3 ރަށެއްގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިޚާބު ބޭއްވުމަށް އިލެކްޝަންސް ކޮމިޝަނުން ނިންމައިފިއެވެ.
އެކޮމިޝަނުން ވިދާޅުވީ، އިންތިޚާބު ބޭއްވުމަށް ނިންމާފައިވަނީ، ހދ. ނޭކުރެންދޫއާއި، ރ.މަޑުއްވަރީ އަދި ނ.ކެނދިކުޅުދޫއެވެ.
ހދ.ނޭކުރެންދޫގައި އިންތިޚާބު ބާއްވަނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީއަށް އިންތިޚާބު ކުރަންޖެހޭ އަދަދަށްވުރެ މަދުން މީހުން ކުރިމަތިލާފައިވާތީއެވެ. އަދި ނ.ކެނދިކުޅުދޫއާއި ރ.މަޑުއްވަރީގައި އިންތިޚާބު ބާއްވަނީ ކޮމިޓިގެ މެންބަރަކު އިސްތިއުފާ ދެއްވާފައިވާތީއެވެ. މިއިން ކޮންމެ ރަށަކަށްވެސް އިންތިޚާބު ކުރަންޖެހެނީ އެންމެ މެންބަރެކެވެ. އެ ތިން ރަށުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް މެންބަރުން އިންތިޚާބުކުރުމުން ހުރިހާ ރަށެއްގެ އަންހެނުންގެ ތަރައްްޤީއަށް މަސައްކަތްކުރާ ކޮމިޓީއަށް މެންބަރުން އިންތިޚާބުކޮށް ނިމޭނެކަމަށްވެސް އިލެކްޝަންސް ކޮމިޝަނުން ވިދާޅުވިއެވެ.
އިލެކްޝަންސް ކޮމިޝަނުން ވިދާޅުވީ، ތިން ރަށުގައި ބާއްވާ އިންތިޚާބަށް ވާދަކުރުމުގެ ފުރުޞަތު މިއަދު 13:00އާއި ހަމައަށް ހުޅުވާލާފައިވާކަމަށެވެ. ނަމަވެސް މިހާތަނަށް އެއްވެސް މީހަކު ކުރިމަތިލާފައިނުވާކަމަށް އިލެކްޝަންސް ކޮމިޝަނުން ވިދާޅުވިއެވެ. ނޭކުރެންދޫއާއި، މަޑުއްވަރީ އަދި ކެނދިކުޅުދޫގައި އިންތިޚާބު ބޭއްވުމަށް ނިންމާފައިވަނީ އަންނަ ސެޕްޓެމްބަރު މަހުގެ 11ގައެވެ.
އިލެކްޝަންސް ކޮމިޝަނުން ވަނީ މިމަހުގެ 7 ވަނަ ދުވަހުވެސް 5 ރަށެއްގައި ބައި-އިލެކްޝަން ބާއްވާފައެވެ.