މިއަހަރުގެ ފުރަތަ ދަޢުރުގެ ތެރޭގައި ސަރުކާރުން މަޖިލީހަށް ފޮނުވާނެކަމަށް ވިދާޅުވި 33 ބިލުގެ ތެރެއިން ދައުރު ނިމުނުއިރު ފޮނުވާފައިވަނީ އެންމެ 7 ބިލު ކަމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީން ހާމަކޮށްފިއެވެ.
ޖުޑީޝަރީ ކޮމިޓީން މިކަން ހާމަކޮށްފައިވަނީ ރައްޔިތުންގެ މަޖިލީހަށް ސަރުކާރުން ފޮނުވާ ބިލްތައް ލަސްވެގެން ދިޔުމަކީ އިންސާފު ލިބިދިނުމަށް އެޅިގެންދާ ހުރަހެއް ކަމަށް ރައީސުލްޖުމްހޫރިއްޔާގެ ލީގަލް ކައުންސެލް އަލްއުސްތާޛު އަޙްމަދު ޢަބްދުﷲ ޢަފީފް ވިދާޅުވެފައިވާތީ އެކަމާއި ގުޅިގެން އެ ކޮމިޓީން މިއަދު ބޭއްވި ނޫސްވެރިންގެ ބައްދަލުވުމުގައެވެ.
މި ނޫސްވެރިންގެ ބައްދަލުވުމުގައި ޖުޑިޝިއަރީ ކޮމިޓީގެ މުޤައްރިރު މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ވިދާޅުވީ އިންސާފު ލިބުން ލަސްވަނީ، ކޮންދިމާލަކުންތޯ ބަލާއިރު، ޖުޑީޝަރީ ކޮމިޓީގެ މަސައްކަތްތައް ކުރިއަށްގެންދާ ގޮތުން އެކަން ލަސްވެގެންދާކަމަށް ގަބޫލު ނުކުރައްވާކަމަށެވެ.
ރައްޔިތުންގެ މަޖިލީހުގެ ޖުޑީޝަރީ ކޮމިޓީގެ މަސައްކަތްތައް ބާރު ސްޕީޑުގައި ކުރިއަށްދާކަން ފާހަގަކުރައްވަމުން އިމްތިޔާޒް ފަހުމީ ވިދާޅުވީ ޤާނޫނުތައް އަވަހަށް ފާސްކުރުމަށްޓަކައި ޚާއްސަ އުސޫލެއްގެ ދަށުން އެކޮމިޓީގެ މެންބަރުން ބުރަކޮށް މަސައްކަތްކުރާ ކަމަށާއި، ސަރުކާރުން ބޭނުންވާ ކޮންމެ ބާރެއްވެސް ޤާނޫނުގެ ޒަރިއްޔާއިންވެސް ފަހިކޮށްދިނުމަށް ކޮމިޓީން މަސައްކަތްކުރާކަމަށެވެ.
ނަމަވެސް މަޖިލީހުގެ ނިމިގެންމިދިޔަ ދައުރަށް ސަރުކާރުން ފޮނުވި މަދު ބިލްތަކުގެ ތެރޭގައިވެސް އެމްޑީޕީން، ޚާއްސަކޮށް ސަރުކާރުންވީ ވަޢުދުތަކާ އެއްގޮތަށް އިންސާފު ޤާއިމްކުރަން ފޮނުވަންޖެހޭ މުހިއްމު ބިލްތައް ނުހިމެނޭކަން އިމްޒިޔާޒް ފާހަގަކުރެއްވިއެވެ.
"ކޯޓުތަކުގެ ޤާނޫނަށް އިސްލާޙުގެ ބިލު ފޮނުވާފައިނެތް، މިދިޔަ ދައުރު ނިމުމުގެ ކުރީގައި ފަނޑިޔާރުންގެ ޤާނޫނަށް އިސްލާޙު ގެނައުމުގެ ބިލު ފޮނުވާނެކަމަށް ވިދާޅުވި އެހެން ނަމަވެސް ފޮނުވާފައިނުވޭ. ހެތްކާބެހޭ ބިލު ފޮނުވާފައިނެތް. ޤާނޫނީ އެހީތެރިކަން ފޯރުކޮށްދިނުމުގެ ބިލު ފޮނުވާފައިނެތް" އިމްތިޔާޒް ވިދާޅުވިއެވެ.
ސަރުކާރުން ފޮނުވަންޖެހޭ ބިލްތައް ލަސްވެގެން މަޖިލީހުގެ ތެރެއިން ބިލްތައް ޑްރާފްޓް ކުރުމުގެ މަސައްކަތް ފަށަންއުޅުމުން އެކަމަށްވެސް ސަރުކާރުން ނުރުހޭކަމަށް ކޮމިޓީގެ މުޤައްރިރު އިމްތިޔާޒް ފަހުމީ ވިދާޅުވިއެވެ.
މަދަނީ އިޖުރާޢަތުގެ ބިލު ލަސްވެގެން ކޮމިޓީގެ މެންބަރުންގެ ބޮލުގައި އެކަން އަޅުވާފައިވާތީ އެކަަމާ ކަންބޮޑުވާކަން ފާހަގަކުރައްވަމުން އިމްތިޔާޒް ވިދާޅުވީ އެގޮތަށް ރައީސް އޮފީހުގެ ލީގަލް ކައުންސެލް ވިދާޅުވަނީ މަންދުކޮލެޖަށް ދައުލަތުން ދިން ބަދަލާއި ގުޅިގެން އެކޮލެޖް ހިންގާ ފަރާތުން ވިދާޅުވާ ވާހަކަތަކާއި ގުޅިގެންކަމަށް ޤަބޫލުކުރެވޭކަމަށެވެ. މީގެ އިތުރުން މަދަނީ އިޖުރާޢަތުގެ ބިލުގެ ފުރިހަމަ ވާޝަންއެއް ބަންޑާރަ ނާއިބުގެ އޮފީހުން ފޮނުވަން އަހަރެއްހާ ދުވަސް ހޭދަވިކަމަށާއި އެބިލުގެ މަސައްކަތް ލަސްވީ ކޮމިޓީގެ ސަބަބުންކަމަށް ބުނުމަކީ ބަލައިގަނެވޭނެކަމެއްނޫން ކަމަށްވެސް ޖުޑިޝަރީ ކޮމިޓީން ވިދާޅުވިއެވެ.