ސަރަޙައްދީ ނުތަނަވަސްކަން ކުޑަކުރުމަށާއި ޑިޕްލޮމެޓިކް ޙައްލުތައް ހޯދުމަށް ޢަރަބިއްޔާއިން ކުރަމުންދާ މަސައްކަތްތައް ކުރިއަށް ގެންދާނެ ކަމުގައި ވަލީއަޙުދު މުޙައްމަދު ބިން ސަލްމާން ވިދާޅުވެއްޖެއެވެ. ޝޫރާ މަޖިލީހުގައި ރަސްގެފާނު ސަލްމާންގެ ފަރާތްޕުޅުން ތަޤުރީރު ކުރައްވަމުން، ޤައުމުގެ ސަލާމަތަށް ނުރައްކާވާ ކޮންމެ ކަމަކަށް ހަރުކަށި ރައްދު ދެއްވާނެ ކަމުގައި ވަލީއަޙުދު ވިދާޅުވިއެވެ. ގަލްފުގެ ޤައުމުތަކުގެ ސަލާމަތަކީ ވަކިނުކުރެވޭނެ އެއްޗެއްކަން ފާހަގަކުރައްވައި، ޢަރަބިއްޔާއިން ޓަރކީއާއި ޕާކިސްތާނާއެކު ވެފައިވާ 'މައްކާ ދިފާއީ އެއްބަސްވުމެއް' ވެސް އޭނާ އަލިއަޅުވާލެއްވިއެވެ.
ދުނިޔޭގެ ހަކަތައިގެ ބާޒާރަށް ދިމާވެފައިވާ ގޮންޖެހުންތަކާ އެކުވެސް، ސައުދީ އެރޭބިއާއިން ދަނީ ބައިނަލްއަޤުވާމީ ބާޒާރަށް ތެޔޮ ފޯރުކޮށްދީ، ހަކަތައިގެ ރައްކާތެރިކަން ކަށަވަރުކުރަމުން ކަމުގައި ވަލީއަހުދު ވިދާޅުވިއެވެ. ފަލަސްޠީނުގެ ޣައްޒާގައި ދެމުންދާ ނިރުބަވެރި ހަމަލާތަކާއި މަސްޖިދުލްއަޤްޞާގެ ޙުރުމަތް ކަނޑަމުންދާ ދިއުން ކުށްވެރިކުރައްވައި، އެކުވެރި ދައުލަތްތަކުގެ (އދ) ސަލާމަތީ މަޖިލީހުން މި ކަމުގައި ދާއިމީ ޙައްލެއް ހޯދުމަށް ވަލީއަޙުދު ގޮވާލެއްވިއެވެ. މީގެ އިތުރުން، ޔަމަނުގެ ސަރުކާރަށް އެހީތެރިވެ، އީރާނުގެ މަދަދު ލިބޭ ޙޫޘީ ހަނގުރާމަވެރިންނާ ދެކޮޅަށް ކުރާ މަސައްކަތްތަކަށާއި، ސޫދާނުގެ ހަމަޖެހުމަށް ޢަރަބިއްޔާއިން ތާއީދުކުރާކަން ފާހަގަކުރެއްވިއެވެ.
އިޤުތިޞާދީ ކުރިއެރުމަށް ބަލާއިރު، ވޭތުވެދިޔަ 10 އަހަރުގެ ތެރޭގައި ވިޝަން 2030 ގެ އަމާޒުތަކުގެ %93 ޙާސިލުކުރެވިފައިވާ ކަމުގައި ވަލީއަޙުދު ވިދާޅުވިއެވެ. ތެޔޮ ނޫން އުފެއްދުންތައް އެކްސްޕޯޓުކުރާ މިންވަރު 2016 ވަނަ އަހަރާ އަޅާބަލާއިރު %155 ކުރިއަރާފައިވާއިރު، އިޤުތިޞާދުގައި އަމިއްލަ ފަރާތްތަކުގެ ހިއްސާ %51 ކުރިއަރާފައިވާ ކަން ވެސް ވަލީއަޙުދު ފާހަގަކުރެއްވިއެވެ. އަދި، ޕަބްލިކް އިންވެސްޓްމަންޓް ފަންޑުން އަމިއްލަ ފަރާތްތަކާ ގުޅިގެން އިޤުތިޞާދު ކުރިއެރުވުމަށް 5 އަހަރުގެ އައު މަޝްރޫޢުތަކެއް ފަށާފައިވާ ކަމުގައި ވެސް ވަލީއަޙުދު ވިދާޅުވިއެވެ.
ޑިޖިޓަލް އަދި ވުނަކުރުމުގެ ގިނަ ދާއިރާތަކަކުން ޢަރަބިއްޔާއިން ބޮޑެތި ކުރިއެރުންތަކެއް ހޯދާފައިވާ ކަން ވެސް ވަލީއަޙުދުގެ ތަޤުރީރުގައި ފާހަގަކުރެއްވިއެވެ. މީގެ ތެރޭގައި، ޑިޖިޓަލް ރެޑިނެސް އިންޑެކްސްއާއި ސައިބަރސެކިއުރިޓީ އިންޑެކްސްގެ އެއްވަނަ މަޤާމު ހޯދުން ފާހަގަކުވެއެވެ. 2026 ވަނަ އަހަރަކީ އާޓިފިޝަލް އިންޓެލިޖެންސްގެ އަހަރުގެ ގޮތުގައި ކަނޑައަޅާފައިވާ ކަން ފާހަގަކުރައްވައި، އޭއައި ދާއިރާއިން ދުނިޔޭގެ އިސްވާރަކަށް ވުމަކީ ޢަރަބިއްޔާގެ އަމާޒެއް ކަމުގައި ވެސް ވަލީއަޙުދު ވިދާޅުވިއެވެ.