ދިރޭތަކެތީގެ ނަސްލުތައް ރައްކާތެރިކޮށް ބެލެހެއްޓުމާއި ގުޅޭ 2 އެއްބަސްވުމެއްގައި ސޮއިކޮށްފި

ދިވެހިރާއްޖޭގެ ދިރޭތަކެތީގެ ނަސްލުތައް ރައްކާތެރިކޮށް ބެލެހެއްޓުމާއި ގުޅޭ މުހިންމު 2 އެއްބަސްވުމެއްގައި ސޮއިކޮށްފިއެވެ. މިއީ ގްލޯބަލް އެންވަޔަރަންމަންޓް ފެސިލިޓީ، ޖެފްގެ ހިލޭ އެހީއާއިއެކު ކުރިއަށްގެންދާ ދެ މަޝްރޫއެކެވެ.

ތިމާވެއްޓާ ބެހޭ ވުޒާރާގައި މިއަދު ބޭއްވި މިކަމަށްޓަކައި ބޭއްވި ޚާއްސަ ރަސްމިއްޔާތެއްގައި މިކަމުގެ އެއްބަސްވުމުގައި ވުޒާރާގެ ފަރާތުން ސޮއިކުރެއްވީ މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޢަލީ ޝަރީފުއެވެ. އަދި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް ޔޫއެންޑީޕީގެ ފަރާތުން ސޮއިކުރެއްވީ ރެޒިޑެންޓް ރެޕްރެޒެންޓޭޓިވް އަދްނާން ޗީމާއެވެ.

ގްލޯބަލް އެންވަޔަރަންމަންޓް ފެސިލިޓީ، ޖެފްގެ ހިލޭ އެހީއާއިއެކު ކުރިއަށްގެންދާ މި މަޝްރޫޢުތަކަކީ "އަމްބްރެލާ ޕްރޮގްރާމް ޓު ސަޕޯޓް އެންބީއެސްއޭޕީ އަޕްޑޭޓް އެންޑް ދަ 7 ނޭޝަނަލް ރިޕޯޓް" އަދި "އަމްބްރެލާ ޕްރޮގްރާމް ޓު ސަޕޯޓް ޑިވެލޮޕްމަންޓް އޮފް ބަޔޯޑައިވަރސިޓީ ފައިނޭންސް ޕްލޭންސް" އެވެ.

މި ދެ މަޝްރޫޢަކީ ދިވެހިރާއްޖޭގެ ދިރޭތަކެތީގެ ނަސްލުތައް ރައްކާތެރިކޮށް ބެލެހެއްޓުމަށާއި، 2022 ވަނަ އަހަރު، ކޮންވެންޝަން އޮން ބައޮލޮޖިކަލް ޑައިވަރސިޓީގެ ދަށުން ބައިނަލްއަގްވާމީ ފެންވަރުގައި ކަނޑައަޅާފައިވާ، ކުންމިންގ-މޮންޓްރިއަލް ގްލޯބަލް ބައޯޑައިވަރސިޓީ ފްރޭމްވަރކްގެ ލަނޑުދަނޑިތައް ހާސިލްކުރުމަށް ގައުމީ ފެންވަރުގެ ސްޓެރެޓަޖީއެއް އެކުލަވާލާ އެ މަސައްކަތް ކުރުމަށް ބޭނުންވާ ފައިސާގެ ވަސީލަތްތައް ހޯދާނެ ގޮތުގެ ޕްލޭނެއް ހެދުމަށް ތައްޔާރުކޮށްފައިވާ މަޝްރޫޢުތަކެކެވެ.

ތިމާވެއްޓާބެހޭ ވުޒާރާއިން ވިދާޅުވީ، މި މަޝްރޫއުތަކުގެ ދަށުން ދިރޭތަކެތީގެ ނަސްލާ ގުޅޭ ގައުމީ ފެންވަރުގެ ލަނޑުދަނޑިތަކާއެކު "ނޭޝަނަލް ބަޔޯޑައިވަރސިޓީ ސްޓްރެޓަޖީ އެންޑް އެކްޝަން ޕްލޭން" އެންބީއެސްއޭޕީ އިސްލާހުކޮށް ތަންފީޒުކުރަން ފެށުމާއި، އެންބީއެސްއޭޕީގެ ލަނޑުދަނޑިތައް ހާސިލް ކުރުމަށް ބޭނުންވާ ފައިސާއާއި ވަސީލަތްތައް ދެނެގަނެ އެފައިސާ ހޯދުމަށް "ނޭޝަނަލް ބައޯޑައިވަރސިޓީ ފައިނޭންސް ޕްލޭން" ތައްޔާރުކުރުމަށް މަސައްކަތް ކުރަމުންދާނެ ކަމަށެވެ.

ތިމާވެއްޓާ ބެހޭ ވުޒާރާއިން ވިދާޅުވީ، މި މަޝްރޫޢުތައް މެދުވެރިކޮށް، ކޮންވެންޝަން އޮން ބައޮލޮޖިކަލް ޑައިވަރސިޓީ މުއާހަދާގެ ދަށުން ރާއްޖެއިން ތައްޔާރުކުރަންޖެހޭ، އެންބީއެސްއޭޕީ އައުކުރުމާއި، ގައުމީ ފެންވަރުގައި މި މުއާހަދާ ތަންފީޒު ކުރުމާއި ގުޅޭ ރިޕޯޓް ހުށަހެޅުމަށް މަގުފަހިވެގެންދާނެ ކަމަށެވެ. ހަމައެއާއެކު، ގައުމީ ފެންވަރުގައި ތިމާވެށި ރައްކާތެރިކުރުމަށް ކުރެވޭ މަސައްކަތްތައް އިތުރުކޮށް، ވަރުގަދަކޮށް، ދިރޭތަކެތީގެ ނަސްލު ހިމާޔަތް ކުރުމަށް ބޭނުންވާ މާލީ ވަސީލަތްތައް ހޯދޭނެ ގޮތްތައް ދެނެގަނެވޭނެ ކަމަށްވެސް އެވުޒާރާއިން ވިދާޅުވިއެވެ.