ރައީސް ނަޝީދަށް އަމާޒުކޮށްދިން ޓެރަރިސްޓް ހަމާލާއާގުޅިގެން މިހާތަނަށް ލިބެމުންދާ މަޢުލޫމާތުތަކާއެކު ތަޙުޤީޤު އިތުރަށް ފުޅާކުރެވި އިތުރަށް ކުރިއެރުން ލިބެމުންދާކަމަށް ފުލުހުން ހާމަކޮށްފިއެވެ.
ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފްް ޕޮލިސް މުޙަންމަދު ރިޔާޒް ވިދާޅުވީ، މިހަމަލާގައި އަމަލީގޮތުން ބައިވެރިވި މީހުން ހަައްޔަރުކޮށްފައިވުމުން މިކަމުގައި އިތުރަށް ބަލަންޖެހޭ ކަންކަން ބަލަމުން ގެންދާކަމަށެވެ.
އަދި މިކަމުގައި ތަޙްޤީގަށް ލިބެމުންދާ މައުލޫމާތުތަކަށް ބިނާކޮށް އިތުރަށް ބަލަންޖެހޭކަންބެލުމަށް ތަޙުޤީޤު އިތުރަށް ފުޅާކުރެވެމުންދާކަމަށް ރިޔާޒް ވިދާޅުވިއެވެ. އަދި މިމައްސަލައާ ގުޅިގެން، ޚާއްސަކޮށް ބޮމާގުޅޭއޮތުން އިތުރަށް ބަލަންޖެހޭ ކަންކަން ސިފައިންނާއި ގުޅިގެން ކުރަމުންދާ ކަމަށްވެސް ފުލުހުން ވިދާޅުވިއެވެ.
"ޚާއްސަކޮށް ބޮމުގެ ބައެއް ކަހަލަ ފަންނީ ކަންތަތައްތަކާއި ގުޅޭގޮތުން އަޅުގަނޑުމެންނަށް ދޭންޖެހޭ އެހީތެރިކަމާއި ގުޅޭގޮތުން އެމްއެންޑީއެފްއާ އަޅުގަނޑުމެންނާއެއްކޮށް މަސައްކަތް ކުރެވެމުން އެބަދޭ. އަދި ތަހުޤީޤަށް ކޮންމެވެސް ވަރަކަށް ކުރިއެރުންދަނީ ލިބެމުން" ރިޔާޒް ވިދާޅުވިއެވެ.
މި މައްސަލައިގެ ތަޙުޤީގު އޮތީ ވަރަށް މުހިންމު މަރުހަލާއެއްގައިކަމަށާއި، މިއީ ތަހުގީގުގެ ކުރީ މަރުޙަލާއަކަށްވުމުން މައްސަލައާއިގުޅޭ އިތުރު ގިނަ މަޢުލޫމާތުތައް ހާމަކުރަން އުޒުރުވެރިވާކަމަށްވެސް އެސިސްޓެންޓް ކޮމިޝަނަރ އޮފްް ޕޮލިސް މުޙަންމަދު ރިޔާޒް ވިދާޅުވިއެވެ.
ރައީސް ނަޝީދަށް ދިން ބޮމުގެ ހަމަލާ އަށް ފަހު، ތިން މީހަކު ވަނީ ހައްޔަރުކޮށްފަ އެވެ. އެކަމަކު އެ ތިން މީހުން ވެސް ވަނީ ކުށަށް އިންކާރުކޮށްފަ އެވެ. ފުލުހުން ވިދާޅުވީ ބޮން ގޮއްވި ސަރަޙައްދު މިހާރު އާންމުކޮށް ހުޅުވާލާފައިވާކަމަށާއި، އެ ސަރަހައްދު ހުޅުވާލީ، އެތަނުން ނަގަން ޖެހޭ ހެކިތަކާއި ސާމްޕަލްތައް ނެގުމަށްފަހުކަމަށެވެ. އަދި އެތަނަށް ބުރައިގެން ދިޔަ ހުރިހާ އެއްޗެއް ނަގިނަމަވެސް އަދިވެސް އެފަދަ އެއްޗެއް ފެނިއްޖެނަމަ އާންމުން އެކަން އަންގައިދިނުމަށް ފުލުހުންވަނީ އިލްތިމާސްކުރައްވާފައެވެ.
ކުރިންވެސް އެދިފައިވާ ގޮތަށް އަދިވެސް މި ޙާދިސާގެ ވަގުތު އާންމުން ނަގާފައިވާ ފޮޓޯ އާއި ވީޑިއޯތައް ހިއްސާކޮށް ދިނުމަށް ފުލުހުންވަނީ އެދިފައެވެ. އަދި އެ މައުލޫމާތު ފޯރުކޮށްދޭ މީހުންގެ މައުލޫމާތު ރައްކާތެރިކޮށްދޭނަނކަމުގެ ޔަޤީންކަން ފުލުހުން ވަނީ ދެއްވާފައެވެ.
މީގެ އިތުރުން ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައިވަނީ ރޭ ބިހުރޯޒް މިސްކިތް ސަރަހައްދުން ފެނުނު ފޮށި އެ ތަނުގައި ބެހެއްޓި މީހާ ވަނީ ދެނެގަނެވިފައިވާކަން ހާމަކޮށްފައެވެ. ފުލުހުން ވިދާޅުވީ އެއީ އެމީހާ އާންމުކޮށް ގެންގުޅޭ ފޮއްޓެއްކަމަށެވެ.
ރައީސް ނަޝީދަށް އަމާޒުކޮށް ދިން ޙަމަލާއާއި ގުޅިގެން މާލޭގެ ސަލާމަތާއި ރައްކާތެރިކަން ކަށަވަރުކުރުމައްޓަކައި ފުލުހުން މަސައްކަތްކުރަމުންދާކަމަށާއި މިފަދަ ކަމެއް އިތުރަށް ހިނގިޔަ ނުދިނުމަށްޓަކައި ފުލުހުންގެ ޚިދުމަތުގެ ހުރިހާ އޮފިސަރުން 24 ގަޑިއިރު މަސައްކަތްކުރަަމުންދާކަމަށްވެސް ފުލުހުންވަނީ ވިދާޅުވެފައެވެ.