށް ބިނާކޮށްކަމަށެވެ. އެއީ ޖިއާން މަރުވުމުގެ ސަބަބުން ދަރިފުޅުގެ ލޯތްބާއި ދެމީހުންގެ ތެރޭގައި އޮންނާނެ ގުޅުން ނެތިދިޔުމުން ލިބުނު ގެއްލުމަށް ނަގައިދިން 1،028،000 ރުފިޔާއާއި، އާއިލާއަށް ލިބުނު ތަދާއި ވޭނުގެ ބަދަލުގެ ގޮތުގައި ނަގައިދިން 2،196،361 ރުފިޔާއާއި، ޖިއާން ދުނިޔޭގައި ހުރި ނަމަ މަސައްކަތްކޮށްގެން ލިބޭނެ ކަމަށް ލަފާ ކުރާ 1،290،361 ރުފިޔާއާއި ފަރްޒާނާގެ ބޭސް ފަރުވާއަށް ޚަރަދުވި 42،318 ރުފިޔާއެވެ.
ސިވިލް ކޯޓުގެ ޙުކުމުގައި ވަނީ ޖިއާން ނިޔާވީ ޑަބްލިއު ކޮންސްޓްރަކްޝަންގެ މުވައްޒަފުންތަކެއް، އެ ކުންފުނީގެ ރަސްމީ މަސައްކަތުގެ ތެރެއިން ފަރުވާކުޑަ ކުރުމުގެ ސަބަބުންކަން ޖިނާއީ މިންގަނޑުން ޝރީއަތަށް ސާބިތުވާކަމަށެވެ. އަދި އެކަމުގެ ސަބަބުން ޖިއާންގެ މައިންބަފައިންނަށް ލިބިފައިވާ ގެއްލުމުގެ މަދަނީ މަސްއޫލިއްޔަތު ވައިކޭރިއަސް ލައިބިލިޓީގެ ދަށުން ޑަބްލިއު ކޮންސްޓްރަކްޝަން އުފުލަންޖެހޭކަން ސާބިތުވާކަމަށްވެސް ސިވިލް ކޯޓުގެ ޙުކުމުގައިވެއެވެ.
މާލޭގައި ހަދަމުން ދިޔަ އިމާރާތަކުން ސިމެންތި ބަސްތާއެއް ވެއްޓި ލިބުނު އަނިޔާތަކަށް ފަރުވާދެމުންދަނިކޮށް މަރުވި ރައުޝަން ޖިއާންގެ މަރުގެ މައްސަލައިގައި ދައުލަތުން އުފުލި ދައުވާ ސާބިތުވެ އެއް ބިދޭސީއަކު 6 އަހަރަށް ޖަލަށްލާން ހުކުމްކުރިއިރު އިތުރު ބިދޭސީއަކު 3 އަހަރަށް ޖަލަށްލުމަށް ވަނީ ހުކުމްކޮށްފައެވެ. ދެން މި މައްސަލާގައި ހިމެނޭ އަނެއް ދެ ބީދޭސީން ވަނީ 7200 ރުފިޔާއިން ޖޫރިމަނާކޮށްފައެވެ.
ޖިއާން މަރުވި ހާދިސާއަށްފަހު ސަރުކާރުން ވަނީ އިމާރާތް ކުރުމުގެ ދާއިރާގެ ސަލާމަތީ ކަންކަން އިތުރަށް ވަރުގަދަ ކުރުމަށްޓަކައި ގިނަ ފިޔަވަޅުތަކެއް އަޅާފައެވެ. އަދި ޖިއާން މަރުގެ މައްސަލާގައި ޑަބްލިއު ކޮންސްޓްރަކްޝަން ކުންފުނި ވަނީ ފަސްލައްކަ ރުފިޔާއިން ޖޫރިމަނާވެސްކޮށްފައެވެ.