ކައުންސިލްތަކުގެ މަޝްރޫޢުތަކަށް ބޭނުންވާ ފައިސާ ބަޖެޓުގައި ކަނޑައަޅަން މަސައްކަތްކުރާނަން - ރައީސް
ލާމަރުކަޒީ ޤާނޫނުން ކައުންސިލްތަކަށް ލިބިދޭ ބާރުގެ ދަށުން ކައުންސިލްތަކުން ކުރިއަށްގެންދަން ބޭނުންވާ މަޝްރޫޢުތަކަށް އަންނަ އަހަރުގެ ބަޖެޓުގައި ފައިސާ ކަނޑައަޅައިދެއްވުމަށް މަސައްކަތްކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، މިހާރު ކޮޅުމަޑުލަށް ކުރައްވަމުން ގެންދަވާ ދަތުރުފުޅުގެ ތެރެއިން އެއަތޮޅު ވޭމަންޑޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއެކު ބޭއްވެވި ބައްދަލުކުރެއްވުމުގައި ދެއްކެވި ވަހަކަފުޅުގައެވެ.
ވޭމަންޑޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއެކު ރަށު ކައުންސިލް އިދާރާގައި ބޭއްވެވި ބައްދަލުކުރެއްވުމުގައި ވޭމަންޑޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ، މި ސަރުކާރުން އަންހެނުން ކުރިއަރުވައި އަންހެނުންނަށް ޤާނޫނީ ބާރުވެރިކަން ހޯއްދަވައިދެއްވުމަށް ކުރައްވާ މަސައްކަތް ބަލައިގަންނަކަން ފާހަގަކޮށް އެކަން ރައީސަށް ދަންނަވާފައެވެ.
ވޭމަންޑޫ ކައުންސިލުން ވަނީ އެރަށުގެ ރައްޔިތުންނަށް އެންމެ މުހިންމު ކަންކަމާއި އެ ރަށުގެ ރައްޔިތުންގެ ކަންބޮޑުވުންތައް ރައީސުލްޖުމްހޫރިއްޔާއަށް ދަންނަވާފައެވެ. އެގޮތުން މަގުތައް ޒަމާނީ ފެންވަރަކަށް ހެދުމާއި ރަށުގެ ގިރާ ސަރަޙައްދު ޙިމާޔަތްކުރުމާއި ކުނި މެނޭޖްކުރުމާއި ހޮސްޕިޓލްގެ ޚިދުމަތްތަކުގެ ފެންވަރު މަތިކުރުމާއި ބިން ހިއްކުމާއި ބައެއް އިދާރާތަކުގެ ޖާގައިގެ ދަތިކަން ޙައްލުކޮށްދެއްވުމަށާއި އައިސް ޕްލާންޓް ޤާއިމުކުރުމާއި މަގު ބައްތި ޖެހުންފަދަ ކަންކަން ކައުންސިލުން ވަނީ ފާހަގަކުރައްވާފައެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ އެ ކޮމިޓީގެ މަސައްކަތްތައް ކުރިޔަށް ގެންދާ ގޮތްތަކާއި ރަށުގެ ތަރައްޤީއަށާއި އަންހެނުން ބާރުވެރި ކުރުމަށް ބޭނުންވާ ކަންކަމާ ގުޅޭ މަޢުލޫމާތު ރައީސުލްޖުމްހޫރިއްޔާއާއަށް އަރުވާފައެވެ. މިގޮތުން އެބޭފުޅުން ވަނީ ވޭމަންޑޫގައި ހިންގާ ޕްރީސްކޫލްގެ ވަޞީލަތްތައް މަދުކަމާއި، އިޖްތިމާޢީ ކަންކަން ކުރިއެރުވުމަށް ބޭނުންވާ ޕާކާއި، އައުޓްޑޯ ޖިމް ފަދަ ވަޞީލަތްތައް ބޭނުންވާކަމަށް ދަންނަވާފައެވެ. މީގެ އިތުރުންވެސް ވޭމަންޑޫ ޒުވާނުންގެ ގުޅުމުގެ ފަރާތުން އެރަށު ޒުވާނުންގެ ކަންބޮޑުވުންތައް ވަނީ ރައީސުލްޖުމްހޫރިއްޔާއަށް ދަންނަވާފައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރެއްވި ކަންކަމާގުޅޭގޮތުން ވާހަކަފުޅުދައްކަވައި ބައެއްކަންކަން ޙައްލުކުރެއްވުމަށް ސަރުކާރުން މިހާރުވެސް ކުރައްވާ ކަންކަމުގެ އެންމެ ފަހުގެ މަޢުލޫމާތު ދެއްވާފައެވެ. މިގޮތުން އަންނަ އަހަރަށް ބަޖެޓްކޮށްގެން ބައެއް މަޝްރޫޢުތައް ކުރިޔަށްގެންދަވާނެކަމަށާއި ކައުންސިލްތަކަށް ޤާނޫނުން ލިބިފައިވާ ބާރުތަކުގެ ބޭނުން ހިފައިގެން ކުރެވެންހުރި ކަންކަން އެގޮތަށް ކުރިއަށްދިއުމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާ މިހާރު ވޭމަންޑޫއަށް ކުރައްވަމުން މިގެންދަވާ ދަތުރުފުޅަކީ ތ. އަތޮޅުގެ 7 ރަށަކަށް ކުރައްވާ ދަތުރުފުޅުގެ ހަތަރުވަނަ މަންޒިލެވެ. ރައީސުލްޖުމްހޫރިއްޔާގެ އަރިހުގައި ބައެއް ވުޒާރާތަކުގެ ވަޒީރުންނާއި، ރައީސުލްޖުމްހޫރިއްޔާގެ އޮފީހާއި، ދަޢުލަތުގެ ބައެއް އިދާރާތަކުގެ އިސްވެރިންގެ ވަފްދެއް މިދަތުރުފުޅުގައި ބައިވެރިވެވަޑައިގަންނަވައެވެ.