ކޮޕް 21 ސަމިޓަކީ މޫސުމަށް އަންނަ ބަދަލުތައް ކުޑަކޮށް އެންމެން އެއްބަސްވާ ޤާނޫނީ އެއްބަސްވުމަކަށް އަންނަން ލިބޭ ފަހު ފުރުސަތުކަމަށް އެންވަޔަރްމަންޓް މިނިސްޓަރ ތޯރިޤް އިބްރާހިމް ވިދާޅުވެއްޖެއެވެ.މިހާރު ފްރާންސްގެ ވެރިރަށް ޕެރިހުގައި ކުރިއަށްދާ ކޮޕް 21 ގައި އެއޯސިސްގެ ރިޔާސަތު ބަލަހައްޓާ ޤައުމުގެ ޙައިސިއްޔަތުން ވާހަކަދައްކަވަމުން މިނިސްޓަރ ތޯރިޤް ވިދާޅުވީ މޫސުމަށް އަންނަ ބަދަލުތަކުގެ ނޭދެވޭ އަސަރުން ސަލާމަތްވާން އޮތް ހަމައެކަނި ގޮތަކީ މިހާރުން މިހާރަށް ހަރުދަނާ ފިޔަވަޅުތަކެއް އެޅުންކަމަށެވެ.މިނިސްޓަރ ވިދާޅުވީ މޫސުމަށް އަންނަ ބަދަލުތަކުގެ ސަބަބުން މީގެކުރިން ދުވަހަކުވެސް ކުދި ޤައުމުތަކަށް އެކަމުގެ ނޭދެވޭ އަސަރު ނުކުރާ ވަރަށް މިހާރުކުރަމުންދާކަމަށާއި އެގޮތުން ރެކޯޑް މިންވަރަކަށް ތޫފާނާއި ސައިކްލޯން ޕެސިފިކް ޤައުމުތަކަށް އަރާފައިވާކަމަށެވެ. އަދި އިންޑިޔާ ކަނޑުގެ ޤައުމުތަކުގައި މީގެ ކުރިން ދުވަހަކުވެސް ފެންބޮޑުނުވާ ވަރަށް ފެންބޮޑުވެ އުދައެރުން ފަދަ ކަންކަން ދިމާވަމުންދާކަން މިނިސްޓަރ ފާހަގަކުރެއްވިއެވެ.މިނިސްޓަރގެ ވާހަކަފުޅުގައި ދުނިޔޭގެ ފިނިހޫނުމިން 2 ޑިގްރީ ސެލްސިއަސް އަށް އުފުލަން ދޫކޮށްލުމަކީ ރައްކާތެރި މިންވަރެއް ނޫންކަމަށާއި، 1.5 ޑިގްރީ ސެލްސިއަސް އަށްވުުރެވެސް ދަށްކުރުމަކީ ލާޒިމުކަމެއްކަމަށެވެ. އަދި އެކަމަށް މަގުފަހިވާގޮތަށް ކުރު މުއްދަތުގެ އަދި މެދު ރާސްތާގެ އަމާޒުތައް އެކުލަވާލަންޖެހޭކަމަށް ވިދާޅުވިއެވެ. އަދި ހުރިހާ ޤައުމުތަކުންވެސް "ލޮސް އެންޑް ޑެމޭޖް" އާއި ބެހޭ ގޮތުން އެކަށީގެންވާ އޮނިގަނޑެއް އެކުލަވާލަންޖެހޭކަމަށްވެސް މިނިސްޓަރ ވިދާޅުވިއެވެ.މާލީ އެހީތެރިކަމާއި ބެހޭގޮތުން ވާހަކަފުޅުދައްކަވަމުން މިނިސްޓަރ ތޯރިޤް ވިދާޅުވީ 2020 ވަނަ އަހަރުން ފެށިގެން ކޮންމެ އަހަރަކުވެސް 100 ބިލިއަން ޑޮލަރުގެ ފަންޑެއް އެކުލަވާލަންޖެހޭކަމަށެވެ. އަދި މިފަންޑު ވާންޖެހޭނީ ކުދި ޤައުމުތަކަށް މާލީ އެހީތެރިކަން ފޯރުކޮށްދިނުމަށް އިސްކަންދޭ ފަންޑަކަށް ކަމަށެވެ.މޫސުމަށް އަންނަ ބަދަލުތަކާއިބެހޭ އދ.ގެ މުޢާހަދާ ޔުނައިޓަޑް ނޭޝަންސް ފްރޭމްވާރކް ކޮންވެންޝަން އޮން ކްލައިމެޓް ޗޭންޖް، ޔޫއެންއެފްސީސީސީ ގެ ދަށުން އެކުލަވާލާ އަދި މިހާރުވެސް ޢަމަލުކުރަމުންދާ ކިޔޯޓޯ ޕްރޮޓޮކޯލްގެ މުއްދަތު 2020 ވަނަ އަހަރުގެ ނިޔަލަށް ހަމަވާތީ، މިއެއްބަސްވުމުގެ ބަދަލުގައި ޢަމަލުކުރާނެ އައު ޤާނޫނީ އެއްބަސްވުމެއް މިއަހަރުގެ ނިޔަލަށް އެކުލަވާލުމުގެ މަސައްކަތް ޕެރިހުގައި ދަނީ ކުރަމުންނެވެ. މިއެއްބަސްވުން ކޮޕް21 ގައި "އެޑަޕްޓް" ކުރުމަށް ވެސް ޤައުމުތަކުން ދަނީ މަސައްކަތްކުރަމުންނެވެ.އަލަށް އެކުލަވާލެވޭ ޤާނޫނީ އެއްބަސްވުމަކީ ކުދި، އަދި ބިންތިރި ޖަޒީރާ ޤައުމުތަކުގެ މަސްލަޙަތަށް ރިޢާޔަތްކުރެވޭ އެއްބަސްވުމަކަށް ހެދުމަށް، އެއޯސިސްގެ މެމްބަރު ޤައުމުތަކާއެކު ރާއްޖެއިން ދަނީ މަސައްކަތްތަކެއް ކުރަމުންނެވެ.