ސްޓެލްކޯގެ އިންޖީނުތަކުގެ ސަބަބުން އެސަރަހައްދުގައި ދިރިއުޅޭ ގެތަކަށާއި ރައްޔިތުންނަށް ބޮޑެތި ގެއްލުންތަކެއް ލިބެމުން އަންނާތީ، އެ ގެތަކުގައި ދިރިއުޅޭ ރައްޔިތުން އެހެން ސަރަހައްދަކަށް ބަދަލުކުރުމަށް ފުރިހަމަ އެއްބާރުލުން މާލެ ސިޓީ ކައުންސިލުން ދެއްވާނެކަމަށް މާލޭގެ މޭޔަރު ޑރ.މުޙައްމަދު މުޢިއްޒު ވިދާޅުވެއްޖެއެވެ.
މުޢިއްޒު މިހެން ވިދާޅުވީ، ސްޓެލްކޯގެ ޖަނެރޭޓަރުތަކުގެ ސަބަބުން އެ ސަރަހައްދުގައި ދިރިއުޅެމުން އަންނަ ރައްޔިތުންނަށް ލިބެމުންދާ ގެއްލުންތަކަށް ހައްލެއް ހޯދައިދިނުމަށް ރައްޔިތުންގެ މަޖިލީހަށް ހުށައަޅާފައިވާ ޤަރާރާއި ގުޅޭގޮތުން މަޖިލީހުގެ ކަމާއި ގުޅުންހުރި ކޮމިޓީގައި ވާހަކަފުޅު ދައްކަވަމުންނެވެ.
ރައްޔިތުންގެ މަޖިލީހުގެ އެސްއޯއީ އަދި އެންވަޔަރަމަންޓް ކޮމިޓިގެ ޖޮއިންޓް ކޮމިޓީގައި ވާހަކަފުޅު ދައްކަވަމުން މާލެ ސިޓީގެ މޭޔަރު ޑރ.މުހައްމަދު މުޢިއްޒު ވިދާޅުވީ، މާލޭގެ މީހުން ދިރިއުޅޭ ސަރަހައްދުން އެހެން ސަރަހައްދަކަށް ސްޓެލްކޯ ބަދަލުކުރުމަކީ ކުރެވޭނެކަމެއްކަމަށެވެ. އެއީ މިހާރަށްވެސް ކުރަންޖެހިފައިވާކަމެއްކަމަށާއި، އެކަން ކުރުމަށް ސިޓީ ކައުންސިލުން އެހީތެރިކަން ފޯރުކޮށްދޭނެކަމުގެ ޔަޤީންކަން ދެއްވާކަމަށް މޭޔަރު ވިދާޅުވިއެވެ. ޑރ.މުޢިއްޒު ވިދާޅުވީ ސްޓެލްކޯގެ ޖަނެރޭޓަރުތަކުގެ ސަބަބުން އެސަރަހައްދުގެ ގެތަކުގައި ދިރިއުޅޭ ރައްޔިތުންނަށް ބޮޑެތި އުނދަގޫތަކެއް ކުރިމަތިވަމުން އަންނަކަމަށެވެ.
"އެސަރަަހއްދުގެ ގެއްގެ ބަޔަކާއި އަޅުގަނޑު ބައްދަލުކޮށްފިން. އެއީ މިދިޔަ ހަފްތާގެ ތެރޭގައި. އެގެއާ އެންމެ ކައިރީގައި ހުންނަ ޖަނެރޭޓަރ އޮންކޮށްފަ ހުންނައިރުގަ ގޭތެރޭގައި އުޅެންޖެހޭ ހާލު، ވައިބްރޭޝަން ހުންނަ ވަރު ވީޑިއޯކޮށްފަ އެބޭފުޅުން އަޅުގަނޑަށް ދެއްކި. ސީދާ މި މައްސަލާގައި އަޅުގަނޑުމެންނަށް ގޮތްތަކެއް ނިންމިފައެއް ނުވޭ" މުއިއްޒު ވިދާޅުވިއެވެ.
