މަސްފިނިކޮށް އެކްސްޕޯޓްކުރެވޭގޮތަށް މިފްކޯއިން ރާއްޖެ ގެނައި އެކުންފުނީގެ ބޯޓުގެ ސަބަބުން، މަސްވެރިންގެ އަތުން މަސް ގަންނަ އަގު މަތިކޮށް މަސްވެރިންނަށް ފައިދާކުރާނެ ގޮތްތަކެއް ވަރަށް އަވަހަށް ހޯއްދަވާދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ، ކޮޅުމަޑުލަށް ކުރައްވަމުން ގެންދަވާ ދަތުރުފުޅުގެ ތެރެއިން އެއަތޮޅު ތިމަރަފުށީގެ މަސްވެރިންނާއި ވިޔަފާރިވެރިންނާއި ބައްދަލުކުރައްވާ ދެއްކެވި ވާހަކަފުޅުގައެވެ.
ރޭ ތިމަރަފުށީ ކައުންސިލް އިދާރާގައި އެރަށު މަސްވެރިންނާއި ވިޔަފާރިވެރިންނާއި ބައްދަލުކުރައްވާ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ މަސްވެރިންނާއި، ވިޔަފާރިވެރިންގެ ކަންބޮޑުވުންތައް އަޑުއައްސަވާ އެކަންކަން ހައްލުކުރެއްވުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ މައްޗަށް އަލިއަޅުއްވާލައްވާފައެވެ.
ރައީސްގެ ވާހަކަފުޅުގައި، ރަށްރަށުގެ ތަރައްޤީއަށް ކުރެވެމުންދާ ކަންކަމާއި ކުރިއަށް ރާވަފައިވާ މަޝްރޫޢުތައް ހުރިކަން ފާހަގަކުރައްވާ ވަނީ، ފާއިތުވި ދޮޅު އަހަރު ދުވަހަކީ ކޯވިޑް-19ގެ ސަބަބުން ބައެއް މަސައްކަތްތައް މަޑުޖައްސާލަން ޖެހުނު ދުވަސްވަރެއްކަމަށް ވިދާޅުވެފައެވެ. ކޯވިޑްގެ ބަލިމަޑުކަމުގެ ސަބަބުން ރައްޔިތުންގެ ދިރިއުޅުމަށް ދަތިތަކެއް ކުރިމަތިވެގެން ދިޔަކަމަށާއި، އެންމެ ބޮޑު ގޮންޖެހުމެއް ކުރިމަތިވީ ކުދި އަދި މެދުފަންތީގެ ވިޔަފާރިވެރިންނަށް ކަމަށް އެމަނިކުފާނު ވިދާޅުވިއެވެ. އެހެންކަމުން އެ ވިޔަފާރިތަކަށް އެހީތެރިވުމަށް ލުއި ލޯނާއި އެނޫންވެސް މާލީ އެހީތެރިކަން ސަރުކާރުން ފޯރުކޮށްދެއްވި ކަމަށް ރައީސް ވިދާޅުވިއެވެ. ނަމަވެސް އެއީ ވިޔަފާރިތަކުން އެންމެ ބޭނުންވާ އެހީތެރިކަމަށް ނުވިނަމަވެސް ގިނަ ދަތިތަކެއް ހައްލުވި ކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ކޯވިޑްގެ ބަލިމަޑުކަން ރާއްޖޭގައި މިހާރު ވަރަށް ބޮޑަށް ކޮންޓްރޯލްކުރެވިފައިވާކަން ތަކުރާރުކުރައްވަމުން ވިދާޅުވީ، އެކަމުގެ ހެޔޮ ބަދަލު އިޤްތިޞާދަށްވެސް މިހާރު އަންނަން ފަށާފައިވާކަމަށެވެ. ރައީސުލްޖުމްހޫރިއްޔާ ވަނީ ކޯވިޑުން ރައްކާތެރިވުމަށް ސަރުކާރުން ކުރައްވަމުން ގެންދަވާ ކަންކަމަށް ރައްޔިތުންގެ ފަރާތުން އެއްބާރުލުންދެއްވުމަށް އެދިވަޑައިގެންފައެވެ.
