ސިވިލް ސަރވިސްގެ އެއްވެސް މުވައްޒަފަކު ވަކިކޮށް މުސާރަ ކުޑަކުރުމުގެ ވިސްނުމެއްނެތް - ސަރުކާރު
ކޯވިޑާ ގުޅިގެން ދައުލަތުގެ ޚަރަދުތައް ކުޑަކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ސިވިލް ސާރވިސްގެ އެއްވެސް މުވައްޒަފަކު ވަޒީފާއިން ވަކިކޮށް، މުސާރަ ކުޑަކުރުމުގެ ވިސްނުމެއް ނެތްކަމަށް ސަރުކާރުން ހާމަކުރައްވައިފިއެވެ.
ސަރުކާރުން މިކަން ހާމަކުރެއްވީ، ސަރުކާރުގެ ސިޔާސަތުތަކާ ބެހޭގޮތުން މަޢުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައެވެ.
ރާއްޖޭގެ އިޤްތިޞާދީ ޙާލަތު މިހާރު އޮތްވަރަށްވުރެ ރަނގަޅުކުރުމަށް ކުރަމުންދާ ކަންތައްތަކާ ގުޅޭގޮތުންނާއި، ސަރުކާރުން ކުރިއަށްގެންދާ މުހިންމު މަސައްކަތްތަކާއި މަޝްރޫޢުތަކާ ގުޅޭ ފަހުގެ މަޢުލޫމާތު ހާމަކުރެއްވުމަށް ބޭއްވެވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާން މުޙައްމަދު މަބްރޫކް ޢަޒީޒް ވިދާޅުވީ ރާއްޖޭގެ އިޤްތިޞާދީ ހާލަތު ރަނގަޅުކުރުމަށް ސަރުކާރުން އެންމެ އިސްކަމެއް ދެއްވައިގެން ކުރައްވަމުން ގެންދަވަނީ ކޯވިޑް ވެކްސިން ފުރިހަމަކުރުމުގެ ޕްރޮގްރާމްކަމަށެވެ.
މިގޮތުން 18 އަހަރުން މަތީގެ އާބާދީގެ %84 އަދި 12 އަހަރުން މަތީގެ އާބާދީގެ %81 ވަނީ މިހާރު ވެކްސިން ޖަހާފައިކަމުގައި މަބްރޫކް ވިދާޅުވިއެވެ. އަދި ވެކްސިން ޖެހުމުގެ މަސައްކަތުގައި ދުނިޔޭގެ ނިސްބަތުން ފާހަގަކޮށްލެވޭ ކުރިއެރުމެއް ރާއްޖެއިން ހޯދާފައިވާކަންވެސް މަބްރޫކް ހާމަކުރެއްވިއެވެ.
ސަރުކާރުގެ ޚަރަދުތައް ކުޑަކުރުމަށް ގެންގުޅޭ ސިޔާސަތުގެ ދަށުން ސިވިލްސާރވިސް މުވައްޒަފުން ވަޒީފާއިން ވަކިކުރަން އުޅޭކަމަށް ދެކެވޭ ވާހަކަތަކާ ގުޅޭގޮތުން ނޫސްވެރިޔަކު ދެންނެވި ސުވާލަކަށް ޖަވާބުދެއްވަމުން މަބްރޫކް ވިދާޅުވީ، ކޯވިޑްގެ ހާލަތާ ގުޅިގެން އިޤްތިޞާދީގޮތުން ދިމާވި ދަތި ޙާލަތުގައިވެސް ސަރުކާރުން ސިވިލް ސާރވިސްގެ އެއްވެސް މުވައްޒަފެއްގެ މުސާރައަށް ބަދަލެއް ގެނެސްފައިނުވާކަމަށެވެ. އެދަނޑިވަޅުގައިވެސް މުސާރަ ކުޑަކޮށްފައިވަނީ ހަމައެކަނި ސިޔާސީ މުވައްޒަފުންގެކަން ފާހަގަކުރައްވަމުން މަބްރޫކް ވިދާޅުވީ، ސަރުކާރުން ޚަރަދުކުޑަކުރުމަށް ގެންގުޅޭ ސިޔާސަތުގެ ދަށުން އެއްވެސް މުވައްޒަފެއްގެ މުސާރަ ކުޑަކޮށް ވަޒީފާއިން ވަކިކުރުމުގެ އެއްވެސް ވިސްނުމެއް ނުގެންގުޅޭކަމަށެވެ.
"ކޯވިޑްގެ ހާލަތު ރާއްޖެއަށް ދިމާވުމާ އެކީގައި ޚަރަދުތައް ކުޑަކުރިއިރުވެސް އަޅުގަނޑުމެން މިސަރުކާރު ކިޔާނެ އެއްވެސް ސިވިލް ސާރވިސް މުވައްޒަފެއްގެ މުސާރައަށް ބަދަލު ނުގެނެސް އެކަން ކުރިބަޔަކަށް. އެވަގުތުވެސް ކުޑަކުރިއްޔާ ކުޑަކޮށްފަ ހުރީ ސިޔާސީ މީހެއްގެ މުސާރައިގެ ގޮތުގައި ލިބޭ އެއްޗެއް. އެހެންވީމަ ޚަރަދު ކުޑަކުރުމުގެ ގޮތުންނެއް އެ ސަބަބަށްޓަކައެއް ސަރުކާރުން ސިވިލް ސާރވިސް މުވައްޒަފެއްގެ ވަޒީފާއަކާވެސް މުސާރައަކާވެސް ކުޅުމުގެ ވިސްނުމެއް ނުގެންގުޅެން." ރައީސް އޮފީހުގެ ތަރުޖަމާން މަބްރޫކް ވިދާޅުވިއެވެ.
މަބްރޫކް މިހެން ވިދާޅުވެފައިވާއިރު، ކޯވީޑްގެ ޙާލަތު އެންމެ ގޯސްވެ އިޤްތިޞާދު އެންމެ ހީނަރުވެގެން ދިޔަ ދަނޑިވަޅުގައި ސަރުކާރުން ވަނީ 20،000 ރުފިޔާއަށްވުރެ މަތިން މުސާރަ ލިބޭ ހުރިހާ ސިޔާސީ މުވައްޒަފުންގެ މުސާރަ ކުޑަކޮށްފައެވެ. ނަމަވެސް 20،000 ރުފިޔާއިން ދަށްކޮށް މުސާރަ ލިބޭ އެއްވެސް ސިޔާސީ މުވައްޒަފެއްގެ މުސާރައަށްވެސް ބަދަލެއް ގެނެސްފައެއްނުވެއެވެ.
ކޯވީޑާއި ގުޅިގެން ރާއްޖޭގެ އިޤްތިޞާދު ހީނަރުވެފައި އޮތުމަށްފަހު، ރާއްޖޭގެ ފަތުރުވެރިކަން ރަނގަޅުވެ އިޤްތިޞާދު މިހާރު ވަނީ ކުރިއަރަން ފަށާފައެވެ. މަބްރޫކް ވިދާޅުވީ، މިދިޔަ ޖުލައި މަހު ރާއްޖެއަށް އައިސްފައިވާ ޓޫރިސްޓުންގެ ޖުމްލަ އަދަދު މި ހިނގާ އޮގަސްޓް މަހު، މިހާރު ފަހަނައަޅައި ގޮސް މިދިޔަ އަހަރުގެ އޮގަސްޓް މަހު ރާއްޖެއަށް ޓޫރިސްޓުން އައިސްފައިވާ އަދަދާއި ގާތްކުރާ އަދަދަށް ޓޫރިސްޓުން އަންނަމުން ދާކަމަށެވެ.