ޑރ.މުޢިއްޒު ވިދާޅުވީ، އެސަރަހައްދުގައި ދިރިއުޅޭ ރައްޔިތުންނަށް ފަސޭހަކޮށްދިނުމަށް، ސްޓެލްކޯއިން ބަންދުކޮށްފައިވާ މަގުތައް ހުޅުވާލުމަށް އެދިފައިވާނެކަމަށެވެ. ދެ ޖަނެރޭޓަރެއް ބަންދުކޮށްފައިވާ މަގުތަކަށްވާގޮތަށް ބަހައްޓާފައި އެބަހުރިކަމަށާއި، އެ ޖަނަރޭޓަރުތައް އެސަރަހައްދުން ނެގުމުން އެސަރަހައްދުގެ ރައްޔިތުންގެ ފަސޭހަތަކެއް ލިބިގެންދާނެކަމަށް މޭޔަރު ވިދާޅުވިއެވެ. ނަމަވެސް އެ ޖަނަރޭޓަރުތައް އެސަރަހައްދުން ނަގައިފިނަމަ މާލެއަށް ކަރަންޓް ފޯރުކޮށްދިނުމަށް ހުރަސްއެޅޭނެކަމަށް ސްޓެލްކޯއިން ރަސްމީކޮށް އަންގާފައިވާކަމަށްވެސް މޭޔަރު ވިދާޅުވިއެވެ.
"ސްޓެލްކޯ އެމްޑަބްލިއުއެސްސީ އާއެކު ބަންދުކުރެވިފައިވާ ގޯޅިތައް ކުރީގެ ސަރުކާރުތަކާއެކު ހަދާފައިވާ އެއްބަސްވުންތަކާއި ގުޅިެން އެކި ބޭނުންތަކަށް ދީފައިހުރި ގޯޅިތައް ހުޅުވައިދިނުމަށް އެދިފައިވާނެ. އޭގެ ސަބަބުންވެސް ލުއިތަކެއް ލިބޭނެ. އެއީ ވަގުތީ ގޮތުން ބައެއް ޖަނެރޭޓަރުތައް ބަހައްޓާފައި ހުރީ އެގޯޅިތަކަށް އަރާގޮތަށް. އެހެންކަމުން އެ ދުރަށް ޖައްސައިގެން ހުޅުވޭނީ. އެކަން އެއްމަސްތެރޭގަ ތަންފިޒްކުރުމަށް އެދިފައިވާނެ. ނަމަވެސް ސްޓެލްކޯއިން އެބައޮތް ސިޓީން ޖަވާބުދީފަ އެހެން ހެދެން ނެތްވާހަކަ.އެކަން ކޮށްފިަމަ މާލެއަށް ކަރަންޓު ދިނުމަށް ދަތިވާނެކަމަށް" މުއިއްޒު ވިދާޅުވިއެވެ.
މޭޔަރު ވިދާޅުވީ، މީހުން ދިރިއުޅޭ ސަރަހައްދެއްގައި އިންޖީނުގެ ހުރުމުގެ ސަބަބުން ރައްޔިތުންގެ ސިއްހަތަށާއި، ނަފްސާނީގޮތުންވެސް ގެއްލުންވަމުންދާކަމަށެވެ. މިކަމުގައި އޮތް ދާއިމީ ހައްލަކީ ސްޓެލްކޯ މީހުން ދިރިނޫޅޭ ސަރަހައްދަކަށް ބަދަލުކުރުންކަމަށާއި، އެގޮތުން ދުރު ރާސްތާއަކަށް ވިސްނައިގެން އެކަން ކުރުމުގެ މުހިންމުކަން މޭޔަރު ފާހަގަކުރެއްވިއެވެ. މިގޮތުން ތިލަފުއްޓަށް ބަދަލުކުރެވިދާނެކަންވެސް މޭޔަރު ފާހަގަކުރެއްވިއެވެ. މޭޔަރު ވިދާލުވީ ސްޓެލްކޯ ބަދަލުނުކުރެވޭނަމަ ދެން މިކަމުގައި އޮތް ހައްލަކީ، އެ ސަރަހައްދުގެ ގެތައް އެހެން ތަނަކަށް ބަދަލުކޮށް އެފަރާތްތަކުގެ ދިރިއުޅުމުގެ އަސާސީ ހައްގުތައް ކަށަވަރުކޮށްދިނުންކަމަށެވެ.
މީހުން ދިރިއުޅޭ ސަރަހައްދުގައި ސްޓެލްކޯ އިންޖީނުގެ ހުރުމުގެ ސަބަބުން އެސަރަހައްދުގައި ދިރިއުޅޭ ރައްޔިތުްނނަށް ނަފްސާނީ އަދި ސިއްޙީ ގޮތުންވެސް ގެއްލުންތަކެއްވާކަމަށް ހިއުމަން ރައިޓްސް ކޮމިޝަނުންވެސް ވަނީ ބުނެފައެވެ.