ރައީސުލްޖުމްހޫރިއްޔާގެ ވާހަކަފުޅުގައި ވަނީ މަސްވެރިކަން ތަރައްޤީކޮށް މަސްވެރިންނަށް ހަމައަގު ހޯދައިދިނުމަށް ކުރައްވަމުން އަންނަ މަސައްކަތްތަކަށްވެސް އަލިއަޅުއްވާލައްވާފައެވެ. އެގޮތުން މިފްކޯ ތަރައްޤީކުރުމަށް ބޮޑު އިންވެސްޓްމަންޓެއް ފަށްޓަވާފައިވާކަން ފާހަގަކުރައްވަމުން ރައީސް ވިދާޅުވީ، އެ އިންވެސްޓްމަންޓްގެ ސަބަބުން މަހުގެ އަގަށް ހެޔޮ ބަދަލެއް އަންނާނެކަމަށެވެ. އެގޮތުން މިފްކޯއިން ގެނެސްފައިވާ އެކުންފުނީގެ އަމިއްލަ ބޯޓުގައި މަސް ފިނިކޮށް ބޭރަށް އެކްސްޕޯޓްކުރަން ފެށުމާއެކު މިފްކޯއަށް ލުއިތަކެއްލިބި، މަސްވެރިންގެ އަތުން މިފްކޯއަށް ގަންނަ މަހުގެ އަގު ބޮޑުވެގެންދާނެކަމަށެވެ. އެ ބަދަލު ގެނައުމަށް ހިސާބުތައް ހައްދަވަމުން ގެންދަވާކަމަށް ރައީސް ވިދާޅުވިއެވެ.
"މިފްކޯގެ މަސް އަމިއްލަ ބޯޓެއްގައި ފްރީޒްކޮށްގެން ރާއްޖެއިން ބޭރަށް ގެންދެވޭނެގޮތް މިހާރުވަނީ ހަމަޖެހިފައި. އަޅުގަނޑުމެން އިހަށްދުވަހު ބޯޓެއް ގަނެގެން މިގެނައީ. އެހެންކަމުން އޭގެ ސަބަބުން ބޭރަށް ގެންދާ މަހުން ދައްކަންޖެހޭ ފްރައިޓަށް ބަދަލުތަކެއް އަންނަނާނެ. އެއީ މ ިފްކޯއަށް ލިބޭ ލުޔެއް އަދި ފަސޭހައަކަށް ވެގެންދާނެ. މިހުރިހާކަމެއްގެ އަގުން ކެނޑިގެންދާ ބައި އިރާދަކުރެއްވިއްޔާ އަޅުގަނޑުމެން ހަމަ މަސްވެރިންނަށް ލިބޭގޮތް ހަދައިދޭނަން. އެހެންވީމަ އެ ހިސާބުތައް ހަދަމުން އަޅުގަނޑުމެން މިގެންދަނީ. އިރާދަކުރެއްވިއްޔާ މަސްވެރިންނަށް ރަނގަޅު އަގެއް ހޯދައިދޭން މަސައްކަތްކޮށް ކާމިޔާބުކުރާނަން." ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވިއެވެ.
ބޭރަށް މަސް އެކްސްޕޯޓްކުރެވޭ މިންވަރު އިތުރުކުރުމަށް މިފްކޯއިން 2500 ޓަނުގެ މަސް ފިނިކޮށް ރައްކާ ކުރެވޭ ބޯޓެއް ރާއްޖެވަނީ ގެނެސްފައެވެ. ތައިލެންޑްގެ ކުންފުންޏަކުން އޮޕަރޭޓްކުރަމުން ދިޔަ، ދިގުމިނުގައި 98 މީޓަރު، ފުޅާމިނުގައި 13.6 މީޓަރުގެ މި ބޯޓު މާލެ ގެނެސްފައިވަނީ ޖުލައި މަހުގެ ތެރޭގައެވެ. ބޯޓަށް ދީފައިވާ ނަމަކީ "ޖަޒީރާ ރީފާ" އެވެ. މި ބޯޓު ގަތުމަށް ގާތްގަނޑަކަށް 27.8 މިލިއަން ރުފިޔާ ހޭދަވެފައިވާ ކަމަށް މިފްކޯއިން ބުނެއެވެ.